នៅថ្ងៃទី១៩ ខែមីនា ឆ្នាំ២០២៥នេះ អគ្គលេខាធិការដ្ឋានក្រុមប្រឹក្សាសកម្មភាពជនពិការ បានសហការជាមួយរដ្ឋបាលខេត្តសៀមរាប មានការគាំទ្រពីកម្មវិធី ACCESS2 និង UNDP បានបើកវគ្គបណ្តុះបណ្តាលស្តីពីហេដ្ឋារចនាសម្ព័ន្ធរូបវន្តបង្កលក្ខណៈងាយស្រួលសម្រាប់ជនមានពិការភាព ជូនសមាជិកសមាជិកាក្រុមប្រឹក្សាសកម្មភាពជនពិការខេត្ត ក្រោមអធិបតីភាព ឯកឧត្តម អ៊ុង សម្បត្តិ អគ្គលេខាធិការនៃអគ្គលេខាធិការដ្ឋានក្រុមប្រឹក្សាសកម្មភាពជនពិការ និង លោក នាក់ ណេរ៉ុន អភិបាលរងខេត្ត ដោយមានការចូលរួមពីសមាជិកសមាជិកាក្រុមប្រឹក្សាសកម្មភាពជនពិការខេត្តសៀមរាបជាច្រើនរូប។
លោក គង់ សំអឿន ប្រធានមន្ទីរសង្គម កិច្ចអតីតយុទ្ធជន និងយុវនីតិសម្បទាខេត្តសៀមរាប បានឱ្យដឹងថា ក្នុងខេត្តសៀមរាប មានជនមានពិការភាព ១៨ ៦៧៧នាក់ ក្នុងនោះជនមានពិការភាព ៤ ២២៥នាក់មានបណ្ណសមធម៌។ ខេត្តសៀមរាប ជាខេត្តដែលទទួលបានលទ្ធផលល្អ ក្នុងការបញ្ជ្រាបច្បាប់កិច្ចការពារ និងលើកកម្ពស់សិទ្ធិជនពិការ បរិយាបន្នពិការភាព ការកំណត់អត្តសញ្ញាណកម្មតាមគំរូសង្គម និងសិទ្ធិជាមូលដ្ឋាន ការជ្រើសរើសជនពិការចូលបម្រើការងារ សេវាស្តារលទ្ធភាពពលកម្មកាយសម្បទា មូលនិធិជនពិការ មានការចូលរួមសហការពីអង្គការក្រៅរដ្ឋាភិបាល និងវិស័យឯកជនជាច្រើន។
លោក នាក់ ណេរ៉ុន អភិបាលរងខេត្ត មានប្រសាសន៍ថា ក្រុមប្រឹក្សាសកម្មភាពជនពិការខេត្ត បានរួមគ្នាអនុវត្តការងារយ៉ាងយកចិត្តទុកដាក់ ធ្វើយ៉ាងណាឱ្យជនមានពិការភាពទទួលបាននូវផាសុវត្ថុ។ ដោយកន្លងទៅ រាជរដ្ឋាភិបាល ក៏ជារដ្ឋបាលខេត្តសៀមរាប បានដាក់ចេញនូវបទដ្ឋានបច្ចេកទេសហេដ្ឋារចនាសម្ព័ន្ធរូបវន្តបង្កលក្ខណៈ ងាយស្រួលសម្រាប់ជនមានពិការភាព សំដៅជំរុញឱ្យមានការកែលម្អហេដ្ឋារចនាសម្ព័ន្ធរូបវន្តដែលមានស្រាប់ និងគ្រោងសាងសង់ថ្មីឱ្យមានការរៀបចំការបង្កលក្ខណៈងាយស្រួលសម្រាប់ជនមានពិការភាព ដូចជា ជម្រាល ចំណត បង្កាន់ដៃ ជណ្តើរទៅតាមតំបន់ប្រាសាទ ផ្លូវថ្មើរជើង បង្គន់អនាម័យជាដើម ដែលជនមានពិការភាពអាចប្រើប្រាស់បាន។
ឯកឧត្តម អ៊ុង សម្បត្តិ អគ្គលេខាធិការនៃអគ្គលេខាធិការដ្ឋានក្រុមប្រឹក្សាសកម្មភាពជនពិការ មានប្រសាសន៍ថា វគ្គបណ្តុះបណ្តាលថ្ងៃនេះ នឹងជួយជំរុញដល់គ្រប់អ្នកពាក់ព័ន្ធ បានសិក្សាស្វែងយល់បន្ថែម អំពីបទដ្ឋានបច្ចេកទេសហេដ្ឋារចនាសម្ព័ន្ធរូបវន្តបង្កលក្ខណៈងាយស្រួល សម្រាប់ជនមានពិការភាព ជូនសមាជិកក្រុមប្រឹក្សាកម្មភាពជនពិការខេត្តដើម្បីយកទៅអនុវត្តក្នុងស្ថាប័នរបស់ខ្លួន។ ជាពិសេសការលើកកម្ពស់ការគោរពសិទ្ធិ សេរីភាព លុបបំបាត់ការរើសអើង ជំរុញការអភិវឌ្ឍ និងធ្វើបរិយាបន្នជនមានពិការភាព ក្នុងការងារសេដ្ឋកិច្ច សង្គម វប្បធម៌ នយោបាយ ស្របតាមច្បាប់ស្តីពី កិច្ចការពារនិងលើកកម្ពស់សិទ្ធិ ជនពិការដែលជាគន្លឹះ ធានាការលើកកម្ពស់សិទ្ធិសេរីភាព សេចក្តីថ្លៃថ្នូរ និងគ្មានឧបសគ្គ។ ជំរុញការអនុវត្តផែនការយុទ្ធសាស្ត្រជាតិស្តីពីពិការភាពឆ្នាំ២០២៤-២០២៨និងបង្កើនការយល់ដឹងពីបរិយាបន្នពិការភាព៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
