នៅរសៀលថ្ងៃទី១២ ខែមីនា ឆ្នាំ២០២៥នេះ លោក លី សារី អភិបាលរងខេត្តសៀមរាប បានដឹកនាំបើកកិច្ចប្រជុំត្រៀមរៀបចំទិវាវប្បធម៌ជាតិ ៣មីនា លើកទី២៧ ឆ្នាំ២០២៥ ក្រោមប្រធានបទ “យុវជនដើម្បីវប្បធម៌ជាតិ” ចាប់ពីថ្ងៃទី២១-២៣ ខែមីនា ឆ្នាំ២០២៥ នៅទីតាំងសួនព្រះរាជដំណាក់ ក្រុងសៀមរាប។
លោក លី សារី មានប្រសាសន៍ថា ដើម្បីរំលឹកដឹងគុណចំពោះបុព្វបុរស ដូនតាខ្មែរគ្រប់ជំនាន់ ដែលបានពលីលះបង់ទាំងកម្លាំងកាយ កម្លាំងចិត្ត បញ្ញាស្មារតី និងអាយុជីវិត ក្នុងការបង្កើតថែរក្សា និងការពារសម្បត្តិវប្បធម៌រូបី និងអរូបីដ៏សម្បូរបែប បន្សល់ទុកជាមរតកដ៏មានតម្លៃមិនអាចកាត់ថ្លៃបានសម្រាប់កូនចៅជំនាន់ក្រោយ។ ដូច្នេះកូនខ្មែរគ្រប់ៗរូប មានភារៈកិច្ចការពារសម្បត្តិបេតិកភណ្ឌវប្បធម៌ ជាពិសេសយុវជនជាទំពាំងស្នងឬស្សី ដែលត្រូវចូលរួមថែរក្សាកេរដំណែលដ៏ថ្លៃថ្លានេះ ចូលរួមអភិរក្ស លើកស្ទួយសម្បត្តិវប្បធម៌ខ្មែរឱ្យកាន់តែខ្ទរខ្ទារឡើង និងបន្តនិរន្តរភាពតទៅមុខ។
លោក លី សារី បន្តថា ដើម្បីឱ្យទិវានេះប្រព្រឹត្តិទៅដោយរលូន និងទទួលបានជោគជ័យ ក្រុមការងារទាំងអស់ ត្រូវរៀបចំសន្តិសុខសណ្ដាប់ធ្នាប់ឱ្យបានល្អ ដើម្បីបង្កភាពសប្បាយរីករាយជូនប្រជាពលរដ្ឋ សម្រួលចរាចរកុំឱ្យកកស្ទះ ការកម្សាន្តប្រកបដោយភាពថ្លៃថ្នូរ និងសប្បាយរីករាយទាំងអស់គ្នា។ ជាមួយនោះ ត្រូវសម្អាតបរិស្ថាន សណ្តាប់ធ្នាប់ និងជួយសម្រួលចរាចរណ៍នៅទីតាំងប្រារព្ធពិធី។
ព័ត៌មានជាតិ ថ្មីៗ
លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្ត បានឱ្យដឹងថា ទិវាវប្បធម៌ជាតិ ៣មីនា ផ្តោតសំខាន់លើការបន្តលើកកម្ពស់ស្មារតី ប្រជាជន មហាជន ពិសេសយុវជន ដែលជាអ្នកបន្តវេនឱ្យកាន់តែមានការយល់ដឹងពីតម្លៃពិតនៃពហុវប្បធម៌ ចេះរួមរស់ជាមួយគ្នាប្រកបដោយសុខដុមរមនា គ្មានការរើសអើង គ្មានការប្រកាន់ពូជសាសន៍ ដែលជាមូលដ្ឋានគ្រឹះនៃសេចក្តីស្រឡាញ់ គោរពដឹងគុណ បុព្វការីជន និងបង្កើននូវសាមគ្គីធម៌ គុណធម៌ និងការអភិវឌ្ឍ។ សម្រាប់ឆ្នាំ២០២៥នេះដែរ ទិវាវប្បធម៌ជាតិ នឹងមានកម្មជាច្រើន ដូចជាការដាក់តាំងពិព័រណ៍ខ្លែងឯកខ្មែរជូនសិស្សានុសិស្ស និងមហាជនទស្សនា សិក្សាស្វែងយល់, ការគូររូប និងគំនូរផាត់ពណ៌, សិល្បៈកាច់ផ្កាដោយប្រើក្រណាត់, ការប្រគំតន្ត្រីខ្មែរបុរាណកំដរកម្មវិធី និងរាំកម្សាន្ត ដូចជាចង្វាក់ប្រពៃណី ល្ខោនខោលរឿងរាមកេរ្តិ៍ ល្ខោនបាសាក់ និងមានស្តង់តាំងពិព័រណ៍ជាច្រើន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
