ថ្លែងក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានឃុំអំពិល ស្រុកប្រាសាទបាគង ខេត្តសៀមរាប លោកជំទាវ អាន អាន់ អនុប្រធានក្រុមការងារ បានណែនាំឱ្យអាជ្ញាធរមូលដ្ឋាន និងក្រុមគ្រូពេទ្យ យកចិត្តទុកដាក់ឱ្យបានខ្ពស់ ក្នុងករណីមានបងប្អូនប្រជាពលរដ្ឋយើងដែលបានជម្លៀសខ្លួនពីប្រទេសថៃ ឬតំបន់ព្រមដែន មកដល់មូលដ្ឋាន ករណីមានជំងឺ ឬរងរបួស ត្រូវយកចិត្តទុកដាក់ព្យាបាលពួកគាត់ឱ្យបានទាន់ពេលវេលា។
លោកជំទាវ អាន អាន់ បានបញ្ជាក់ថា ក្នុងករណីមណ្ឌលសុខភាពខ្វះខាតនូវថ្នាំសង្កូវ សម្ភារ និងឧបករណ៍ដែលបម្រើក្នុងការព្យាបាល សូមរាយការណ៍បន្ទាន់ទៅកាន់មន្ទីរពេទ្យគោលដៅ ឬក៏អាចទាក់ទងផ្ទាល់ទៅកាន់មន្ទីរពេទ្យព្រះកេតុមាលាក្រសួងការពារ ក្រុមការងារនឹងជួយភ្លាមៗ ដើម្បីទទួលព្យាបាលប្រជាពលរដ្ឋប្រកបដោយប្រសិទ្ធខ្ពស់។
លោកជំទាវ ក៏បានជំរុញឱ្យក្រុមការងារទាំងអស់បន្តកិច្ចសហការអនុវត្ដតួនាទី ទៅតាមវិស័យនីមួយៗ ដើម្បីដោះស្រាយបញ្ហាប្រឈមជូនប្រជាពលរដ្ឋ។ ជាពិសេសនៅក្នុងស្ថានការណ៍នេះក្រុមការងារទាំងអស់ត្រូវក្ដាប់ឱ្យបាននូវព័ត៌មានជម្លោះព្រំដែនរវាងកម្ពុជា និងថៃ ចៀសវាងនូវការចែករំលែកព័ត៌មានមិនពិតដែលធ្វើឱ្យប្រជាពលរដ្ឋមានការយល់ច្រឡំ៕
ព័ត៌មានជាតិ ថ្មីៗ
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
