អាជ្ញាធរខេត្តសៀមរាប និងមន្ត្រីសង្គមស៊ីវិល បានចាត់ទុកថា ការចូលរួមគាំទ្ររបស់បុរស ចំពោះស្ត្រី ក្មេងស្រី គឺជាការ លើកកម្ពស់កិត្តិយស សិទ្ធិ សេដ្ឋកិច្ចគ្រួសារ សហគមន៍ និងសង្គមជាតិ និងថាបុរស និងស្ត្រីជាដៃគូអភិវឌ្ឍន៍ដែលមិនអាចខ្វះបាន។
ថ្លែងក្នុងពិធីអបអរសាទរខួបលើកទី១១៤ ទិវាអន្តរជាតិនារី ៨មីនា ឆ្នាំ២០២៥ នៅវិទ្យាល័យសម្តេចឪ ក្រុងសៀមរាប នារសៀលថ្ងៃទី២៥ ខែមីនា ឆ្នាំ២០២៥នេះ លោកស្រី ម៉ននី រង្សី អភិបាលរងខេត្តសៀមរាប បានលើកឡើងថា ការលើកកម្ពស់សិទ្ធិ តួនាទីរបស់ស្ត្រី និងក្មេងស្រី នៅក្នុងបរិវិវត្តកម្មឌីជីថល ពិតជាចាំបាច់ និងមានសារៈសំខាន់នៅក្នុងពន្លឿនកិច្ចអភិវឌ្ឍសេដ្ឋកិច្ច សង្គមប្រកបដោយបរិយាបន្ន។ ពិតណាស់ នៅពេលស្ត្រី និងក្មេងស្រី មានចំណេះដឹង និងមានសមត្ថភាពផ្នែកឌីជីថល អាចធ្វើឱ្យពួកគេបានចូលរួមដោយសកម្ម និងប្រកបដោយសុវត្ថិភាព នៅក្នុងសេដ្ឋកិច្ច និងសង្គម ឌីជីថល ដែលនេះបង្ហាញឱ្យឃើញថា ស្ត្រីពិតជាតួអង្គដ៏សំខាន់មិន ត្រឹមតែក្នុងគ្រួសារ សហគមន៍ និងស្ថាប័នការងារប៉ុណ្ណោះទេ ស្ត្រីក៏ជាអ្នកដឹកនាំ ឆ្លាតវាងវៃ ទន់ភ្លន់ និងរឹងមាំផងដែរ។ ដូច្នេះ ការចូលរួមគាំទ្ររបស់បុរស ជាប្តី ចំពោះស្ត្រី ក្មេងស្រី និងប្រពន្ធ គឺជាការលើកកម្ពស់កិត្តិយស សិទ្ធិ សេដ្ឋកិច្ចគ្រួសារ សហគមន៍ និងសង្គមជាតិយើង។
លោកស្រីអភិបាលរងខេត្ត មានប្រសាសន៍ថា បរិវត្តកម្មឌីជីថល និងផ្តល់នូវមធ្យោបាយថ្មីៗ សម្រាប់ស្ត្រី និងក្មេងស្រី ក្នុងការអនុវត្តសិទ្ធិ ការលើកកម្ពស់ ឋានៈ តួនាទី ការទទួលបានកាលានុវត្តភាព និងជម្រើសនានា នៅក្នុងការរស់នៅ និងលើកកម្ពស់ស្ថានភាព សេដ្ឋកិច្ច សង្គម របស់ខ្លួន និងគ្រួសារ រួមទាំងការទទួលបានលទ្ធភាពកាន់តែទូលំទូលាយ សម្រាប់ ការសិក្សាអប់រំ ការអភិវឌ្ឍជំនាញ វិជ្ជាជីវៈ ការប្រកបមុខរបរ ការងារ និងអាជីវកម្មជាដើម។
