នៅថ្ងៃទី១៥ ខែកក្កដា ឆ្នាំ២០២៥នេះ រដ្ឋបាលខេត្តសៀមរាប សហការជាមួយមន្ទីរការងារ និងបណ្ដុះបណ្ដាលវិជ្ជាជីវៈខេត្ត បានរៀបចំវេទិកាផ្សព្វផ្សាយអំពីឱកាសការងារ និងការចុះឈ្មោះចូលរៀនជំនាញបច្ចេកទេស និងវិជ្ជាជីវៈ តាមរយៈមន្ទីរការងារ វិទ្យាស្ថានពហុបច្ចេកទេសភូមិភាគតេជោសែនសៀមរាប វិទ្យាស្ថានជាតិពហុបច្ចេកទេសអង្គរ រួមនឹងបេឡាជាតិសន្តិសុខសង្គម ជូនបងប្អូនប្រជាពលរដ្ឋមកពីប្រទេសថៃ នៅឃុំសែនសុខ ស្រុកក្រឡាញ់ ខេត្តសៀមរាប។
លោក នាក់ ណេរ៉ុន អភិបាលរងខេត្ត មានប្រសាសន៍ថា ការរៀបចំវេទិកាផ្សព្វផ្សាយនាពេលនេះ គឺជាការអនុវត្តគោលនយោបាយរបស់រាជរដ្ឋាភិបាល ក្នុងការជួយគាំទ្រពលករដែលវិលត្រលប់ពីប្រទេសថៃ ក្នុងការទទួលបានឱកាសការងារសំដៅបង្កើនអត្រាអ្នកមានការងារធ្វើនៅតាមមូលដ្ឋាន និងការចូលរួមលើកស្ទួយជីវភាពប្រជាពលរដ្ឋឱ្យកាន់តែល្អប្រសើរឡើង។ វេទិកានេះ ក៏ជាការអនុវត្តគោលនយោបាយរបស់រាជរដ្ឋាភិបាលគាំពារសហគ្រាស គ្រឹះស្ថាន ក្នុងស្រុក និងបរទេស តាមរយៈការផ្គត់ផ្គង់កម្លាំងពលកម្ម និងជំនាញបង្ខិតសេវាជួយស្វែងរកការងារធ្វើឱ្យកាន់តែខិតជិត ដល់ប្រជាពលរដ្ឋនៅតាមមូលដ្ឋាន។
លោកអភិបាលរងខេត្ត បន្តថា ការបង្កើតវេទិកានាពេលនេះដែរ ជាការជួបជុំគ្នារវាងពលករដែលវិលត្រលប់ពីថៃ និយោជក និងអ្នកផ្ដល់ការអប់រំបណ្ដុះបណ្ដាល ផ្សព្វផ្សាយព័ត៌មានឱកាសការងារ និងសម្ភាសការងារ នៅនឹងកន្លែងភ្លាមៗពីសំណាក់សហគ្រាស គ្រឹះស្ថាន ដែលមានតម្រូវការជ្រើសរើសកម្លាំងពលកម្ម និងផ្ដល់ឱកាសដល់និយោជកដែលមានតម្រូវ ការកម្លាំងពលកម្ម។
លោកបន្ថែមថា តាមរយៈនេះ វាក៏នឹងផ្ដល់ឱកាសដល់គ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈខេត្ត របស់ក្រសួងការងារ និងបណ្ដុះបណ្ដាលវិជ្ជាជីវៈ ធ្វើការផ្សព្វផ្សាយពីឱកាសអាហារូបករណ៍ វគ្គអប់រំបណ្ដុះបណ្ដាលជំនាញ វិជ្ជាជីវៈ និងបច្ចេកទេស និងចុះឈ្មោះយុវជនមកពីក្រុមគ្រួសារក្រីក្រ និងងាយរងហានិភ័យចំនួន ១.៥លាននាក់ ផងដែរ៕
អត្ថបទ និងរូបភាព៖ លោក អ៊ុន ណារាជ្យ
