ការសិក្សាលើគម្រោងរៀបចំប្រព័ន្ធដឹកជញ្ជូនសាធារណៈតាមរថយន្តអគ្គិសនី ក្នុងក្រុងសៀមរាប ត្រូវបានបិទបញ្ចប់បន្ទាប់ពីប្រើពេលសិក្សាអស់១០ខែ ក្រោមគំនិតផ្តួចផ្តើមពីសំណាក់ អតីតអភិបាលខេត្តសៀមរាប ឯកឧត្តម ទៀ សីហា និងបន្តគាំទ្រដោយ ឯកឧត្តម ប្រាក់ សោភ័ណ អភិបាលខេត្តសៀមរាបបច្ចុប្បន្ន ដោយការសិក្សាលើគម្រោងនេះ បានបញ្ចប់ជាមួយលទ្ធផលគួរជាទីពេញចិត្ត។
ថ្លែងក្នុងសិក្ខាសាលាបិទបញ្ចប់គម្រោងសិក្សា នៅព្រឹកថ្ងៃទី២០ ខែមីនា ឆ្នាំ២០២៥នេះ លោក លី សារី អភិបាលរងខេត្តសៀមរាប បានបញ្ជាក់ថា ខេត្តសៀមរាប ជាប៉ូលទេសចរណ៍ដ៏សំខាន់ ដូច្នេះការអភិវឌ្ឍគម្រោងដែលមានមេត្រីភាពជាមួយបរិស្ថានបៃតង ជាចំណែកមួយដ៏សំខាន់ដែលអាចបានទាំងការទាក់ទាញទេសចរ និងការជួយដល់បរិស្ថាន ក៏ដូចជាការជួយទៅដល់ការកាត់បន្ថយការចំណាយសម្រាប់ការធ្វើដំណើរប្រចាំថ្ងៃរបស់ពលរដ្ឋផងដែរ។
លោកអភិបាលរងខេត្ត បន្តថា បច្ចុប្បន្ននេះខេត្តសៀមរាប ទទួលបានគម្រោងអភិវឌ្ឍជាច្រើន ដូចជាគម្រោងទីក្រុងសៀមរាបឆ្លាតវៃ និងគម្រោងផ្លូវពីព្រលានយន្តហោះអន្តរជាតិសៀមរាប មកកាន់ក្រុងសៀមរាបជាដើម ដែលគម្រោងទាំងអស់នេះសុទ្ធតែមានភាពប្រទាក់ក្រឡាគ្នា។ ដូច្នេះលោកចង់ឱ្យគម្រោងរថយន្តអគ្គិសនីសាធារណៈនេះ មានលក្ខណៈបន្ស៊ីគ្នាជាមួយគម្រោងផ្សេងៗទៀតផងដែរ។
លោក គង់ សុផល អគ្គនាយករងនៃអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានលើកឡើងថា ការរៀបចំមធ្យោបាយដឹកជញ្ជូនសាធារណៈ ជាអាទិភាពមួយរបស់រាជរដ្ឋាភិបាល ក្នុងកាត់បន្ថយការបំភាយឧស្ម័នផ្ទះកញ្ចក់ ក៏ដូចជាការលើកកម្ពស់គុណភាពខ្យល់។ ចំពោះការរៀបចំនេះ ក្រសួងសាធារណៈការ និងដឹកជញ្ជូន តែងបានផ្តល់អាទិភាពមកឱ្យក្រុងសៀមរាបជាចម្បង ព្រោះថាប្រសិនបើយើងរៀបចុះក្រុងសៀមរាប ឱ្យមានបរិស្ថានល្អ មានមធ្យោបាយដឹកជញ្ជូនសមស្របប្រកបដោយភាតរបរិស្ថាននោះ ទីក្រុងមួយនេះ ក៏ក្លាយជាគោលដៅសម្រាប់អ្នកទេសចរថែមទៀតផង៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
