នៅព្រឹកថ្ងៃទី១៤ ខែមីនា ឆ្នាំ២០២៥នេះ សមាគមក្រុមប្រឹក្សាក្រុងស្រុក ឃុំសង្កាត់ នៃខេត្តសៀមរាប បានបើកមហាសន្និបាតអាណត្ដិទី៤ ដើម្បីធ្វើការពិនិត្យកែសម្រួល និងអនុម័តសេចក្តីព្រាងលក្ខន្តិកៈ និងបទបញ្ជាផ្ទៃក្នុងរបស់សមាគម និងដំណើរការបោះឆ្នោតជ្រើសរើសអង្គអភិបាលកិច្ចរបស់សមាគមសម្រាប់អាណត្តិទី៤ ដែលពិធីនេះធ្វើឡើងក្រោមអធិបតីភាព ឯកឧត្តម តោ គឹមស៊ាន សមាជិកក្រុមប្រឹក្សាខេត្ដ លោក ឌី រ៉ាដូ អភិបាលរងខេត្ដ និងលោក គៀង សេងគី អនុប្រធានអចិន្ត្រៃយ៍សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន នៃព្រះរាជាណាចក្រកម្ពុជា ដោយមានការចូលរួមពី លោកលោកស្រីសមាជិកក្រុមប្រឹក្សាក្រុងស្រុក និងឃុំសង្កាត់ជាច្រើនរូប។
លោក សាម ឡន ប្រធានសមាគមក្រុមប្រឹក្សាថ្នាក់មូលដ្ឋានខេត្តសៀមរាប បានឱ្យដឹងថា សមាគមក្រុមប្រឹក្សាថ្នាក់មូលដ្ឋានខេត្តសៀមរាប ត្រូវបានទទួលស្គាល់ដោយក្រសួងមហាផ្ទៃ ដោយមានក្រុមប្រឹក្សាក្រុងស្រុក ឃុំសង្កាត់ជាសមាជិក បង្កើតឡើងដើម្បីលើកកម្ពស់ឋានៈ និងអភិវឌ្ឍសមត្ថភាពដល់ក្រុមប្រឹក្សាក្រុងស្រុក ឃុំសង្កាត់ ការពារប្រយោជន៍ និងគុណប្រយោជន៍ស្របច្បាប់របស់សមាជិក និងការកសាងភាពជាដៃគូជាមួយស្ថាប័នពាក់ព័ន្ធ ដើម្បីអភិវឌ្ឍមូលដ្ឋាន ពង្រឹងនីតិរដ្ឋ និងជំរុញលទ្ធិប្រជាធិបតេយ្យនៅកម្ពុជា។
ព័ត៌មានជាតិ ថ្មីៗ
ឯកឧត្តម គៀង សេងគី អនុប្រធានអចិន្ត្រៃយ៍សម្ព័ន្ធភាពជាតិក្រុមប្រឹក្សាថ្នាក់មូលដ្ឋាន បានបញ្ជាក់ថា សម្រាប់អាណត្តិទី៤ របស់សម្ព័ន្ធភាពជាតិនាពេលខាងមុខនេះ សម្ព័ន្ធភាពជាតិកំពុងតែរៀបចំផែនការយុទ្ធសាស្រ្តរយៈពេលប្រាំឆ្នាំ ២០២៥-២០២៩ ដោយផ្តោតលើយុទ្ធសាស្រ្តជាអាទិភាពចំនួន៩ រួមមានការអភិវឌ្ឍស្ថាប័ន ចីរភាពហិរញ្ញវត្ថុ រដ្ឋបាលឌីជីថល ការពង្រឹង និងពង្រីកភាពជាដៃគូ ការអភិវឌ្ឍសមត្ថភាពសមាជិកក្រុមប្រឹក្សា ការតស៊ូមតិ ការចូលរួមអនុវត្តគោលដៅអភិវឌ្ឍន៍ប្រកបដោយចីរភាព ការអភិវឌ្ឍសេដ្ឋកិច្ចមូលដ្ឋានដែលផ្សារភ្ជាប់នឹងការប្រែប្រួលអាកាសធាតុ ការកសាងភាពធន់ និងសមភាពយេនឌ័រ ការលើកកម្ពស់ស្រ្តីនៅក្នុងវិស័យនយោបាយនៅមូលដ្ឋាន និងបរិយាបន្នសង្គម។
ឯកឧត្ដម តោ គឹមស៊ាន សមាជិកក្រុមប្រឹក្សាខេត្ដ មានប្រសាសន៍ថា មហាសន្និបាតនាពេលនេះ គឺជាឱកាសដែលសមាគមបង្ហាញនូវសមិទ្ធផលដែលខ្លួនសម្រេចបាន ក្នុងការលើកកម្ពស់សមត្ថភាព និងការពារផលប្រយោជន៍ស្របច្បាប់របស់ក្រុមប្រឹក្សាក្រុងក្រុមប្រឹក្សាស្រុក ក្រុមប្រឹក្សាឃុំ ក្រុមប្រឹក្សាសង្កាត់ និងសមាជិកក្រុមប្រឹក្សាក្រុងស្រុក ឃុំសង្កាត់ នៅក្នុងខេត្តសៀមរាប។ ឯកឧត្ដម ក៏សូមថ្លែងនូវការកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែង និងការសាមគ្គីគ្នារបស់ថ្នាក់ដឹកនាំសមាគមក្រុមប្រឹក្សាក្រុងស្រុក ឃុំសង្កាត់ ខេត្តសៀមរាប។ ជាក់ស្តែងក្នុងរយៈពេល៥ឆ្នាំកន្លងមក ដោយនាំមកនូវសមិទ្ធផលជាច្រើន ស្របតាមគោលបំណង និងទិសដៅរបស់សមាគម ក្នុងការលើកកម្ពស់ឋានៈ និងសមត្ថភាពរបស់ក្រុមប្រឹក្សាក្រុងស្រុក ឃុំសង្កាត់៕
អត្ថបទ និងរូបភាព៖ លោក ឈិត សាវី, ធន់ ពូថេ
កែសម្រួល៖ លោក អ៊ុន ណារាជ្យ
