នៅព្រឹកថ្ងៃទី១៤ ខែមីនា ឆ្នាំ២០២៥នេះ ឯកឧត្តម ទេសរដ្ឋមន្រ្តី គន់ គីម អនុប្រធានអចិន្ត្រៃយ៍ និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញជួបសំណេះសំណាលជាមួយសមាជិកសមាគមអតីតយុទ្ធជនកម្ពុជាខេត្តសៀមរាប និងបញ្ចុះបឋមសិលាសាងសង់អគារស្នាក់ការថ្មីសមាគមខេត្ត ក្នុងសង្កាត់ស្រង៉ែ ក្រុងសៀមរាប ដោយពិធីនេះមានការចូលរួមពី ឯកឧត្តម អ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប ឯកឧត្តម ប្រាក់ សោភ័ណ អភិបាលខេត្តសៀមរាប រួមនឹងវត្តមានថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងប្រដាប់អាវុធ និងសមាជិកសមាជិកាសមាគមជាច្រើនរូបទៀត។
មានប្រសាសន៍ក្នុងឱកាសនោះ ឯកឧត្តម ទេសរដ្ឋមន្រ្តី គន់ គីម បានថ្លែងកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងកន្លងមករបស់ប្រធានសមាគមអតីតយុទ្ធជនកម្ពុជាខេត្ត ក្រុងស្រុកទូទាំងខេត្តសៀមរាប។ ជួសមុខឱ្យសម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងសម្តេចធិបតី នាយករដ្ឋមន្ត្រីកម្ពុជា ក៏ដូចជាថ្នាក់ដឹកនាំគ្រប់ជាន់ថ្នាក់ លោកមិនដែលភ្លេចនូវគុណូបការៈ ដែលបងប្អូនអតីតយុទ្ធជនយើងលះបង់សាច់ស្រស់ ឈាមស្រស់ ក្នុងបុព្វហេតុការពារជាតិមាតុភូមិរហូតទទួលបានសុខសន្តិភាព និងការអភិវឌ្ឍគ្រប់វិស័យមកដល់សព្វថ្ងៃនេះ។
ព័ត៌មានជាតិ ថ្មីៗ
ឯកឧត្តម ទេសរដ្ឋមន្ត្រី ក៏បានថ្លែងណែនាំដល់ថ្នាក់ដឹកនាំសមាគមអតីតយុទ្ធជនកម្ពុជាខេត្តនិងនៅតាមក្រុងស្រុក ត្រូវបង្កើនការយកចិត្តទុកដាក់ចំពោះអតីតយុទ្ធជនដែលខ្វះខាត យុទ្ធជនជួបការលំបាក ឬបញ្ហានានាហើយត្រូវឆ្លើយតបដោះស្រាយឱ្យបានទាន់ពេលវេលាជូនពួកគេ ជាពិសេសសម្រាប់អតីតយុទ្ធជនអត់ទីលំនៅ អត់ដីសម្រាប់បង្កបង្កើនផលជាដើម ត្រូវស្រង់ទិន្នន័យ ហើយរៀបចំសង់ផ្ទះ និងបែងចែកដីសម្បទានសង្គមកិច្ចជូន។ ឯកឧត្តម ក៏បានផ្តាំផ្ញើដល់ប្រធានប៉ុស្តិ៍រដ្ឋបាល ជាប្រធានសាខាឃុំសង្កាត់ ត្រូវបន្តធ្វើអំពើល្អ ហើយខិតខំសហការ និងបង្កគ្រប់លទ្ធភាពឱ្យបងប្អូនអតីតយុទ្ធជនយើង បានទទួលនូវសេវាសាធារណៈផ្សេងៗ ចំពោះមុខត្រូវចុះពិនិត្យ និងវាយតម្លៃអតីតយុទ្ធជន និងគ្រួសារ ដែលក្រីក្រទ័លលំបាកពិតប្រាកដ ហើយរៀបចំបញ្ជីត្រឹមត្រូវ បញ្ជូនមកអគ្គលេខាធិការដ្ឋាន ដើម្បីសរុបស្នើសុំសម្តេចប្រធាន ផ្តល់ជាផ្ទះស្នាក់នៅ ឬផ្តល់ដីសម្បទានសង្គមកិច្ចជូនពួកគាត់។
សូមជម្រាបថា អគារស្នាក់ការថ្មីនេះ មានទំហំបណ្តោយប្រវែង២២ម៉ែត្រ ទទឹង២៨ម៉ែត្រ កម្ពស់១ជាន់ប្រក់ដំបូលក្បើង ដែលសាងសង់លើផ្ទៃដីទំហំប្រមាណជិត៥ ០០០ម៉ែត្រការ៉េ ដែលជាអំណោយរបស់ឯកឧត្តម អ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប។ ក្នុងឱកាសនោះដែរ ថ្នាក់ដឹកនាំក៏បានផ្ដល់អំណោយដល់សមាជិកអតីតយុទ្ធជនកម្ពុជាខេត្តដែលបានចូលរួម ក្នុងម្នាក់ទទួលបាន៖ អង្ករ១បេតូច មី១កេស ត្រីខ១យួរ ទឹកសុទ្ធ១កេស និងថវិកា៥មុឺនរៀល៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
