នៅថ្ងៃទី២៨ ខែមីនា ឆ្នាំ២០២៥នេះ ឯកឧត្ដម ខាន់ ខុន អនុរដ្ឋលេខាធិការក្រសួងធម្មការ និងសាសនា និង លោក លី សារី អភិបាលរងខេត្តសៀមរាប បានប្រគល់អណ្ដូងស្នប់អាហ្វ្រ៊ីដេសចំនួន ៥អណ្ដូង និងគ្រឿងឧបភោគបរិភោគមួយចំនួនទៀត ជូនដល់គ្រួសារប្រជាពលរដ្ឋក្រីក្រ ងាយរងគ្រោះរស់នៅក្នុងខេត្តសៀមរាប ដើម្បីជាប្រយោជន៍ដល់ប្រជាពលរដ្ឋក្នុងសហគមន៍ និងដោះស្រាយជីវភាព។
លោក លី សារី អភិបាលរងខេត្ត មានប្រសាសន៍ថា ទឹកគឺជាអាទិភាពមួយ ក្នុងចំណោមអាទិភាពគន្លឹះទាំង៥ រួមមាន មនុស្ស, ផ្លូវ, ទឹក, ភ្លើង និងបច្ចេកវិទ្យា ដែលរាជរដ្ឋាភិបាលកម្ពុជា បានកំណត់ក្នុងយុទ្ធសាស្ត្របញ្ចកោណ ដំណាក់កាលទី១។ ចំពោះសមិទ្ធផលអណ្ដូងទឹកថ្មីនេះ គឺជាប្រយោជន៍ដល់ប្រជាពលរដ្ឋក្នុងសហគមន៍នៅតាមទីជនបទ ដែលមិនទាន់មានទឹកស្អាតប្រើប្រាស់ហើយខ្វះខាតទឹកនៅរដូវប្រាំង។
ព័ត៌មានជាតិ ថ្មីៗ
ឯកឧត្តម ខាន់ ខុន អនុរដ្ឋលេខាធិការក្រសួងធម្មការ និងសាសនា មានប្រសាសន៍ដែរថា ការរួមសាមគ្គីភាព គឺជារឿងចាំបាច់សម្រាប់ប្រជាពលរដ្ឋក្នុងសហគមន៍ ការចេះជួយយកអាសាគ្នាជួយគ្នា គឺជារឿងសំខាន់សម្រាប់ការរស់នៅប្រកបដោយភាពរីកចម្រើន និងរស់នៅប្រកបដោយសុខដុម មិនប្រកាន់នៃនិន្នាការណាមួយនោះទេ ការចេះចូលរួមជួយគ្នា ដើម្បីឱ្យប្រទេសជាតិមានការរីកចម្រើន ពីព្រោះយើងគឺជាខ្មែរ ខ្មែរត្រូវតែមានការសាមគ្គីភាពជានិច្ច។
ឯកឧត្តមមានប្រសាសន៍បន្តថា សម្រាប់សមិទ្ធផលទាំងអស់ដែលបានផ្ដល់ជុនបងប្អូននាពេលនេះ គឺបានមកពីរការរួមសហការរបស់គ្រីស្តបរិស័ទក្នុងប្រទេស និងក្រៅប្រទេស បរិច្ចាគចូលរួមជាការអធិដ្ឋាន និងចូលជាថវិកា តាមរយៈឯកឧត្តម ក្នុងការចុះជួយដល់ប្រជាជនតាមសហគមន៍។ ក្នុងនោះអណ្ដូងទឹកទាំង៥ គឺផ្ដល់ជូនប្រជពលរដ្ឋរស់នៅភូមិតាត្រាវ ឃុំស្វាយចេក ភូមិគោកគ្រើល ឃុំលាងដៃ ស្រុកអង្គរធំ និងភូមិទី៣ សង្កាត់ចុងឃ្នៀស ក្រុងសៀមរាប។
សូមជម្រាបថា ជាមួយនឹងការប្រគល់អណ្តូងនេះដែរ ក្រុមការងារក៏បានចែកគ្រឿងឧបភោគបរិភោគជូនដល់ប្រជាពលរដ្ឋដែលមានជីវភាពខ្វះខាត និងងាយរងគ្រោះចំនួន ៦០គ្រួសារ ដោយមួយគ្រួសារទទួលបាន អង្ករ ១០គីឡូក្រាម មី១កេស ទឹកត្រី ១យួរ និងត្រីខកំប៉ុង ១យួរ និងបានចែកអំណោយជាសម្ភារៈសិក្សាជូនដល់កុមារចំនួន ៦៦នាក់ផងដែរ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
