គម្រោងស្ថាបនាផ្លូវក្រាលដីល្បាយគ្រួសមួយខ្សែ ប្រវែង ១ ៧០០ម៉ែត្រ ទទឹង ៨ម៉ែត្រ និងកម្រាស់ ២តឹក ដែលតភ្ជាប់ពីភូមិកន្សែងលើ ទៅភូមិគោកចិន ក្នុងឃុំចាន់ស ស្រុកសូទ្រនិគម ខេត្តសៀមរាប ត្រូវបានបញ្ចប់ជាស្ថាពរ សម្រាប់បម្រើដល់ប្រជាពលរដ្ឋក្នុងមូលដ្ឋាន។
ក្នុងឱកាសចុះពិនិត្យការដ្ឋានខាងលើ នៅថ្ងៃទី១២ ខែសីហា ឆ្នាំ២០២៥ លោក គឹម វណ្ណៈ អភិបាលស្រុកសូទ្រនិគម បានលើកឡើងថា ផ្លូវមួយខ្សែនេះនឹងជួយសម្រួលដល់ការធ្វើដំណើររបស់ប្រជាពលរដ្ឋ ក៏ដូចជាការដឹកជញ្ជូនកសិផលផ្សេងៗ។ ផ្លូវនេះមានសារៈសំខាន់ខ្លាំងណាស់ ក្នុងការជំរុញសេដ្ឋកិច្ចរបស់ប្រជាពលរដ្ឋ ដោយសារអ្នកភូមិនៅក្នុងតំបន់នេះ ក្រៅពីការធ្វើស្រែចម្ការ ក៏បានដាំបន្លែបង្ការគ្រប់មុខសម្រាប់ផ្គត់ផ្គង់ទីផ្សារផងដែរ។ លើសពីនេះ ផ្លូវនេះក៏ជួយសម្រួលដល់ការធ្វើដំណើររបស់សិស្សានុសិស្ស និងការដឹកជញ្ជូនអ្នកជំងឺទៅកាន់មន្ទីរពេទ្យផងដែរ។
ព័ត៌មានជាតិ ថ្មីៗ
ឯកឧត្តម ជី ស៊ីថា រដ្ឋលេខាធិការក្រសួងអភិវឌ្ឍន៍ជនបទ មានប្រសាសន៍ថា ហេដ្ឋារចនាសម្ព័ន្ធផ្លូវថ្នល់គឺជាសរសៃឈាមសេដ្ឋកិច្ចជាតិ ហើយមានផ្លូវគឺមានក្តីសង្ឃឹម។ ការអភិវឌ្ឍន៍ទាំងនេះកើតឡើងដោយសារសុខសន្តិភាព និងនយោបាយឈ្នះ-ឈ្នះ ដែលដឹកនាំដោយ សម្តេចតេជោ ហ៊ុន សែន។ ជាមួយគ្នានេះ ក្រសួងអភិវឌ្ឍន៍ជនបទតែងតែយកចិត្តទុកដាក់លើការសាងសង់ផ្លូវ ដែលមានភាពធន់នឹងអាកាសធាតុ ដើម្បីបម្រើផលប្រយោជន៍ដល់សេដ្ឋកិច្ច និងសង្គមកិច្ចនៅតំបន់ជនបទ កាត់បន្ថយគម្លាតរវាងជនបទ និងទីក្រុង។
ឯកឧត្តមរដ្ឋលេខាធិការ ក៏បានផ្តាំផ្ញើដល់អាជ្ញាធរមូលដ្ឋាន ចូលរួមសហការជាមួយក្រុមវិស្វកម្ម ក្នុងការបើកប្រឡាយអមសងខាងផ្លូវ ដើម្បីសម្រួលដល់ការហូរទឹក ការពារកុំឱ្យផ្លូវខូចខាត និងចំណាយថវិកាជាតិ។ ឯកឧត្តម ក៏បានណែនាំដល់ក្រុមការងារបច្ចេកទេស និងវិស្វកម្ម ឱ្យកែសម្រួលការសាងសង់តាមបច្ចេកទេសឱ្យបានត្រឹមត្រូវ ដើម្បីធានាគុណភាព និងភាពជាប់ធន់របស់ផ្លូវ ជាពិសេសត្រូវដាំស្មៅតាមជើងទេ ដើម្បីទប់ស្កាត់ការហូរច្រោះដីនៅរដូវវស្សា៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក អ៊ុន ណារាជ្យ
