មន្រ្ដីជាន់ខ្ពស់ក្រសួងកសិកម្ម បានអំពាវនាវដល់ប្រជានេសាទរួមគ្នាឈប់បំផ្លាញ ហើយងាកមកចូលរួមអភិរក្សធនធានជលផល និងធនធានធម្មជាតិទាំងអស់ ដើម្បីជាប្រយោជន៍នាពេលបច្ចុប្បន្ន និងសម្រាប់កូនចៅទៅថ្ងៃអនាគត។
ក្នុងឱកាសចុះផ្សព្វផ្សាយពាក់ព័ន្ធនឹងការងារជលផល ជូនដល់ប្រជានេសាទក្នុងឃុំកំពង់ភ្លុក ស្រុកប្រាសាទបាគង នៅរសៀលថ្ងៃទី២៧ ខែមីនា ឆ្នាំ២០២៥ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម មានប្រសាសន៍ថា ដើម្បីឱ្យមាននិរន្ដរភាពក្នុងការអភិរក្សបឹងទន្លេសាបសម្រាប់កូនចៅជំនាន់ក្រោយតទៅទៀតនោះ សូមសំណូមពររបស់បងប្អូនប្រជានេសាទ បញ្ឈប់ការប្រើប្រាស់នូវឧបករណ៍នេសាទខុសច្បាប់ដូចជាឧបករណ៍ឆក់ របាំងស្បៃមុងសម្រាប់ដាក់យកកូនត្រី ដែលធ្វើឱ្យបាត់បង់នូវពូជត្រី។
ឯកឧត្តម បញ្ជាក់ថា សម្រាប់ការចុះផ្សព្វផ្សាយពីច្បាប់ស្ដីពីជលផលនាពេលនេះ គឺដើម្បីជំរុញឱ្យបងប្អូនប្រជានេសាទចូលរួមអភិរក្សធនធានជលផលនៅក្នុងបឹងទន្លេសាប ដើម្បីរក្សាទុកដល់កូនចៅជំនាន់ក្រោយ។ ជំរុញធ្វើយ៉ាងណាការពារ និងថែរក្សាឱ្យទិន្នផលត្រី ឬទិន្នផលមច្ឆាជាតិនៅក្នុងបឹងទន្លេសាបមានសម្រាប់បងប្អូនប្រជានេសាទជារៀងរហូត។ ពិតណាស់តំបន់បឹងទន្លេសាប គឺជាបេះដូងនៃប្រទេសកម្ពុជា។
លោក ទា គឹមសុទ្ធ ប្រធានមន្ទីរកសិកម្មខេត្តសៀមរាប បានអំពាវនាវដល់ប្រជានេសាទទាំងអស់ដែលប្រើប្រាស់នូវឧបករណ៍ឆក់ សូមយកមកប្រគល់ជូនមន្រ្ដីអភិរក្សជលផល និងអភិរក្សធនធានធម្មជាតិ ដើម្បីកុំឱ្យមានបទល្មើសនេសាទខុសច្បាប់ ពីព្រោះបើសិនបងប្អូនប្រព្រឹត្តិបទលើ្មសនេសាទខុសច្បាប់ មន្រ្ដីជំនាញស្រាវជ្រាវរកឃើញ នោះអាជ្ញាធរនឹងអនុវត្ដទៅតាមផ្លូវច្បាប់ដូចគ្នាដោយគ្មានការលើកលែងឡើយ៕
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
