ក្នុងកិច្ចប្រជុំសាមញ្ញលើកទី១២ របស់ក្រុមប្រឹក្សាខេត្តសៀមរាប អាណត្តិទី៤ នៅថ្ងៃទី០៥ ខែឧសភានេះ លោក សំកុល សុចិត្រា អភិបាលរងខេត្ត បានណែនាំដល់អាជ្ញាធរក្រុងស្រុកទូទាំងខេត្ត និងអ្នកពាក់ព័ន្ធ ធ្វើយ៉ាងណាត្រៀមលក្ខណៈសម្បត្តិឱ្យបានរួចរាល់ ក្នុងការត្រៀមជួយសង្គ្រោះប្រជាពលរដ្ឋពេលមានករណីកើតមានគ្រោះមហន្តរាយណាមួយដែលកើតឡើងជាយថាហេតុ នៅក្នុងរដូវវស្សានេះ។
លោក សំកុល សុចិត្រា មានប្រសាសន៍ថា កត្តាសំខាន់នោះ សូមឱ្យអាជ្ញាធរគ្រប់ជាន់ថ្នាក់ ត្រូវបន្តយកចិត្តទុកដាក់លើការងារសន្តិសុខ សណ្ដាប់ធ្នាប់ក្នុងមូលដ្ឋាន លុបបំបាត់ឱ្យបាននូវក្រុមក្មេងទំនើង ករណីគ្រឿងញៀន គោរពច្បាប់ចរាចរណ៍ បទល្មើសព្រៃឈើ ជលផល និងគ្រប់គ្រងឱ្យបាននូវព្រៃលិចទឹក ចំពោះបុគ្គលណានៅតែបំពានរានដីព្រៃលិចទឹក ត្រូវធ្វើការផ្ដន្ទាទោសទៅតាមច្បាប់។ ក្នុងនោះក៏សូមឱ្យត្រូវបង្កើនការអនុវត្តការងារភូមិឃុំសង្កាត់មានសុវត្ថិភាព។
លោកអភិបាលរងខេត្ត ក៏សូមវាយតម្លៃខ្ពស់ ចំពោះលទ្ធផលការងារដែលរដ្ឋបាលខេត្ត អនុវត្តបានសម្រាប់ខែមេសា ព្រមទាំងបានធ្វើការណែនាំបន្ថែមដល់រដ្ឋបាលក្រុងស្រុក ក្នុងការអនុវត្តទៅតាមទិសដៅនៃអង្គសន្និបាតរបស់រដ្ឋបាលខេត្ត ដែលបានដាក់ចេញក្នុងឆ្នាំ២០២៥ ឱ្យសម្រេចបានជោគជ័យ។
ក្នុងឱកាសនោះដែរ ឯកឧត្តម តោ គឹមស៊ាន ប្រធានក្រុមប្រឹក្សាខេត្តស្ដីទី បានជំរុញដល់អាជ្ញាធរក្រុងស្រុក និងសមត្ថកិច្ចគ្រប់ជាន់ថ្នាក់ ត្រូវបន្តពង្រឹងលើការអនុវត្តច្បាប់ឱ្យមានប្រសិទ្ធភាព ក្នុងការរៀបចំសណ្ដាប់ធ្នាប់នៅតាមទីប្រជុំជន ក្នុងក្រុងស្រុកទាំងអស់ក្នុងខេត្ត សំខាន់ការងារចរាចរណ៍នៅតាមទីផ្សារ សាលារៀន និងមន្ទីរពេទ្យជាដើម៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
