នៅថ្ងៃទី០៦ ខែសីហា ឆ្នាំ២០២៥នេះ បងប្អូនជាជនភៀសសឹកចំនួន ២០៥គ្រួសារ ដែលកំពុងស្នាក់នៅក្នុងវត្តព្រះដាក់ ស្រុកបន្ទាយស្រី ខេត្តសៀមរាប បាទទួលអំណោយជាគ្រឿងឧបភោគបរិភោគ និងសម្ភារប្រើប្រាស់ពី ឯកឧត្តម បណ្ឌិត ម៉ុង ឬទ្ធី ប្រធានគណៈកម្មការទី៣ នៃព្រឹទ្ធសភា និងលោកជំទាវ ដោយពិធីនេះមានការចូលរួមពី លោក សុខ ថុល អភិបាលរងខេត្តសៀមរាប និងអាជ្ញាធរមូលដ្ឋានជាច្រើនរូប។
ឯកឧត្តម បណ្ឌិត ម៉ុង ឬទ្ធី មានប្រសាសន៍ បន្ទាប់ពីការប្រយុទ្ធគ្នានៅតាមបណ្តោយព្រំដែនកម្ពុជាប៉ុន្មានថ្ងៃកន្លងមកនេះ កងកម្លាំងយើងបានប្រកៀកស្មាគ្នាភាពក្លាហាន ម៉ឺងម៉ាត់ ប្តូរផ្តាច់ រក្សាការពារឱ្យខានតែបាននូវបូរណភាពនិងអធិបតេយ្យភាព ទឹកដីមិនរបេះរបូតឡើយ។ បន្ថែមនោះយើងមានទាំងកម្លាំងសាមគ្គី រួមសុខរួមទុក្ខ និងទទួលខុសត្រូវ ជាមួយប្រជាពលរដ្ឋយ៉ាងកក់ក្ដៅជាទីបំផុត របស់ថ្នាក់ដឹកនាំគ្រប់ជាន់ថ្នាក់របស់យើង។
ឯកឧត្តមបន្ថែមថា អំណោយទាំងនេះ ជាសារបង្ហាញសាមគ្គីភាពឥតងាករេ ឯកភាពជាតិខ្មែរជាធ្លុងមួយ ក្រោមការដឹកនាំរបស់រាជរដ្ឋាភិបាល ជាពិសេសឆ្លុះបញ្ចាំងថា ប្រជាពលរដ្ឋជាសមរភូមិក្រោយនៅតែគាំទ្រជានិច្ចចំពោះកងទ័ព និងជនភៀសសឹក។
ព័ត៌មានជាតិ ថ្មីៗ
លោក រិន ឡូត អភិបាលស្រុកបន្ទាយស្រី បានឱ្យដឹងថា ក្នុងស្រុកបន្ទាយស្រី មានបងប្អូនជាជនភៀសសឹកស្នាក់នៅប្រមាណជាង ១០៥០ គ្រួសារ។ ដោយឡែកចំពោះអំណោយដែលបានផ្ដល់ជូនបងប្អូនទាំង ២០៥គ្រួសារនាពេលនេះ ក្នុងមួយគ្រួសារទទួលបាន៖ អង្ករ ២៥គីឡូក្រាម មី១កេស គល់ស្លាបមាន់១គីឡូក្រាម ត្រីខកំប៉ុង១យួរ សាច់ក្រក១គីឡូក្រាម ប្រហុកលីង១កែវ ផ្អកសាច់ជ្រូក២កែវ សាច់ជ្រូកប្រឡាក់១គីឡូក្រាម កាពិលីង២កែវ ខោអាវ១ឈុត និងថវិកា៥ម៉ឺនរៀល។ ជាមួយនោះ ឯកឧត្តមបានប្រគេនព្រះសង្ឃនូវបច្ច័យចំនួន ១លានរៀល និងជូនគណៈកម្មាធិការគ្រប់គ្រងជនភៀសសឹកចំនួន ៥០ម៉ឺនរៀលផងដែរ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
