កាលពីរសៀលថ្ងៃទី១០ ខែសីហា ឆ្នាំ២០២៥ លោកទន្តបណ្ឌិត ស្រេង ធា ដឹកនាំក្រុមការងារគណៈទន្តពេទ្យខេត្តសៀមរាប និងអង្គការសុខភាព អង្គការស្នាមញញឹមកម្ពុជា ចុះពិនិត្យព្យាបាលជម្ងឺមាត់-ធ្មេញ ជូនដល់បងប្អូនប្រជាពលរដ្ឋក្នុងឃុំចន្លាសដៃ និងជនភៀសសឹក ដែលកំពុងស្នាក់នៅបណ្តោះអាសន្នក្នុងមូលដ្ឋានស្រុកក្រឡាញ់ ស្ថិតក្នុងវត្តខ្នាតេជោ ស្រុកក្រឡាញ់ ។
នាឱកាសនោះ លោកទន្តបណ្ឌិត ស្រេង ធា បានថ្លែងការកោតសរសើរចំពោះ ក្រុមការងារគណៈទន្តពេទ្យខេត្តសៀមរាប និងអង្គការសុខភាព អង្គការស្នាមញញឹមកម្ពុជា ជាពិសេសក្រុមគ្រូពេទ្យស្ម័គ្រចិត្ត ដែលបានសហការគ្នាយ៉ាងសកម្មក្នុងបេសកកម្មរួមគ្នាផ្តល់ការពិនិត្យព្យាបាលជម្ងឺមាត់~ធ្មេញជូនប្រជាជនកម្ពុជាដោយឥតគិតថ្លៃ។
ឯកឧត្ដមបណ្ឌិត ធឹម សំផូត ក្រុមការងាររាជរដ្ឋាភិបាលចុះមូលដ្ឋានស្រុកក្រឡាញ់ បានលើកឡើងថា ការលំបាក និងទុក្ខសោករបស់បងប្អូន ក៏គឺជាទុក្ខសោកនិងការលំបាករបស់រាជរដ្ឋាភិបាល ក៏ដូចជារបស់ជាតិខ្មែរយើងទាំងអស់គ្នា ក្នុងស្មារតីជាប្រជាជាតិតែមួយ។ ដូច្នេះ សូមជឿទុកចិត្ត និងបន្តគាំទ្រដល់វីរយុទ្ធជនរបស់យើង ដែលបានលះបង់សាច់ស្រស់ ឈាមស្រស់ លះបង់ជីវិត ដើម្បីការពារបូរណភាពទឹកដី មាតុភូមិនៃយើង។
ឯកឧត្តមបណ្ឌិត ក៏បានថ្លែងអំណរគុណ ដល់ក្រុមគ្រូពេទ្យ ជាតិ និងអន្តរជាតិ ដែលមានបេសកកម្មចុះព្យាបាល ជនភៀសសឹក ក៏ដូចប្រជាជនរស់នៅក្នុងឃុំចន្លាសដៃ និងឃុំផ្សេងៗទៀត បានមកទទួលការ ព្យាបាលឥតគិតថ្លៃ នាពេលនេះ និងសង្ឃឹមថា ថ្ងៃខាងមុននឹងមានបេសកកម្មដូចនេះទៀត នៅកន្លែងផ្សេង ដើម្បីបានជួយថែទាំ និងព្យាបាលដល់ប្រជាជនកម្ពុជាដោយឥតគិតថ្លៃផងដែរ៕
