ក្នុងឱកាសរៀបចំរថយន្តជូនដំណើរបងប្អូនជនភៀសសឹក ១៨គ្រួសារ ត្រឡប់ទៅលំនៅឋានវិញ នៅខេត្តឧត្តមមានជ័យ នាព្រឹកថ្ងៃទី១១ ខែសីហានេះ លោក ង៉ូវ សេងកាក់ អភិបាលរងខេត្តសៀមរាប បានជំរុញដល់បងប្អូនភៀសសឹកទាំងអស់ នៅពេលត្រឡប់ទៅលំនៅឋានវិញ ត្រូវយកចិត្តទុកដាក់ថែទាំសុខភាព បន្តការងារបង្កបង្កើនផលដំណាំ ចិញ្ចឹមសត្វ និងមុខរបរផ្សេងៗ ដើម្បីផ្គត់ផ្គង់ជីវភាពគ្រួសារ ពិសេសត្រូវប្រុងប្រយ័ត្នចំពោះយុទ្ឋភណ្ឌមិនទាន់ផ្ទុះ រាល់ពេលបងប្អូនភ្ជួររាស់ កាប់គាស់ដីបង្កបង្កើនផល ក្នុងករណីសង្ស័យត្រូវប្រញ៉ាប់រាយការណ៍ទៅសមត្ថកិច្ច ឬអាជ្ញាធរមូលដ្ឋានភ្លាមៗ។
លោកអភិបាលរងខេត្ត បង្ហាញភាពជឿជាក់ថា តាមរយៈកិច្ចខិតខំប្រឹងប្រែងដោះស្រាយជម្លោះព្រំដែន រាជរដ្ឋាភិបាលកម្ពុជានឹងនាំយកនូវសុខសន្តិភាព ជូនប្រជាជនខ្មែរឆាប់ៗជាក់ជាមិនខាន ហើយការអនុវត្តនូវបទឈប់បាញ់ក៏នាំមកនូវក្តីសង្ឃឹម សម្រាប់ការវិលត្រឡប់ទៅលំនៅឋានវិញរបស់បងប្អូនភៀសសឹក។ ហេតុនេះ សូមបងប្អូនត្រូវជឿជាក់លើការដឹកនាំរបស់ សម្ដេចតេជោ ហ៊ុន សែន និង សម្ដេចធិបតី ហ៊ុន ម៉ាណែត ដែលលោកតែងតែគិតគូរពីប្រជាជាតិ ស្ថិរភាពតាមព្រំដែន និងបានស្រោចស្រង់ប្រទេសជាតិឱ្យរួចផុតអំពីភ្លើងសង្គ្រាម។
បងប្អូនជាជនភៀសសឹក បានថ្លែងអំណរគុណដល់អាជ្ញាធរខេត្ត និងព្រះចៅអធិការវត្តប្រាសាទគោកចក ដែលបានជួយសម្រួលទាំងទីកន្លែងស្នាក់នៅ អាហារហូបចុកដល់បងប្អូនជាជនភៀសសឹក គិតគូរពីសុខទុក្ខដល់ពួកគាត់ប្រកបដោយទឹកចិត្តស្មោះស ចែករំលែកនូវក្ដីស្រឡាញ់ សាមគ្គីភាព និងយល់ពីទុក្ខធុរៈរបស់ប្រជាពលរដ្ឋ។
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
