នៅថ្ងៃទី១០ ខែសីហា ឆ្នាំ២០២៥ នេះ បងប្អូនជាជនភៀសសឹកចំនួន ២ ៨០៤គ្រួសារ ស្មើនឹង ៨ ០៩៣នាក់ បានសម្រេចចិត្តត្រឡប់ទៅកាន់លំនៅឋានវិញ ក្រោមការយកចិត្តទុកដាក់ពីរដ្ឋបាលខេត្តសៀមរាប បន្ទាប់ពីស្ថានភាពនៅតំបន់សមរភូមិមានភាពស្ងប់ស្ងាត់ ក្រោមការព្រមព្រៀងលើបទឈប់បាញ់។
ស្របនឹងការត្រឡប់ទៅកាន់លំនៅឋានវិញរបស់បងប្អូនជាជនភៀសខ្លួន ឯកឧត្តម ប្រាក់ សោភ័ណ អភិបាលខេត្តសៀមរាប បានណែនាំឱ្យក្រុមការងាររៀបចំរថយន្តដឹកជញ្ជូន ធ្វើយ៉ាងណា ជូនជនភៀសខ្លួនត្រឡប់ទៅលំនៅឋានវិញ នៅតាមបណ្ដាខេត្តឧត្តរមានជ័យ បន្ទាយមានជ័យ និងបាត់ដំបង ប្រកបដោយសុវត្ថិភាព។ ឯកឧត្តម ក៏សូមការយោគយល់ចំពោះការរៀបចំកន្លែងស្នាក់នៅពុំទាន់បំពេញតម្រូវការ និងឆ្លើយតបតាមសំណូមពររបស់បងប្អូនពីសំណាក់ថ្នាក់ដឹកនាំ ក៏ដូចជាអាជ្ញាធរ មន្ត្រីដែលបានរៀបចំទីតាំងស្នាក់នៅ។
ជាមួយនឹងការត្រឡប់ទៅលំនៅឋានវិញនេះ បងប្អូនជាជនភៀសខ្លួន បានថ្លែងអំណរគុណយ៉ាងជ្រាលជ្រៅបំផុត ចំពោះឯកឧត្តម ប្រាក់ សោភ័ណ អភិបាលខេត្តសៀមរាប រួមនឹងអាជ្ញាធរក្រុងស្រុក កងកម្លាំងប្រដាប់អាវុធ ព្រះចៅអធិការវត្ត និងមន្ត្រីពាក់ព័ន្ធទាំងអស់ ដែលផ្ដល់ទីតាំងសុវត្ថិភាព និងយកចិត្តទុកដាក់ខ្ពស់ក្នុងការរៀបចំចាត់ចែងកន្លែងស្នាក់នៅ និងការផ្គត់ផ្គង់គ្រឿងឧបភោគបរិភោគគ្រប់គ្រាន់ ព្រមទាំងអនាម័យបរិស្ថានដល់ពួកគាត់ដែលបានជម្លៀសពីតំបន់សមរភូមិ។
សូមជម្រាបថា គិតត្រឹមថ្ងៃទី១០ ខែសីហា ឆ្នាំ២០២៥ មានបងប្អូនជនភៀសខ្លួនចំនួន ៥ ៣៣៦គ្រួសារ ស្មើនឹង ១៨ ២០៧នាក់ បាននឹងកំពុងស្នាក់នៅតាមបណ្ដាទីតាំងនានាក្នុងភូមិសាស្ត្រខេត្តសៀមរាប ក្រោមការយកចិត្តទុកដាក់របស់អាជ្ញាធរមូលដ្ឋាន៕
អត្ថបទ៖ លោក អ៊ុន ណារាជ្យ
រូបភាព៖ មន្ត្រីមន្ទីរ
