ដោយមានការណែនាំពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល កាលពីថ្ងៃទី១១ ខែមីនា ឆ្នាំ២០២៥កន្លងទៅនេះ ឯកឧត្តម វេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល បានចុះពិនិត្យទីតាំងមន្ទីរពេទ្យបង្អែកសូទ្រនិគម ខេត្តសៀមរាប ដែលជាមន្ទីរពេទ្យបង្អែកកម្រិត២ ដើម្បីពិនិត្យផ្ដល់យោបល់ លើការរៀបចំកែលម្អហេដ្ឋារចនាសម្ព័ន្ធផ្នែកសង្រ្គោះបន្ទាន់ ប្រពោធនកម្ម និងបន្ទប់វះកាត់ ធ្វើយ៉ាងណាបង្កើនប្រសិទ្ធភាពផ្ដល់សេវាជូនប្រជាពលរដ្ឋ។
ក្នុងឱកាសចុះពិនិត្យនោះដែរ ឯកឧត្តម វេជ្ជបណ្ឌិត ង៉ូវ កាង បានជំរុញ និងណែនាំដល់ថ្នាក់ដឹកនាំមន្ទីរពេទ្យ ត្រូវយកចិត្តទុកដាក់ពន្លឿន ពិនិត្យទៅលើទីតាំងជាក់ស្ដែង ដើម្បីធ្វើការរៀបចំកែលម្អហេដ្ឋារចនាសម្ព័ន្ធលើផ្នែកសង្រ្គោះបន្ទាន់ ប្រពោធនកម្ម និងបន្ទប់វះកាត់ ជាពិសេសសម្ភារបរិក្ខារ និងការគុណភាពនៃការផ្ដល់សេវា ធ្វើយ៉ាងណាបង្កើនរំហូរអ្នកមកទទួលសេវានៅក្នុងមន្ទីរពេទ្យរបស់ខ្លួនឱ្យកាន់តែល្អប្រសើរឡើងបន្ថែមទៀត។
សូមបញ្ជាក់ថា បន្ទាប់ពីទទួលបានគោលការណ៍ឯកភាពពី សម្ដេចធិបតី ហ៊ុន ម៉ាណែត នាយករដ្ឋមន្រ្តី ឯកឧត្តម រដ្ឋមន្ត្រីក្រសួងសុខាភិបាល បានចាត់តាំងថ្នាក់ដឹកនាំក្រសួងសុខាភិបាល ក្នុងការពិនិត្យវាយតម្លៃ រៀបចំពង្រឹងសមត្ថភាពផ្នែកសង្គ្រោះបន្ទាន់ និងផ្នែកវះកាត់ នៅមន្ទីរពេទ្យបង្អែកកម្រិត១ និងកម្រិត២ បានចំនួន៦១មន្ទីរពេទ្យបង្អែក។ មន្ទីរពេទ្យបង្អែកទាំងនេះនឹងទទួលបានការរៀបចំកែលម្អពង្រឹងសមត្ថភាពផ្នែកសង្រ្គោះបន្ទាន់ ប្រពោធនកម្ម និងបន្ទប់វះកាត់ ឱ្យកាន់តែមានសមត្ថភាព ប្រសិទ្ធភាព និងគុណភាព នៃការផ្ដល់សេវាកាន់តែល្អប្រសើរឡើងថែមទៀត៕
ប្រភព៖ ក្រសួងសុខាភិបាល
កែសម្រួល៖ លោក អ៊ុន ណារាជ្យ