លោកស្រី បញ្ជាក់ថា រដ្ឋាភិបាលកម្ពុជា នីតិកាលទី៧ ក្រោមការដឹកនាំរបស់ សម្តេចធិបតី ហ៊ុន ម៉ាណែត បានបន្តកំណត់ការលើកកកម្ពស់សមភាពយេនឌ័រ និងការបង្កើនភាព អង់អាចរបស់ស្ត្រី និងក្មេងស្រី នៅគ្រប់វិស័យជាអាទិភាពក្នុងរបៀបវារៈគោលនយោបាយ និង យុទ្ធសាស្ត្របញ្ចកោណ ដំណាក់កាលទី១ តាមរយៈការពង្រឹងភាពជាពលរដ្ឋ ក្នុងសង្គមដែលមាន អារ្យធម៌ខ្ពស់ ប្រកបដោយសីលធម៌ សមធម៌ និងបរិយាបន្ន ដែលក្នុងនោះស្ត្រីគឺជាស្នូល។ ជាមួយនេះក៏ នឹងបន្តលើកកម្ពស់សមភាពយេនឌ័រ គឺតាមរយៈការបង្កើនការវិនិយោគលើសមភាពយេនឌ័រ និង បង្កើនភាពអង់អាចដល់ស្ត្រី និងក្មេងស្រីនៅក្នុងវិស័យសេដ្ឋកិច្ច អប់រំ សុខភាព និងការដឹកនាំ ដើម្បីទាញយកប្រយោជន៍ពីភាគលាភយេនឌ័រ បង្កលក្ខណៈអំណោយផលដល់ស្ត្រី ក្នុងការប្រើប្រាស់ សិទ្ធិ លើការសម្រេចចិត្តអំពីផែនការគ្រួសារ កាត់បន្ថយភាពងាយរងគ្រោះដោយអំពើហិង្សាទាក់ទង នឹងយេនឌ័រ លើស្ត្រីនិងក្មេងស្រី និងការលើកកម្ពស់នឹងការលើកកម្ពស់ទំនាក់ទំនងអន្តរជំនាន់។
លោកស្រី ឃឹម ពិសី នាយិកាអង្គការមជ្ឈមណ្ឌលធនធានស្ត្រី មានប្រសាសន៍ថា ឆ្នាំ២០២៥នេះ អង្គការសហប្រជាជាតិប្រារព្ធទិវាអន្តរជាតិនារី ដើម្បីអបអរសាទរខួបទី៣០ឆ្នាំ នៃសេចក្តីថ្លែងការទីក្រុងប៉េកាំង។ ប្រធានបទខាងលើគឺដើម្បីគូសបញ្ជាក់អំពីសារៈសំខាន់នៃការទទួលបាន និងអនុវត្តសិទ្ធិ ការលើកកម្ពស់សមភាព និងការពង្រឹងភាពអង់អាចចំពោះស្ត្រី និងក្មេងស្រីគ្រប់រូប នៅកម្ពុជា។ ប្រធានបទនេះក៏ផ្តោតសំខាន់ផងដែរលើការលើកកម្ពស់ផលជះជាផលវិជ្ជមាន និងទាញយក អត្ថប្រយោជន៍ពីភាគលាភយេនឌ័រជូនគ្រួសារ ពង្រឹងសហគមន៍ និងវឌ្ឍនភាពសង្គម ជំរុញកំណើន ការអភិវឌ្ឍសេដ្ឋកិច្ច និងលើកកម្ពស់សុខុមាលភាពសង្គម។យោងតាមរបាយការណ៍ឆ្នាំ២០២៤ របស់ក្រសួងអប់រំ យុវជន និងកីឡាបានបង្ហាញថា គម្លាតយេនឌ័រនៅក្នុងវិស័យអប់រំបានកាត់បន្ថយគួរឱ្យកត់សម្គាល់៕
អត្ថបទ និងរូបភាព៖ លោក យូ វង្ស, ជា ស្រស់
កែសម្រួល៖ លោក អ៊ុន ណារាជ្យ
