ក្នុងឱកាសនិមន្តនាំយកអំណោយសម្តេចបវរធិបតី ហ៊ុន ម៉ាណែត និងលោកជំទាវបណ្ឌិត ពេជ្រ ចន្ទមន្នី រួមទាំងសប្បុរសជន ចែកជូនដល់បងប្អូនភៀសសឹកជិត ២ ០០០គ្រួសារ ដែលកំពុងស្នាក់នៅក្នុងស្រុកអន្លង់វែង និងស្រុកត្រពាំងប្រាសាទ ខេត្តឧត្តមានជ័យ នារសៀលថ្ងៃទី០៥ ខែ សីហា ឆ្នាំ២០២៥ សម្ដេចព្រះព្រហ្មរតនមុនី ពិន សែម សិរីសុវណ្ណោ គណៈមហានិកាយនៃព្រះរាជាណាចក្រកម្ពុជា បានមានថេរដីកាថា ស្ថិតនៅក្នុងកាលៈទេសៈណាក៏ដោយ ប្រជាពលរដ្ឋខ្មែរទាំងអស់ត្រូវចាំថា គ្មានអ្វីដែលល្អប្រសើរជាងពេលដែលប្រទេសជាតិយើងមានសន្តិភាពនោះទេ។
សម្ដេចព្រះព្រហ្មរតនមុនី ពិន សែម មានថេរដីកាបន្ថែមថា សង្គ្រាមមិនដែលបានផ្តល់សុភមង្គល ភាពរីកចម្រើន ការជួបជុំគ្រួសារដូចសម័យមានសន្តិភាពនេះទេ គឺសង្គ្រាមមានតែធ្វើឱ្យពួកគាត់ឈឺចាប់ខ្លោចផ្សាមិនអាចគណនាបាន ហើយវាធ្វើឱ្យបែកបាក់គ្រួសារបាត់បង់បងប្អូន ញាតិសន្តាន ហើយវិស័យគ្រប់យ៉ាង គឺត្រូវបាត់បង់ទាំងអស់ ដូច្នេះហើយបើសង្គមជាតិមានសុខសន្ដិភាព ទើបសាសនារស់នៅសុខស្ងប់បានផងដែរ។
សម្ដេច ក៏បានសម្តែងនូវការកោតស្ញប់ស្ញែង និងកោតសរសើរដ៏ក្រៃលែង ចំពោះវីរភាពដ៏អង់អាច ក្លាហានរបស់វីរយុទ្ធជនកម្ពុជាគ្រប់រូប ដែលបានប្រយុទ្ធតស៊ូយ៉ាងអង់អាចក្លាហាន នៅក្នុងសមរភូមិ ដើម្បីបុព្វហេតុការពារជាតិ ការពារទឹកដី និងការពារប្រជាជន ក៏ដូចជាប្រជាជនកម្ពុជានៅទូទាំងប្រទេស ដែលបានរូបរួមជាកម្លាំងសាមគ្គីជាតិយ៉ាងរឹងមាំ។ តែយ៉ាងណា ក៏សូមឱ្យពលរដ្ឋខ្មែរទាំងអស់ ត្រូវចេះរួបរួមសាមគ្គី ជួយគ្នាក្នុងគ្រាលំបាក មានទុក្ខរួមទុក្ខ មានសុខរួមសុខ គ្មានអ្វីដែលល្អប្រសើរជាងពេលបានឃើញប្រទេសជាតិ មានសន្ដិភាពនោះឡើយ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារជ្យ
