ថ្លែងក្នុងកិច្ចប្រជុំពិភាក្សាស្ដីពីការសិក្សាស្វែងយល់អំពីស្ថានភាពនៃការរៀបចំ និងប្រព្រឹត្តិទៅនៃរចនាសម្ព័ន្ធប្រព័ន្ធគ្រប់គ្រង និងមុខងាររបស់រាជធានីខេត្ត ក្រុងស្រុកខណ្ឌ នារសៀលថ្ងៃទី១៥ ខែសីហា ឆ្នាំ២០២៥ លោក សុខ ថុល អភិបាលរងខេត្តសៀមរាប បានបង្ហាញថា រាជរដ្ឋាភិបាលកម្ពុជា នឹងធ្វើការផ្ទេរមុខងារមួយចំនួនពីថ្នាក់ជាតិ ដល់រដ្ឋបាលថ្នាក់ក្រោមជាតិ ដែលនេះជាទិសដៅនៅក្នុងការជំរុញការអភិវឌ្ឍដល់ថ្នាក់មូលដ្ឋាន។
លោក សុខ ថុល បានលើកឡើងថា កាលពីពេលកន្លងទៅ រាជរដ្ឋាភិបាលបានសាកល្បងក្នុងការផ្ទេរមុខងារមួយចំនួនដូចជា វិស័យសុខាភិបាល វិស័យអប់រំ ជាដើមជូនមកដល់រដ្ឋបាលថ្នាក់ក្រោមជាតិ ដែលនេះជាការបង្ខិតសេវាទាំងនោះឱ្យកាន់តែជិតមូលដ្ឋាន ហើយនាពេលខាងមុខរាជរដ្ឋាភិបាល ក៏នឹងផ្ទេរមុខងារមកកាន់ថ្នាក់ក្រោមជាតិបន្ថែមទៀត។ ដូច្នេះកិច្ចប្រជុំកិច្ចប្រជុំពិភាក្សានាពេលនេះ ជាការស្វែងយល់បន្ថែមអំពីគុណសម្បត្តិ និងបញ្ហាប្រឈមនានា នៅក្នុងការធ្វើសមាហរណកម្មមុខងារកន្លងមក។
បើទោះជាយ៉ាងនេះក្តី លោក សុខ ថុល បានបញ្ជាក់ថា រាជរដ្ឋាភិបាលកម្ពុជា ទាំងអាណត្តិមុនៗដែលដឹកនាំដោយសម្តេចតេជោ ក៏ដូចជាអាណត្តិទី៧ ដែលដឹកនាំដោយសម្តេចធិបតី គឺបានយកចិត្តទុកដាក់ខ្លាំង នៅក្នុងការកែទម្រង់ប្រព័ន្ធរដ្ឋបាល ការផ្តល់អំណាចដល់ថ្នាក់មូលដ្ឋាន ដែលជាផ្នែកមួយក្នុងការជំរុញដល់ការអភិវឌ្ឍនៅមូលដ្ឋាន។ លោកថា ការផ្តល់មុខងារដល់ថ្នាក់មូលដ្ឋានពិតជាសំខាន់ ព្រោះវាបានផ្តល់ភាពងាយស្រួលដល់ប្រជាពលរដ្ឋនៅក្នុងការស្វែងរកសេវា៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
