នៅថ្ងៃទី២៧ ខែមីនា ឆ្នាំ២០២៥នេះ ក្រសួងកសិកម្ម សហការជាមួយរដ្ឋបាលខេត្តសៀមរាប ចុះផ្សព្វផ្សាយពាក់ព័ន្ធនឹងការងារជលផលដល់ប្រជានេសាទ ក្នុងសង្កាត់ចុងឃ្នៀស ក្រុងសៀមរាប ដោយមានការអញ្ជើញចូលរួមពីសំណាក់ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម និង លោក អុឹង គឹមលាង អភិបាលរងខេត្តសៀមរាប រួមនឹងវត្តមានថ្នាក់ដឹកនាំមន្ទីរអង្គភាព មន្ត្រីពាក់ព័ន្ធ អាជ្ញាធរមូលដ្ឋាន និងបងប្អូនប្រជានេសាទជាច្រើននាក់។
លោក អុឹង គឹមលាង អភិបាលខេត្ដ បានណែនាំដល់ប្រជានេសាទទាំងអស់ ត្រូវបញ្ឈប់ជាបន្ទាន់នូវការប្រើប្រាស់នូវឧបករណ៍ខុសច្បាប់ និងងាកមកប្រើប្រាស់ឧបករណ៍ដែលស្របតាមច្បាប់កំណត់ ដើម្បីកុំឱ្យខាតបង់ផលប្រយោជន៍ ក៏ដូចជារក្សាបាននូវធនធានធម្មជាតិនៅក្នុងតំបន់បឹងទន្លេសាបឱ្យបានគង់វង្សបន្ដទៅមុខ។ លោកថា អាជ្ញាធរមូលដ្ឋាន មិនចង់ឃើញប្រជាពលរដ្ឋរបស់ខ្លួនមានភាពលំបាកនោះទេ តែប្រសិនបើប្រជាពលរដ្ឋប្រព្រឹត្តិបទល្មើសខុសច្បាប់ នោះអាជ្ញាធរនឹងអនុវត្ដទៅតាមផ្លូវច្បាប់ដូចគ្នាដោយគ្មានការលើកលែងឡើយ។
ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម ទទួលបន្ទុកបទល្មើសនេសាទ មានប្រសាសន៍ថា តាមការសង្កេតកន្លងមក ការនេសាទមានភាពមិនប្រក្រតីច្រើន ហើយប្រជានេសាទមួយចំនួនមិនបានគិតគូរពីធនធានធម្មជាតិឡើយ។ ដូច្នេះសូមឱ្យអាជ្ញាធរមានសមត្ថកិច្ចទាំងអស់ ត្រូវកំណត់ឱ្យបាននូវមុខសញ្ញាជនល្មើសដែលប្រើប្រាស់ឧបករណ៍នេសាទខុសច្បាប់ ព្រោះសកម្មភាពនេះជាការបំផ្លាញធនធានធម្មជាតិមួយយ៉ាងធ្ងន់ធ្ងរ។
ព័ត៌មានជាតិ ថ្មីៗ
ឯកឧត្តម មានប្រសាសន៍បន្តថា រាជរដ្ឋាភិបាលនីតិកាលទី៧ ដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្រ្ដី បានដាក់ចេញនូវគោលនយោបាយជាតិ ដើម្បីអភិរក្សធនធានធម្មជាតិ ធនធានជលផលនៅក្នុងបឹងទន្លេសាប។ ក្រៅពីការទទួលខុសត្រូវពីស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ រួមទាំងកងកម្លាំងទាំងអស់ ក៏មានតួនាទីក្នុងការជួយសហការទប់ស្កាត់បទល្មើសនេសាទ បង្ក្រាបបទល្មើសជលផល និងជួយផ្សព្វផ្សាយពីច្បាប់ស្ដីពីជលផល ដើម្បីឱ្យប្រជានេសាទយើងទទួលបានផល និងជួយអភិរក្សធនធានធម្មជាតិសម្រាប់ទៅថ្ងៃអនាគតផងដែរ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
