អាជ្ញាធរខេត្តសៀមរាប បានណែនាំដល់គ្រប់អ្នកពាក់ព័ន្ធទាំងអស់ក្នុងខេត្ត ជំរុញការផ្សព្វផ្សាយដល់អ្នកសេដ្ឋកិច្ចក្រៅប្រព័ន្ធក្នុងខេត្ត ចូលរួមចុះឈ្មោះលើថ្នាលឌីជីថល ដើម្បីទទួលបានអត្ថប្រយោជន៍នានា ដែលរាជរដ្ឋាភិបាលបាននិងបន្តរៀបចំផ្តល់ជូន ដើម្បីអភិវឌ្ឍខ្លួនឯង ក៏ដូចជាសេដ្ឋកិច្ចសង្គម ដោយផ្អែកលើគោលការណ៍ស្ម័គ្រចិត្ត និងមិនមានការបង្ខិតបង្ខំ។
ក្នុងកិច្ចប្រជុំអនុគណៈកម្មាធិការជំរុញសេដ្ឋកិច្ចក្រៅប្រព័ន្ធខេត្តសៀមរាប និងពិនិត្យលើផែនការសកម្មភាពសម្រាប់អនុវត្តរបស់អនុគណៈកម្មាធិការ នៅរសៀលថ្ងៃទី២៤ ខែមីនា ឆ្នាំ២០២៥នេះ លោក ង៉ូវ សេងកាក់ អភិបាលរងខេត្ត បញ្ជាក់ថា រាជរដ្ឋាភិបាលកម្ពុជា សម្រេចដាក់ចេញនូវយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ ជាមួយនឹងចក្ខុវិស័យអភិវឌ្ឍសេដ្ឋកិច្ចក្រៅប្រព័ន្ធឱ្យរីកធំធាត់ និងមានលទ្ធភាពឈានចូលក្នុងប្រព័ន្ធហើយក្លាយទៅជាកម្លាំងចលករដ៏សំខាន់ក្នុងការកែលម្អជីវភាពរបស់ប្រជាជន និងអាចរួមចំណែកជាអតិបរមាក្នុងការឈានទៅសម្រេចបាននូវការអភិវឌ្ឍប្រកបដោយចីរភាព បរិយាបន្ន ភាពរឹងមាំ និងភាពធន់ទៅនឹងវិបត្តិ។
លោកអភិបាលរងខេត្ត បន្ថែមថា ដើម្បីគាំទ្រជំរុញការអនុវត្តយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ ខេត្តសៀមរាបបានបង្កើតអនុគណៈកម្មាធិការជំរុញសេដ្ឋកិច្ចក្រៅប្រព័ន្ធ ដែលមានតួនាទី ភារកិច្ច សម្របសម្រួល និងផ្តល់ការគាំទ្ររាល់សកម្មភាពទាំងឡាយដែលពាក់ព័ន្ធ និងកិច្ចដំណើរការសកម្មភាពស្របតាមយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ។ ក្នុងនោះលក្ខណៈនៃប្រជាជននៅក្នុងសេដ្ឋកិច្ចក្រៅប្រព័ន្ធ ពួកគេប្រកបអាជីវកម្ម មុខរបរ និង ការងារច្រើនក្នុងពេលតែមួយ ប្រកបអាជីវកម្មមុខរបរដែលមានលក្ខណៈគ្រួសារ ឬប្រកបការងារមិនជាប់លាប់ មានប្រាក់ចំណូលទាប និងមិនទៀងទាត់ មានជំនាញទាប មានតម្រូវការផ្នែកថែទាំសុខភាពខ្ពស់ ដូច្នេះជំរុញដល់គ្រប់អ្នកពាក់ព័ន្ធ យកចិត្តទុកដាក់លើការផ្សព្វផ្សាយឱ្យបានខ្លាំងពីការងារទាំងអស់នេះ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
