រដ្ឋមន្ត្រីក្រសួងឧស្សាហកម្ម បានជំរុញឱ្យអ្នកសេដ្ឋកិច្ចក្រៅប្រព័ន្ធក្នុងខេត្តសៀមរាប ចូលរួមចុះឈ្មោះលើថ្នាលឌីជីថល ដើម្បីទទួលបានអត្ថប្រយោជន៍នានា ដែលរាជរដ្ឋាភិបាលបាននិងបន្តរៀបចំផ្តល់ជូន ដើម្បីអភិវឌ្ឍខ្លួនឯង ក៏ដូចជាសេដ្ឋកិច្ចសង្គម ដោយផ្អែកលើគោលការណ៍ស្ម័គ្រចិត្ត និងមិនមានការបង្ខិតបង្ខំ។
ក្នុងយុទ្ធនាការផ្សព្វផ្សាយ និងជំរុញការចុះឈ្មោះអ្នកសេដ្ឋកិច្ចក្រៅប្រព័ន្ធក្នុងខេត្តសៀមរាប នៅថ្ងៃទី១៩ ខែមីនា ឆ្នាំ២០២៥នេះ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានបញ្ជាក់ថា ថ្នាលឌីជីថលជាយន្តការផ្តល់អត្តសញ្ញាណផ្លូវការសម្រាប់អ្នកសេដ្ឋកិច្ចក្រៅប្រព័ន្ធ និងឆ្លុះបញ្ចាំងពីការខិតខំប្រឹងប្រែង និងយកចិត្តទុកដាក់របស់រាជរដ្ឋាភិបាល ក្នុងការជួយគាំទ្រ និងសម្រួលដល់ប្រជាពលរដ្ឋដែលកំពុងប្រកបមុខរបរ ធ្វើការងារ និងមានអាជីវកម្មក្នុងសេដ្ឋកិច្ចក្រៅប្រព័ន្ធ និងបង្កើតឱកាសឱ្យបងប្អូនអាចអភិវឌ្ឍអាជីវកម្ម និងពង្រីកមុខរបរ ធ្វើឱ្យកម្រិតជីវភាពបងប្អូនកាន់តែល្អប្រសើរ។
ឯកឧត្តម រដ្ឋមន្ត្រី បន្ថែមថា ការចុះឈ្មោះអ្នកសេដ្ឋកិច្ចក្រៅប្រព័ន្ធ នឹងសម្រួលឱ្យរាជរដ្ឋាភិបាលទទួលបានទិន្នន័យច្បាស់លាស់សម្រាប់ផ្តល់អន្តរាគមន៍ចំគោលដៅ និងទាន់ពេលវេលា ពិសេសក្នុងអំឡុងពេលមានវិបត្តិ ហើយក៏បើកផ្លូវសម្រាប់អ្នកសេដ្ឋកិច្ចក្រៅប្រព័ន្ធ មានលទ្ធភាពទទួលបានការគាំទ្រផ្សេងៗ ដូចជាការអភិវឌ្ឍជំនាញ ការទទួលបានសេវាហិរញ្ញវត្ថុផ្លូវការ និងសេវាគាំពារសង្គមជាដើម។
ឯកឧត្តម ប្រាក់ សោភ័ណ អភិបាលខេត្តសៀមរាប មានប្រសាសន៍ថា យុទ្ធនាការនេះ បានបង្ហាញអំពីការយកចិត្តទុក្ខដាក់ និងគិតគូររបស់រាជរដ្ឋាភិបាល ចំពោះសុខទុក្ខរបស់បងប្អូនប្រជាពលរដ្ឋ ដែលប្រកបរបរផ្នែកអាជីវកម្ម សេវាកម្ម និងអ្នកសេដ្ឋកិច្ចក្រៅប្រព័ន្ធ ដែលពុំបានចុះបញ្ជីពាណិជ្ជកម្មត្រឹមត្រូវ ដើម្បីឱ្យពួកគាត់ទទួលបាននូវអត្ថប្រយោជន៍នានាពីការចុះបញ្ជីនេះ។ ក្នុងន័យនេះ ឯកឧត្តម បានជំរុញដល់អ្នកសេដ្ឋកិច្ចក្រៅប្រព័ន្ធក្នុងភូមិសាស្ត្រខេត្តសៀមរាប ស្វែងយល់អំពីអត្ថប្រយោជន៍ និងចុះឈ្មោះចូលរួមឱ្យបានច្រើន ដើម្បីរាជរដ្ឋាភិបាលអាចកសាងមូលដ្ឋានទិន្នន័យសម្រាប់ផ្តល់ការគាំទ្រ និងអន្តរាគមន៍បានចំគោលដៅ។
សូមជម្រាបថា ការចុះឈ្មោះលើថ្នាលឌីជីថល ធ្វើឡើងតាមរយៈកម្មវិធីទូរសព្ទដៃ (CAM-IE app) វិបផតថល និងតាមរយៈសាខានៃភ្នាក់ងារចុះឈ្មោះនៅទូទាំងប្រទេស ដោយគិតត្រឹមថ្ងៃ១៧ ខែមីនានេះ ថ្នាលចុះឈ្មោះអ្នកសេដ្ឋកិច្ចក្រៅប្រព័ន្ធទទួលសំណើចុះឈ្មោះចំនួន ៣៣ ៨០៤សំណើ ក្នុងនោះមានកម្មករនិយោជិត ១.៨៥៥នាក់, សហគ្រាសធុនមីក្រូ ១ ១៦៩សហគ្រាស និងបុគ្គលស្វ័យនិយោជន៍ ៣០ ៧៨០នាក់ ខណៈខេត្តសៀមរាប មានការស្នើសុំចុះឈ្មោះ ១ ៤៦៦សំណើ៕
អត្ថបទ និងរូបភាព៖ លោក យូ វង្ស, ធន់ ពូថេ
កែសម្រួល៖ លោក អ៊ុន ណារាជ្យ
