បងប្អូនជាជនភៀសសឹក និងប្រជាពលរដ្ឋមានជីវភាពខ្វះខាតចំនួន ១០០គ្រួសារ ដែលកំពុងស្នាក់នៅក្នុងសង្កាត់គោកចក ក្រុងសៀមរាប បានទទួលអំណោយពីសមាគមសង្គ្រោះជីវិតនៃប្រទេសសិង្ហបុរី ផ្តល់តាមរយៈ ព្រះគ្រូ ហែម គឹមសាន ចៅអធិការវត្តប្រាសាទគោកចក នៅរសៀលថ្ងៃទី១០ ខែសីហា ឆ្នាំ២០២៥នេះ ដោយមានការចូលរួមពី ឯកឧត្តម សៀង ណាំ អ្នកតំណាងរាស្ត្រមណ្ឌលសៀមរាប និង លោក ង៉ូវ សេងកាក់ អភិបាលរងខេត្ត។
លោក Goh Tung Heng ប្រធានសមាគម បានឱ្យដឹងថា សមាគមមួយនេះ គឺជាសមាគមដែលមិនបម្រើឱ្យនយោបាយណាមួយឡើយ គឺបម្រើតែចលនាមនុស្សធម៌នៅលើពិភពលោកនេះ។ ជាក់ស្ដែងការនាំយកអំណោយមកផ្ដល់ជូននាពេលនេះ គឺជាការចូលរួមដោះស្រាយ និងជួយសម្រាលនូវការខ្វះខាតរបស់បងប្អូនចំពោះមុខបានមួយរយៈ ហើយសមាគមនឹងបន្តជួយដល់ប្រជាពលរដ្ឋកម្ពុជា ដែលជួបការខ្វះខាតនៅតំបន់មូលដ្ឋានផ្សេងៗបន្ថែមទៀត។
ក្នុងឱកាសនោះ ឯកឧត្តម សៀង ណាំ បានថ្លែងអំណរគុណដល់សប្បុរសជន ដែលមានចិត្តសប្បុរសធម៌ចំពោះប្រជាជនកម្ពុជា ក្នុងការចូលរួមដោះស្រាយទុក្ខលំបាក ជាមួយរាជរដ្ឋាភិបាលកម្ពុជា ហើយកាយវិការសប្បុរសធម៌នេះ នឹងក្លាយជាកាលានុវត្តភាពមួយក្នុងការរឹតចំណងសាមគ្គីភាព និងការពង្រឹងកិច្ចទំនាក់ទំនង សហប្រតិបត្តិការល្អ រវាងប្រទេស និងប្រជាជនទាំងពីរ កាន់តែមានភាពរឹងមាំទ្វេឡើង។
ឯកឧត្តម លើកឡើងថា ពិតណាស់ សង្គ្រាមឈ្លានពានរបស់ទាហានថៃ មកលើកម្ពុជា បានធ្វើឱ្យកុមារ មនុស្សចាស់ ស្ត្រីមានផ្ទៃពោះ រួមនឹងប្រជាជនកម្ពុជារាប់ម៉ឺននាក់ ត្រូវសម្រេចចិត្តរត់ភៀសខ្លួនចោលផ្ទះសម្បែង និងស្រុកកំណើត។ កម្ពុជាគឺជាប្រទេសដ៏តូចមួយ និងបានហែលឆ្លងកាត់សង្គ្រាម និងឧបសគ្គតូចធំរាប់មិនអស់ និងទើបតែមានសន្តិភាពពិតប្រាកដរយៈពេល២៧ឆ្នាំមកនេះទេ។ កម្ពុជាមិនមែនជាភាគីដែលឈ្លានពានឡើយ ប៉ុន្តែកម្ពុជានៅបានបង្ហាញយ៉ាងច្បាស់ពីសមត្ថភាពដ៏រឹងមាំ និងអង់អាចរបស់ខ្លួន ក្នុងការការពារបូរណភាពទឹកដីប្រឆាំងនឹងអំពើរំលោភរបស់ថៃ។
ឯកឧត្តមបញ្ជាក់ថា សន្តិភាព ពិតជាមានតម្លៃណាស់ចំពោះកម្ពុជា។ កម្ពុជាមិនបោះបង់ ឬបំភ្លេចកាតព្វកិច្ចការពារជាតិ ដើម្បីការថែរក្សាសន្តិភាពនោះទេ។ អាទិភាពរបស់កម្ពុជា គឺព្រំដែនសន្តិភាព និងការពារអធិបតេយ្យភាពរបស់ខ្លួន ដូច្នេះការព្យាយាមចង់បង្វែរស្ថានការណ៍បិទបាំង មិនឱ្យពិភពលោកឃើញនូវទង្វើឈ្លានពានរបស់ថៃមកលើទឹកដីកម្ពុជានោះ មិនអាចទទួលជោគជ័យបានឡើយ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
