អាជ្ញាធរខេត្តសៀមរាប បានស្នើដល់អ្នកពាក់ព័ន្ធវិស័យសុខាភិបាលក្នុងខេត្តទាំងអស់ បន្តចូលរួមចំណែកឧបត្ថម្ភគាំទ្រ និងបន្តកិច្ចខិតខំប្រឹងប្រែងឱ្យកាន់តែសកម្មបន្ថែមទៀត ដើម្បីឱ្យខេត្តរបស់យើងឈានទៅសម្រេចជោគជ័យ ស្របតាមចក្ខុវិស័យនៃការអភិវឌ្ឍវិស័យសុខាភិបាល និងជាមូលដ្ឋានគ្រឹះសម្រាប់គាំទ្រការពង្រីកវិសាលភាពឆ្ពោះទៅកាន់គោលដៅនៃការគ្របដណ្តប់សុខភាពជាសកលនៅកម្ពុជា ឆ្នាំ២០៣៥ ប្រកបដោយប្រសិទ្ធភាព។
ថ្លែងបិទសន្និបាតការងារសុខាភិបាលឆ្នាំ២០២៤ និងទិសដៅបន្តឆ្នាំ២០២៥ របស់មន្ទីរសុខាភិបាលនៃរដ្ឋបាលខេត្តសៀមរាប នៅថ្ងៃទី២៨ ខែមីនា ឆ្នាំ២០២៥នេះ លោក នាក់ ណេរ៉ុន អភិបាលរងខេត្តសៀមរាប បានណែនាំដល់មន្ត្រីសុខាភិបាលទាំងអស់ ផ្តល់យកចិត្តទុកដាក់ខ្ពស់ក្នុងការផ្តល់សេវាជូនប្រជាពលរដ្ឋប្រកបដោយប្រសិទ្ធភាព ស័ក្តិសិទ្ធភាព សមធម៌ និងការជឿជាក់។ ត្រូវបន្តយកចិត្តទុកដាក់លើផែនការគន្លឹះក្នុងវិស័យសុខាភិបាល ព្រោះការងារនេះ មិនអាស្រ័យលើមន្ត្រីសុខាភិបាលតែមួយតួអង្គប៉ុណ្ណោះទេ គឺទាមទារឱ្យគ្រប់គ្នា រួមទាំងប្រជាជនទាំងអស់ចូលរួម និងផ្តល់កិច្ចសហការ ដើម្បីអភិវឌ្ឍវិស័យសុខាភិបាលឱ្យកាត់តែប្រសើរឡើង។
លោកអភិបាលរងខេត្ត ក៏បានជំរុញដល់ថ្នាក់ដឹកនាំ និងមន្រ្តីនៃមន្ទីរសុខាភិបាល ត្រូវបន្តយកចិត្តទុកដាក់ និងបង្កើនជំរុញការងារថែទាំសុខភាពបឋមជូនប្រជាជននៅគ្រប់មូលដ្ឋានសុខាភិបាលសុខភាពសាធារណៈទាំងអស់។ បន្តខិតខំដោះស្រាយបញ្ហាប្រឈម ដែលនៅសេសសល់ក្នុងឆ្នាំ២០២៤ និងអនុវត្តន៍ឱ្យមានប្រសិទ្ធភាពទិសដៅឆ្នាំ២០២៥។ ពង្រឹងលើការងារអប់រំ លើកកម្ពស់សុខភាព ដែលជាអាទិភាពចម្បង តាមរយៈផ្សព្វផ្សាយនូវសារអប់រំសុខភាព ដើម្បីបន្តយុទ្ធនាការផ្លាស់ប្តូរឥរិយាបទនៃការរស់នៅជាប្រចាំរបស់ប្រជាជន ដូចជា “តិចអំបិល តិចខ្លាញ់ តិចស្ករ” និងកាត់បន្ថយការប្រើប្រាស់គ្រឿងស្រវឹង និងថ្នាំជក់ជាដើម។ បន្តពង្រឹងសមត្ថភាព ការអនុវត្ដន៍ក្រមសីលធម៌វិជ្ជាជីវៈរបស់មន្រ្តីរាជការសុខាភិបាល តាមរយៈអភិបាលកិច្ច ដើម្បីឱ្យការផ្តល់សេវាជូនប្រជាជនទាន់ពេលវេលា៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
