មន្ត្រីជាន់ខ្ពស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជំរុញដល់ប្រតិបត្តិករ អាជ្ញាធរ មន្ទីរអង្គភាព ក្រសួងស្ថាប័នពាក់ព័ន្ធ រួមគ្នាពន្លឿនការងារ ធ្វើយ៉ាងណាឱ្យប្រជាពលរដ្ឋទទួលបានទឹកស្អាតប្រើប្រាស់ទាំងអស់គ្នា ទាំងនៅទីក្រុង ទីប្រជុំជន និងជនបទ ដោយការសហការគាំទ្រគ្នាទៅវិញទៅមក សាមគ្គីគ្នាជាធ្លុងមួយ បង្កើតជាបរិយាកាសសុខដុមនីយកម្មនៅក្នុងមូលដ្ឋានរបស់ខ្លួន ក្នុងនោះទាំងអ្នកប្រើប្រាស់ ទាំងអ្នកផ្គត់ផ្គង់ ត្រូវមានផ្នត់គំនិតមួយថា ទឹកស្អាតជារបស់រួម ជាបញ្ហារួម។
ក្នុងសិក្ខាសាលាផ្សព្វផ្សាយច្បាប់ ស្តីពីការគ្រប់គ្រងទឹកស្អាត ជូនដល់រដ្ឋបាលថ្នាក់ក្រោមជាតិ នៅខេត្តសៀមរាប នាថ្ងៃទី១៣ ខែមីនា ឆ្នាំ២០២៥នេះ ឯកឧត្តម អ៊ុ សុថា រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រី បានដាក់ចេញយុទ្ធសាស្ត្របញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព និងបានកំណត់វិស័យអាទិភាពគន្លឹះចំនួន៥ គឺ “មនុស្ស ផ្លូវ ទឹក ភ្លើង និងបច្ចេកវិទ្យា” ដែលក្នុងនោះ “ទឹក” គឺត្រូវបានរំកិលមកជាអាទិភាពលំដាប់ទី៣ ដោយផ្តោតលើរបៀបវារៈ “ធានាប្រសិទ្ធភាពសមិទ្ធកម្ម” និងអភិក្រម “ជីវភាពនៃប្រព័ន្ធតួអង្គតែមួយ”។
ឯកឧត្តម អ៊ុ សុថា បានបញ្ជាក់ទៀតថា បច្ចុប្បន្នរាជរដ្ឋាភិបាលកម្ពុជា ក៏បាននិងកំពុងយកចិត្តទុកដាក់ជំរុញឱ្យសម្រេចគោលដៅអភិវឌ្ឍប្រកបដោយចីរភាព ឆ្នាំ២០១៦-២០៣០ ដែលកំណត់ថា ប្រជាពលរដ្ឋត្រូវមានទឹកស្អាតប្រើទាំងអស់គ្នា នៅត្រឹមឆ្នាំ២០៣០។ ដូចដែល សម្តេចតេជោ ហ៊ុន សែន អតីតនាយករដ្ឋមន្ត្រីកាលឆ្នាំ២០២១កន្លងទៅ សម្តេចបានមានប្រសាសន៍គាំទ្រ និងបានប្រកាសដាក់ឱ្យប្រើប្រាស់ពាក្យ ស្លោកមួយឃ្លាខ្លីគឺ “ទឹកស្អាតសម្រាប់ទាំងអស់គ្នា” ហើយសម្តេចតេជោ សង្កត់ធ្ងន់ថា ការកំណត់ទិសដៅនេះ ធ្វើឱ្យយើងទាំងអស់គ្នាគិតគូរដោយហ្មត់ចត់បំផុត ទៅលើសកម្មភាពទាំងឡាយ ដើម្បីផ្តល់ទឹកស្អាតសម្រាប់ទាំងអស់គ្នា។
លោក ង៉ូវ សេងកាក់ អភិបាលរងខេត្តសៀមរាប បានឱ្យដឹងថា សម្រាប់ខេត្តសៀមរាប ប្រតិបត្តិករវិស័យឯកជនដែលធ្វើអាជីវកម្មទឹកស្អាតមានចំនួន ១០មូលដ្ឋាន ក្នុងស្រុកជីក្រែង ស្រុកក្រឡាញ់ ស្រុកពួក ស្រុកសូទ្រនិគម ស្រុកអង្គរជុំ ស្រុកវ៉ារិន និងស្រុកស្រីស្នំ និងមានប្រតិបត្តិករដែលទទួលប្រកាសអនុញ្ញាតធ្វើអាជីវកម្ម តែមិនបានអនុវត្ត ៤ស្រុក ដូចជា៖ ១.ប្រតិបត្តិករទឹកស្អាត ឃុំស្វាយលើ និងឃុំបឹងមាលា ស្រុកស្វាយលើ, ២.នៅឃុំស្វាយស និងឃុំប្រាសាទ ស្រុកវ៉ារិន, ៣.ឃុំល្វាក្រាំង និងឃុំវ៉ារិន ស្រុកវ៉ារិន និង៤.នៅឃុំល្វែងប្ញស្សី ស្រុកជីជ្រែង។ ដោយទ្បែកចំពោះសិប្បកម្មដែលបានស្នើសុំស្តង់ដារកន្លងមកមាន ១១មូលដ្ឋានសិប្បកម្ម និងសហគ្រាស។ ជាទិសដៅ រដ្ឋបាលខេត្តនឹងជំរុញអាជីវករទឹកស្អាតទាំងអស់ ដែលបាននឹងកំពុងធ្វើអាជីវកម្មផ្តល់ទិន្នន័យរបាយការណ៍ទឹកស្អាត ជំរុញការត្រួតពិនិត្យគុណភាពទឹកជាប្រចាំ និងស្វែងរកដៃគូវិនិយោគនៅតាមភូមិ ឃុំសង្កាត់ ស្រុកក្រុង ក្នុងខេត្តសៀមរាបទាំងមូល៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
