ក្នុងឱកាសជួបសំណេះសំណាលជាមួយបងប្អូនអ្នកសារព័ត៌មានក្នុងខេត្តសៀមរាប នៅថ្ងៃទី១១ ខែសីហា ឆ្នាំ២០២៥នេះ លោក បុង ឆវ័ន ប្រធានការិយាល័យព័ត៌មាន និងសោតទស្សន៍ នៃមន្ទីរព័ត៌មានខេត្ត បានណែនាំដល់អ្នកសារព័ត៌មានក្នុងខេត្ត ត្រូវស្វែងរកប្រភពព័ត៌មានឱ្យបានច្បាស់លាស់មុនផ្សព្វផ្សាយ ជាពិសេសស្របពេលដែលប្រទេសជាតិកំពុងមានការឈ្លានពានពីប្រទេសជិតខាង អ្នកសារព័ត៌មានត្រូវយកប្រភពផ្លូវការពីរាជរដ្ឋាភិបាល ជៀសវាងផ្សាយបំផុសបំផុលធ្វើឱ្យប៉ះពាល់ដល់សន្តិសុខសង្គមជាតិ ស្មារតីប្រជាពលរដ្ឋ និងកងទ័ពជួរមុខ។
លោក បុង ឆវ័ន បានលើកឡើងថា ភាពស្មោះត្រង់ និងការគោរពវិជ្ជាជីវៈរបស់អ្នកសារព័ត៌មាន ត្រូវបានគាំពារដោយច្បាប់ ហើយច្បាប់ស្តីពីរបបសារព័ត៌មាន មិនអាចការពារបានចំពោះអ្នកផ្សាយដោយមិនគោរពក្រមសីលធម៌ និងច្បាប់ទេ ហើយការផ្សាយព័ត៌មានដែលត្រឹមត្រូវស្របតាមវិជ្ជាជីវៈ គឺមិនមែនជាការផ្សាយព័ត៌មានដែលនាំឱ្យប៉ះពាល់ដល់សិទ្ធិរបស់អ្នកដទៃ និងការធានាសណ្តាប់ធ្នាប់និងសន្តិសុខសង្គមនោះដែរ។
ព័ត៌មានជាតិ ថ្មីៗ
លោក បុង ឆវ័ន បន្តថា ក្នុងវិស័យសារព័ត៌មាន អ្នកសារព័ត៌មាន មានភារកិច្ចចម្បង គឺការរាយការណ៍ជូនដល់សាធារណជននូវការពិត ផ្តល់ព័ត៌មានត្រឹមត្រូវ មិនលម្អៀង។ អ្នកសារព័ត៌មាន ត្រូវមានមនសិការ ការពារឧត្តមប្រយោជន៍ជាតិ និងថែរក្សាស្ថិរភាពក្នុងសង្គម ដោយក្នុងនោះត្រូវចូលរួមធានាការពារ ការពង្រឹងសមត្ថភាពវិជ្ជាជីវៈ គុណភាពផ្សព្វផ្សាយ និងមិនត្រូវស្ថិតនៅក្រោមឥទ្ធិពលនយោបាយបរទេស ឬបម្រើរបៀបវារៈនយោបាយ ក្នុងការអនុវត្តភារកិច្ចរបស់ខ្លួនឡើយ សំដៅធ្វើយ៉ាងណាដើម្បីធានាភាពជឿជាក់ និងទុកចិត្តបានពីសំណាក់ប្រជាជន និងសង្គមទាំងមូល។
លោកប្រធានការិយាល័យ បានបញ្ជាក់ថា ការផ្តល់ការគាំពារ និងការការពារផ្នែកផ្លូវច្បាប់ដល់អ្នកសារព័ត៌មានដែលបានចុះបញ្ជីត្រឹមត្រូវ គឺជាអាទិភាពចម្បងមួយ និងជាការយកចិត្តទុកដាក់ខ្ពស់របស់ក្រសួងព័ត៌មាន និងរាជរដ្ឋាភិបាលកម្ពុជា។ អ្នកសារព័ត៌មានដែលបានចុះបញ្ជី ហើយបានជួបប្រទះនឹងបញ្ហា ឬវិវាទនានាក្នុងអំឡុងពេលបំពេញការងាររបស់ខ្លួន ដោយគោរពតាមក្រមសីលធម៌វិជ្ជាជីវៈត្រឹមត្រូវ និងអនុវត្តតួនាទីក្នុងក្របខណ្ឌច្បាប់កំណត់ ក្រសួងទទួលពិនិត្យសំណើលើករណីវិវាទទាំងនោះដើម្បីផ្តល់ការការពារ តាមរយៈការសម្របសម្រួល ការប្រឹក្សាផ្នែកច្បាប់ដើម្បីស្វែងរកដំណោះស្រាយ និងតាមរយៈការផ្តល់មេធាវីសម្រាប់ការពារក្តីក្នុងតុលាការជូនអ្នកសារព័ត៌មានផងដែរ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
