ថ្លែងនៅក្នុងកិច្ចប្រជុំសេចក្តីព្រាងផែនការប្រើប្រាស់ដីក្នុងភូមិខ្នាត ស្រុកពួក ខេត្តសៀមរាប នាព្រឹកថ្ងៃទី២៥ ខែកក្កដា ឆ្នាំ២២៥នេះ លោក ហែន ពុទ្ធី អភិបាលរងខេត្តសៀមរាប បានបង្ហាញថា អាជ្ញាធរខេត្តបានចាប់ផ្តើមផែនការប្រើប្រាស់ដីក្នុងភូមិនានា ក្នុងតំបន់រមណីយដ្ឋានអង្គរ និងតំបន់បឹងទន្លេសាប ដើម្បីប្រែក្លាយភូមិទាំងនោះ ឱ្យទៅជាផ្នែកមួយនៃការទាកទាញអ្នកទេសចរ និងដើម្បីលើកកម្ពស់ជីវភាពរស់នៅរបស់ពលរដ្ឋ។
លោក ហែន ពុទ្ធី បានលើកឡើងថា ភូមិខ្នាត ជាភូមិទី១ ក្នុងចំណោមភូមិ១១៤ ក្នុងតំបន់រមណីយដ្ឋានអង្គរ ដែលត្រូវបានរៀបចំផែនការប្រើប្រាស់ដីនេះ។ ផែនការនេះមានគោលដៅធ្វើយ៉ាងណាឲ្យភូមិខ្នាត ក្លាយជាភូមិគំរូមួយ ដែលបានរួមចំណែកនៅក្នុងការទាក់ទាញអ្នកទេសចរឲ្យមកកម្សាន្តនៅខេត្តសៀមរាប ក្រៅអំពីការទស្សនាប្រាសាទ។
លោកអភិបាលរងខេត្ត បន្តថា ជាមួយគ្នានេះ ប្រើសិនបើការអនុវត្តផែនការនេះ ទទួលបានជោគជ័យវាក៏ក្លាយជាឧបករណ៍គំរូមួយក្នុងការរៀបចំផែនការប្រើប្រាស់ដី នៅតាមបណ្តាភូមិដទៃទៀតនៅក្នុងតំបន់រមណីយដ្ឋានអង្គរ ហើយក៏អាចឈានទៅដល់បណ្តាភូមិដទៃៗ។ លោកថា នៅក្នុងខេត្តសៀមរាប ក្រៅពីភូមិក្នុងតំបន់អង្គរ អាជ្ញាធរក៏មានផែនការក្នុងការរៀបចំភូមិនានានៅតាមមាត់បឹងទន្លេសាប ដើម្បីឲ្យបណ្តាភូមិទាំងនោះ កាន់តែមានភាពទាក់ទាញអ្នកទេសចរទាំងជាតិ និងអន្តរជាតិ ដែលជាផ្នែកមួយនៃការលើកម្ពស់ជីវភាពរបស់ប្រជាពលរដ្ឋ ព្រោះពួកគាត់ទទួលបានអត្ថប្រយោជន៍កាន់តែច្រើនពីផែនការនេះ។
សូមជម្រាបថា នៅមុនវិបត្តិកូវីដ១៩ ភូមិខ្នាត ជាទីតាំងមួយដែលមានសក្ដានុពលប្រហាក់ប្រហែលគ្នាជាមួយភូមិព្រះដាក់ ស្រុកបន្ទាយស្រីដែរ ក្នុងការទាក់ទាញអ្នកទេសចរមកកម្សាន្ត តាមរយៈការទស្សនាវត្តបុរាណ និងសកម្មភាពប្រចាំថ្ងៃនានារបស់ប្រជាពលរដ្ឋ និងទិដ្ឋភាពធម្មជាតិនានា។ ប៉ុន្តែដោយសារវិបត្តិកូវីដ១៩ បានធ្វើឱ្យសកម្មភាពទេសចរណ៍នៅភូមិនេះ មានសភាពស្ងប់ស្ងាត់។ យោងតាមសេចក្តីព្រាងផែនការប្រើប្រាស់ដីភូមិខ្នាត ឃុំខ្នាត ស្រុកពួក បានបង្ហាញថា ដើម្បីប្រែក្លាយភូមិខ្នាត ឱ្យជាទីទាក់ទាញអ្នកទេសចរមកវិញ អាជ្ញាធរ មានគម្រោងលើកកម្ពស់ទាំងសោភណ្ឌភាព ទាំងហេដ្ឋារចនាសម្ព័ន្ធនានាឱ្យមានភាពល្អប្រសើរ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
