នៅថ្ងៃទី១១ ខែសីហា ឆ្នាំ២០២៥នេះ លោក យឿន ចាន់ អនុប្រធានមន្ទីរព័ត៌មានខេត្តទទួលបន្ទុករួម បានដឹកនាំក្រុមការងារនាំយកអំណោយរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ចែកជូនដល់បងប្អូនភៀសសឹកដែលកំពុងស្នាក់នៅក្នុងស្រុកស្រីស្នំ ស្រុកក្រឡាញ់ និងក្រុងសៀមរាប និងត្រៀមត្រឡប់ទៅកាន់លំនៅឋានវិញ ដែលអំណោយទាំងនោះមានអាវយឺតចំនួន ១ ០០០អាវ និងម៉ាស់មួយចំនួនធំ។
ក្នុងឱកាសនោះ លោក យឿន ចាន់ បានមានប្រសាសន៍ថា សង្គ្រាមមិនបានផ្តល់សុភមង្គល ភាពរីកចម្រើន ឬការជួបជុំគ្រួសារដូចពេលប្រទេសជាតិមានសុខសន្តិភាពនេះទេ គឺសង្គ្រាមធ្វើឱ្យពួកគាត់ឈឺចាប់ខ្លោចផ្សាមិនអាចគណនាបាន មានការបែកបាក់គ្រួសារ បាត់បង់បងប្អូន ញាតិសន្តាន ហើយវិស័យគ្រប់យ៉ាងក៏ត្រូវបាត់បង់ព្រោះតែសង្គ្រាម។ លោកក៏បានសម្តែងនូវការកោតសរសើរ និងគោរពដឹងគុណចំពោះវីរកងទ័ព ដែលបានពលីជីវិតដោយភាពអង់អាចក្លាហាន ប្រយុទ្ធតស៊ូនៅក្នុងសមរភូមិ ដើម្បីបុព្វហេតុការពារជាតិ ការពារទឹកដី និងការពារប្រជាជនកម្ពុជាយើង។ ប្រជាពលរដ្ឋខ្មែរគ្រប់រូបនឹងចងចាំនូវវីរភាពនេះជាប់ក្នុងចិត្តជានិរន្តរ៍។
លោកអនុប្រធានមន្ទីរបានបន្តថា ទោះជាយ៉ាងណា ប្រជាជនកម្ពុជា នៅតែមានភាពជឿជាក់លើរាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន និង សម្ដេចធិបតី ហ៊ុន ម៉ាណែត ដែលតែងតែគិតគូរពីប្រជាជន ស្ថិរភាពតាមព្រំដែន និងបានស្រោចស្រង់ប្រទេសជាតិឱ្យរួចផុតអំពីភ្លើងសង្គ្រាម នាំមកនូវសុខសន្តិភាពជូនប្រជាជនខ្មែរ។ ហើយការអនុវត្តនូវបទឈប់បាញ់ក៏នាំមកនូវក្តីសង្ឃឹមសម្រាប់ការវិលត្រឡប់ទៅលំនៅឋានវិញរបស់បងប្អូនភៀសសឹក។
ជាមួយគ្នានោះ លោកបានជំរុញដល់បងប្អូនភៀសសឹកទាំងអស់ថា នៅពេលត្រឡប់ទៅលំនៅឋានវិញ ត្រូវយកចិត្តទុកដាក់ថែទាំសុខភាព បន្តការងារបង្កបង្កើនផលដំណាំ ចិញ្ចឹមសត្វ និងមុខរបរផ្សេងៗ ដើម្បីផ្គត់ផ្គង់ជីវភាពគ្រួសារ។ ពិសេសគឺត្រូវប្រុងប្រយ័ត្នចំពោះយុទ្ធភណ្ឌមិនទាន់ផ្ទុះរាល់ពេលបងប្អូនភ្ជួររាស់ កាប់គាស់ដីបង្កបង្កើនផល ក្នុងករណីសង្ស័យត្រូវប្រញាប់រាយការណ៍ទៅសមត្ថកិច្ច ឬអាជ្ញាធរមូលដ្ឋានភ្លាមៗ៕
អត្ថបទ៖ លោក អ៊ុន ណារាជ្យ
រូបភាព៖ មន្ត្រីមន្ទីរ
