ក្នុងឱកាសចុះពិនិត្យការងារផ្ដល់អត្តសញ្ញាណបណ្ណសញ្ជាតិខ្មែរជូនបងប្អូនប្រជាពលរដ្ឋក្នុងភូមិគោកត្នោត សង្កាត់គោកចក ក្រុងសៀមរាប នាថ្ងៃទី១៥ ខែកក្កដា ឆ្នាំ២០២៥នេះ លោក លី សារី អភិបាលរងខេត្តសៀមរាប បានណែនាំដល់មន្ត្រីជំនាញ ត្រូវផ្ទៀងផ្ទាត់នូវឈ្មោះ អក្ខរាវិរុទ្ធរបស់បងប្អូនប្រជាពលរដ្ឋឱ្យល្អិតល្អន់ ត្រឹមត្រូវ មុននឹងដាក់ចេញ ចៀសវាងចេញអត្តសញ្ញាណបណ្ណមកមានខុស ពិបាកក្នុងការកែសម្រួលនៅពេលក្រោយ។
លោកអភិបាលរងខេត្ត ក៏បានជំរុញដល់បងប្អូនប្រជាពលរដ្ឋទាំងអស់ ដែលមានអត្តសញ្ញាណបណ្ណអស់សុពលភាព ត្រូវមកធ្វើថ្មី ម្យ៉ាងទៀតសូមផ្ដល់ព័ត៌មានដល់បងប្អូនយើងដែលទើបត្រឡប់មកពីធ្វើការនៅប្រទេសថៃ ឱ្យមកធ្វើអត្តសញ្ញាណបណ្ណឡើងវិញ ដើម្បីយកទៅប្រើប្រាស់តាមតម្រូវការ។ ជាមួយគ្នានេះ លោកក៏សូមអំណរគុណដល់មន្ត្រីជំនាញទាំងអស់ ដែលបានយកចិត្តទុកដាក់លើការចុះផ្ដល់អត្តសញ្ញាណបណ្ណថ្មីជូនដល់បងប្អូនប្រជាពលរដ្ឋដល់មូលដ្ឋាន តាមរយៈរថយន្តចល័តនាពេលនេះ។
បើតាម លោកឧត្តមសេនីយ៍ត្រី នៅ អេងវណ្ណនី ស្នងការរងទទួលផែនអត្តសញ្ញាណកម្ម បានបញ្ជាក់ថា បងប្អូនដែលមានអត្តសញ្ញណបណ្ណអស់សុពលភាព និងសុពលភាពនៅតិចជាង ១៨០ថ្ងៃ មានច្រើននៅតាមបណ្ដាភូមិមួយចំនួន ដែលតម្រូវឱ្យក្រុមការងារចុះបំពេញបែបបទផ្ដល់ឡើងវិញតាមរយៈរថយន្តចល័តរបស់ស្នងការនគរបាលខេត្ត។ លោកបន្ថែមថា ក្នុងរយៈពេល៩ថ្ងៃកន្លងមកនេះ ក្រុមការងារបានចុះថត និងផ្ដល់អត្តសញ្ញាណបណ្ណថ្មីបានចំនួន ១ ៣១៥នាក់ ក្នុងនោះភូមិនគរក្រៅ ចំនួន៨៦៤នាក់ និងភូមិគោកត្នោត ៤៥១នាក់៕
អត្ថបទ និងរូបភាព៖ លោក អ៊ុន ណារាជ្យ
