គណៈកម្មការលទ្ធកម្មឃុំក្រឡាញ់ ស្រុកក្រឡាញ់ ខេត្តសៀមរាប បានសម្រេចការដេញថ្លៃជាស្ថាពរ នូវគម្រោងជុលផ្លូវដីសក្រាលគ្រួសក្រហមប្រវែង១៧២៥ ម៉ែត្រ និងគម្រោងសាងសង់ផ្លូវបេតុងអាមេប្រវែង១៧៣ម៉ែត្រ ដោយការដេញថ្លៃនេះមានការចូលរួមពីមន្ត្រីបច្ចេកទេសសាលាខេត្ត អាជ្ញាធរស្រុក មន្ត្រីបច្ចេកទេសស្រុក គណៈកម្មការលទ្ធកម្មឃុំ រួមនិងតំណាងក្រុមហ៊ុនដេញថ្លៃ កាលពីថ្ងៃទី២៧ ខែមីនា ឆ្នាំ២០២៥។
គណៈកម្មការលទ្ធកម្មឃុំក្រឡាញ់ ស្រុកក្រឡាញ់ បានឱ្យដឹងថា ចំពោះគម្រោងមូលនិធិឃុំឆ្នាំ២០២៥នេះ ឃុំក្រឡាញ់ បានដាក់ដេញថ្លៃគម្រោងទី១ ជួសជុលផ្លូវដីសក្រាលក្រួសធម្មជាតិចំនួន០៣ខ្សែប្រវែង១,៧២៥ម៉ែត្រ ទទឹង៥ម៉ែត្រ កម្រាស់ក្រួស០,១៥ម៉ែត្រ និងលូមូលទោលមុខកាត់០,៦ម៉ែត្រ ប្រវែង៦ម៉ែត្រចំនួន០១កន្លែង និងលូមូលទោលមុខកាត់០,៨ម៉ែត្រ ប្រវែង៦ម៉ែត្រចំនួន០២កន្លែង និងស្លាកសញ្ញាគម្រោងចំនួន០៣ ស្ថិតក្នុង ភូមិតាច្រែង ភូមិពេជ្ជោរ និងភូមិអូរក្រឡាញ់។ គម្រោងស្ថិតក្នុងតំលៃ ប៉ាន់ស្មាន១៩៩.០៨១.២២០រៀល ដោយមានក្រុមហ៊ុនចំនួន៣ បានដាក់សំណើ។ ជាលទ្ធផលបានទៅលើក្រុមហ៊ុន ពៅ រ៉ាឌី ខនស្រ្តាក់សិនក្នុងតម្លៃ១៩៦.៥០០.០០០រៀល។
គម្រោងទី២សាងសង់ផ្លូវបេតុង០១ខ្សែ ប្រវែង១៧៣ម៉ែត្រ ទទឹងបេតុង៤,៥ម៉ែត្រ កម្រាស់បេតុង០,១៥ម៉ែត្រ មានក្រួសក្រហមស្មារសងខាង០,២៥ម៉ែត្រ និងអំពូលសូឡាបំភ្លឺផ្លូវចំនួន១១បង្គោល និងស្លាកសញ្ញាគម្រោងចំនួន០១ ស្ថិតក្នុងភូមិកោះក្រប៉ៅ។ គម្រោងស្ថិតក្នុងតំលៃប៉ាន់ស្មាន៩០.៩៧៨.៣៨១រៀល ដោយមានក្រុមហ៊ុនចំនួន៣ បានដាក់សំណើ។ ជាលទ្ធផលបានទៅលើក្រុមហ៊ុន ពៅ រ៉ាឌី ខនស្រ្តាក់សិន ក្នុងតម្លៃ ៨៩.៧៩៩.៩៧៥រៀល។
ព័ត៌មានជាតិ ថ្មីៗ
ជាមួយនឹងការទទួលបានគម្រោងសាងសង់ផ្លូវខាងលើ តំណាងក្រុមហ៊ុនដែលទទួលបានការម៉ៅការ បានធ្វើការប្ដេជ្ញាចិត្តដោយសន្យាថា នឹងធ្វើឱ្យបានទាន់ពេលវេលា ត្រឹមត្រូវ ស្របទៅតាមគំនូរប្លង់បច្ចេកទេស និងតាមលក្ខខណ្ឌដូចមានចែងនៅក្នុងកិច្ចសន្យា៕
អត្ថបទ និងរូបភាព៖លោក ធន់ ពូថេ
កែសម្រួល៖លោក ហាំ ម៉េងហួត
