នៅថ្ងៃទី៦ ខែសីហា ឆ្នាំ២០២៥នេះ លោក ងូវ សេងកាក់ អភិបាលរងខេត្តសៀមរាប បានទទួលជួបពិភាក្សាការងារជាមួយប្រតិភូមន្ទីរពាណិជ្ជកម្មខេត្ត Shanxi (សានស៉ី) នៃសាធារណរដ្ឋប្រជាមានិតចិន ដឹកនាំដោយលោក Wang HongJin ប្រធានមន្ទីរពាណិជ្ជកម្មខេត្ត ដោយមានការចូលរួមពីថ្នាក់ដឹកនាំមន្ទីរអង្គភាពពាក់ព័ន្ធជុំវិញខេត្ត។
ក្នុងឱកាសនោះ លោក ង៉ូវ សេងកាក់ អភិបាលរងខេត្ត បានសម្ដែងសេចក្ដីរីករាយស្វាគមន៍ ចំពោះប្រតិភូមន្ទីរពាណិជ្ជកម្មខេត្តសានស៉ី ចំពោះដំណើរទស្សនកិច្ចផ្លូវការរបស់ប្រតិភូមកកាន់ព្រះរាជាណាចក្រកម្ពុជា ក៏ដូចជាចំណាយពេលវេលាមកទស្សនកិច្ចមកខេត្តសៀមរាប។ រដ្ឋបាលខេត្តសៀមរាប បានចងសម្ព័ន្ធមេត្រីភាព ហើយកន្លងមកប្រតិភូខេត្ត ក៏បានធ្វើកិច្ចសហប្រតិបត្តិការជាមួយខេត្តក្រុងចំនួន៣០ នៃសាធារណរដ្ឋប្រជាមានិតចិនផងដែរ។
លោក ង៉ូវ សេងកាក់ បានបញ្ជាក់ថា រដ្ឋបាលខេត្តគាំទ្រចំពោះគម្រោងវិនិយោគរបស់ក្រុមហ៊ុន Yunnan Investment Holding Group ជាពិសេសការអភិវឌ្ឍវិស័យទេសចរណ៍ ការគ្រប់គ្រងសន្តិសុខសាធារណៈ ការគ្រប់គ្រងចរាចរណ៍ ការកែលម្អបរិស្ថាន ក៏ដូចជាការផ្គត់ផ្គង់ទឹក ផ្គត់ផ្គង់ថាមពល និងការងារផ្សេងៗទៀត ជុំវិញអាកាសយានដ្ឋានអន្តរជាតិសៀមរាប-អង្គរ ពិសេសកិច្ចសហប្រតិបត្តិការពាណិជ្ជកម្ម។ ក្រៅពីនេះ រដ្ឋបាលខេត្តក៏នឹងពង្រឹងលើកិច្ចសហប្រតិបត្តិការ រវាងខេត្តសៀមរាប និងក្រុងស៊ីសប៉ាណា ក្នុងការបង្កើនកំណើនភ្ញៀវទេសចរជនជាតិចិនមកកាន់ខេត្តសៀមរាប និងជំរុញឱ្យមានការហោះហើរផ្ទាល់រវាងខេត្ត-ក្រុងទាំងពីរ ថែមទៀតផង។
ជាការឆ្លើយតប លោក Wang HongJin បានបង្ហាញក្ដីរីករាយយ៉ាងខ្លាំងចំពោះចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ ជាពិសេសរវាងខេត្តសៀមរាប និងខេត្តសានស៉ី។ លោកជឿជាក់ថា ទំនាក់ទំនងដ៏រឹងមាំនេះនឹងទាក់ទាញអ្នកវិនិយោគ និងភ្ញៀវទេសចរចិនកាន់តែច្រើនមកកាន់កម្ពុជា ជាពិសេសទៅកាន់ខេត្តសៀមរាប ដែលជាគោលដៅទេសចរណ៍ដ៏សំខាន់៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
