មន្ត្រីជំនាញនៃក្រសួងកសិកម្ម បានធ្វើការជំរុញដល់ក្រុមកសិករនៃសហគមន៍កសិកម្ម ក្នុងខេត្តសៀមរាប និងខេត្តកំពង់ធំ ត្រូវយកចិត្តទុកដាក់រួមគ្នាផ្តោតលើការផ្គត់ផ្គង់ធាតុចូល និងការប្រើប្រាស់សេវាកម្មរួម ដើម្បីកាត់បន្ថយថ្លៃដើផលិត។
ក្នុងសន្និបាតប្រចាំឆ្នាំ២០២៤ និងលើកទិសដៅបន្តឆ្នាំ២០២៥ សហភាពសហគមន៍កសិកម្មកំពង់ធំតេជៈមានជ័យ នៅព្រឹកថ្ងៃទី២៦ ខែមីនា ឆ្នាំ២០២៥នេះ លោក ខោល ម៉ានី ប្រធានការិយាល័យសាវនកម្មសហគមន៍កសិកម្ម នៃនាយកដ្ឋានអភិវឌ្ឍន៍សហគមន៍កសិកម្ម មានប្រសាសន៍ថា មហាសន្និបាតនាថ្ងៃនេះ ជាឱកាសសម្រាប់បងប្អូនមកពី ២៥សហគមន៍ នៃខេត្តសៀមរាប និងខេត្តកំពង់ធំ បង្ហាញពីលទ្ធផលការងារលើវិស័យកសិកម្ម ពិសេសភាពខ្លាំងក្នុងការអនុវត្តផលិតកម្មកសិកម្មតាមកិច្ចសន្យា ស្ដីពីការផលិត និងផ្គត់ផ្គង់ស្រូវសរីរាង្គ ដែលសម្រេចបានក្នុងឆ្នាំ២០២៤ និងលើកទិសដៅផែនការការងារសម្រាប់ឆ្នាំ២០២៥។ ជាមួយនេះ សូមអង្គសន្និបាតផ្តោតទៅលើការងារផ្គត់ផ្គង់ទៅកសិកម្ម និងការប្រើប្រាស់សេវាកម្មរួមគ្នា និងពាក់ព័ន្ធទៅនឹងធនធានចូលទៅកសិកម្ម។
លោក ខោល ម៉ានី បានបញ្ជាក់ថា សហភាពសហគមន៍ដែលរឹងមាំទៅបាន គឺអាស្រ័យដោយគណៈកម្មការគ្រប់គ្រង ទោះសហភាពសហគមន៍នៅមិនទាន់មានចំណូល និងចំណាយក៏ពិតមែន ក៏គណៈកម្មការបានធ្វើការគាំទ្រសហគមន៍ដែរ។ ម៉្យាងទៀគណៈកម្មការក៏ត្រូវពឹងផ្អែកទៅលើបទបញ្ជាផ្ទៃក្នុងរបស់ខ្លួន ដើម្បីធានាបាននូវគុណភាពនៃការដឹកនាំសហគមន៍។ ក្នុងនោះចំពោះមុខរបរសំខាន់ៗ របស់សហគមន៍កសិកម្ម មានមុខរបរឥណទានកសិកម្មខ្នាតតូច ទីផ្សារទិញលក់កសិផល ព្រមទាំងមុខរបរសេវាកម្មដូចជា ត្រាក់ទ័រភ្ជួរដី ម៉ាស៊ីនច្រូតស្រូវ ម៉ាស៊ីនបោកស្រូវ និងមុខរបរ កិនស្រូវ លក់អង្ករ កែច្នៃគ្រាប់ចន្ទី និងមុខរបរផ្គត់ផ្គង់ទឹកស្អាតដល់សមាជិកជាដើម។
ព័ត៌មានជាតិ ថ្មីៗ
លោកឧកញ៉ា ហង់ សុគន្ធ ប្រធានក្រុមប្រឹក្សាភិបាល នៃសហភាពសហគមន៍កសិកម្មកំពង់ធំតេជៈមានជ័យ បានឱ្យដឹងថា សហភាពសហគមន៍នេះ
មានការចូលរួមពីសហគមន៍ផលិតស្រូវ ២៥សហគមន៍ ហើយកិច្ចការនេះបានដំណើរការទៅបានល្អ ធ្វើឱ្យសហភាពសហគមន៍បានបោះជំហានទៅបង្កើតជាសហភាពស្រូវអង្ករកម្ពុជា។ នៅពេលបង្កើតបានហេដ្ឋារចនាសម្ព័ន្ធនោះហើយ ភាពចាំបាច់គឺត្រូវមានកិច្ចសន្យាផលិតកម្ម ដើម្បីភាពជោគជ័យលើវិស័យសហគមន៍ វិស័យកសិករ កត្តាសំខាន់នោះលើកិច្ចសន្យាផលិតកម្ម។
លោកបន្តថា បច្ចុប្បន្នរាជរដ្ឋាភិបាល និងក្រសួងកសិកម្ម បានបង្កើតសហគមន៍ទំនើប ព្រមទាំងឱ្យមានកសិកម្មឃុំសង្កាត់ ដើម្បីបង្កើនតម្លៃលក់ឱ្យបានខ្ពស់ ក្នុងការកាត់បន្ថយថ្លៃដើមទើបធ្វើឱ្យសហគមន៍មានការរីកចម្រើន។ ដើម្បីភាពជោគជ័យ យើងរួមគ្នាបង្កើតផលិតកម្មរួម ដែលមានការចូលរួមពីក្រុមហ៊ុនជាតិ អន្តរជាតិជាដៃគូ ព្រមទាំងរួមគ្នាធ្វើ រួមគ្នាគិត ធ្វើឱ្យសហគមន៍ដំណើរការទៅបានល្អប្រសើរ។ ក្នុងនោះ ក៏សូមឱ្យសហភាពសហគមន៍នៃខេត្តទាំង២ ត្រូវបន្តពង្រឹងស្មារតីសាមគ្គីភាព ឯកភាពផ្ទៃក្នុងរបស់ខ្លួនឱ្យបានល្អប្រសើរ ធ្វើយ៉ាងណាសម្រេចឱ្យបាននូវផែនការអាជីវកម្មរបស់ខ្លួនឱ្យរឹងមាំ ប្រកបដោយតម្លាភាព គណនេយ្យភាព និងមានការចូលរួមពីសមាជិកទាំងអស់ ដើម្បីរួមចំណែកក្នុងការដោះស្រាយបញ្ហាប្រឈមលើផលិតភាព គុណភាព សុវត្ថិភាព និងបញ្ហាទីផ្សារជាដើម៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
