មជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់) នៅថ្ងៃទី ១១ ខែសីហា ឆ្នាំ ២០២៥ បានបើកវគ្គបណ្ដុះបណ្ដាលស្ដីពីការប្រើប្រាស់ម៉ាស៊ីនរាវមីនប្រភេទ ALIS ដល់សិក្ខាកាមមកពីស្ថាប័ន UXO Lao និងអាជ្ញាធរគ្រប់គ្រងថ្នាក់ជាតិ (NRA)។ វគ្គបណ្ដុះបណ្ដាលនេះ ធ្វើឡើងនៅសារមន្ទីរតេជោសន្តិភាព ស្ថិតនៅស្រុកប្រាសាទបាគង ខេត្តសៀមរាប។
កញ្ញា អ៊ុ សុភាវី ប្រធាននាយកដ្ឋានសហប្រតិបត្តិការអន្តរជាតិ បានបញ្ជាក់ថា វគ្គបណ្ដុះបណ្ដាលនេះមានចំនួន ២ ដំណាក់កាល។ ដំណាក់កាលទី ១ គឺជាវគ្គហ្វឹកហ្វឺនផ្នែកប្រតិបត្តិការ ដែលរួមបញ្ចូលទាំងទ្រឹស្ដី និងការអនុវត្តជាក់ស្ដែង និងមានរយៈពេល ១៣ ថ្ងៃ គឺចាប់ពីថ្ងៃទី ១១ ដល់ថ្ងៃទី ២៧ ខែសីហា ឆ្នាំ ២០២៥។ ដំណាក់កាលទី ២ គឺជាវគ្គតាមដាន និងការបង្កើតស្ដង់ដារប្រតិបត្តិការ (SOPs) ប៉ុន្តែពេលវេលានឹងត្រូវកំណត់នៅពេលក្រោយ។
ឯកឧត្ដម អ៊ុំ ភូមិរ៉ូ អគ្គនាយករងស៊ីម៉ាក់ បានមានប្រសាសន៍ថា ម៉ាស៊ីនរាវមីនប្រភេទ ALIS ត្រូវបានកម្ពុជាអនុវត្តស្រាវជ្រាវតាំងពីឆ្នាំ ២០០៦ ជាមួយអ្នកជំនាញក្រុមហ៊ុនប្រទេសជប៉ុន នៅចំការមីនឃុំពពេល ស្រុកសូទ្រនិគម ដែលធ្វើឲ្យគ្រូបង្វឹកមានបទពិសោធន៍ស្ទាត់ជំនាញ។ ចំពោះវគ្គបណ្ដុះបណ្ដាលនេះ នឹងមានការបង្ហាញ និងការអនុវត្តជាក់ស្ដែងដូចជា ការអនុវត្តឧបករណ៍ចាប់ដែក, ការអនុវត្តរ៉ាដានៃការជ្រៀតចូលដី (GPR), ការអនុវត្តការទទួលបានទិន្នន័យ (GPR), ការអនុវត្តការបកប្រែទិន្នន័យ (GPR), និងការធ្វើតេស្តវាយតម្លៃ។
ឯកឧត្ដម ក៏បានលើកឡើងផងដែរថា ចំពោះការផ្ទុះសង្គ្រាមនៅតំបន់ព្រំដែនកម្ពុជា-ថៃ ទាហានថៃបានប្រើប្រាស់អាវុធមកលើទឹកដីកម្ពុជា ដោយបានបន្សល់ទុកនូវគ្រាប់បែកចង្កោម គ្រាប់ផ្លោង និងគ្រាប់ជាច្រើនប្រភេទទៀតនៅក្នុងទឹកដីរបស់កម្ពុជា ដែលស៊ីម៉ាក់មានកាតព្វកិច្ចធ្វើការដោះស្រាយ។
សូមបញ្ជាក់ថា សម្រាប់វគ្គហ្វឹកហ្វឺនដំណាក់កាលទី ១ ដែលមានរយៈពេល ១៣ ថ្ងៃនេះ មានសិក្ខាកាមចូលរួមចំនួន ១៣ នាក់ ក្នុងនោះមាន ១១ នាក់មកពីស្ថាប័ន UXO Lao និង ២ នាក់ទៀតមកពីអាជ្ញាធរគ្រប់គ្រងថ្នាក់ជាតិ (NRA)។ វគ្គនេះនឹងរៀបចំធ្វើឡើងនៅទីលានហ្វឹកហ្វឺននៅឃុំពពេល ស្រុកសូទ្រនិគម ខេត្តសៀមរាប ដែលនឹងផ្ដោតទៅលើចំណុចលម្អិតចំនួន ៨ ចំណុច រួមមាន៖ ប្រវត្តិរបស់ម៉ាស៊ីនរាវមីន ALIS, ការណែនាំបែបទ្រឹស្ដីអំពីម៉ាស៊ីនរាវមីន ALIS, ការបង្ហាញ និងការអនុវត្ត, ការអនុវត្តឧបករណ៍ចាប់ដែក, ការអនុវត្តរ៉ាដានៃការជ្រៀតចូលដី (GPR), ការអនុវត្តការទទួលបានទិន្នន័យ (GPR), ការអនុវត្តការបកប្រែទិន្នន័យ (GPR), និងការធ្វើតេស្តវាយតម្លៃ៕
អត្ថបទ និងរូបភាព៖ លោក ឈិត សាវី
កែសម្រួល: លោក អ៊ុន ណារាជ្យ
