បើតាមរបាយការណ៍របស់រដ្ឋបាលខេត្តសៀមរាប គិតត្រឹមល្ងាចថ្ងៃទី១៧ ខែសីហា ឆ្នាំ២០២៥នេះ បងប្អូនជនភៀសសឹកចំនួន ៣ ៤១៧គ្រួសារ ស្មើនឹង ១១ ១៤៧នាក់ បានកំពុងបន្តស្នាក់នៅតាមទីតាំងសុវត្ថិភាពនានា ក្នុងភូមិសាស្ត្រខេត្តសៀមរាប ក្រោមការយកចិត្តទុកដាក់ខ្ពស់ពីថ្នាក់ដឹកនាំខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ។
របាយការណ៍ដដែល បង្ហាញថា ក្នុងចំណោម៣ ៤១៧គ្រួសារ មាន១ ៩៥១គ្រួសារ ស្មើនឹង ៦ ៤០៦នាក់ កំពុងស្នាក់នៅតាមបណ្ដាទីតាំងសុវត្ថិភាព ដែលរៀបចំដោយរដ្ឋបាលខេត្ត និងរដ្ឋបាលក្រុងស្រុក និង ១ ៤៦៦គ្រួសារ ស្មើនឹង ៤ ៧៤១នាក់ បានកំពុងស្នាក់នៅតាមផ្ទះប្រជាពលរដ្ឋ។ ជាមួយគ្នានេះ សម្រាប់ថ្ងៃទី១៧ ខែសីហានេះដែរ ក៏មានបងប្អូនភៀសសឹកចំនួន ៤៣គ្រួសារ បានត្រឡប់មកស្នាក់នៅតាមទីតាំងនានាក្នុងខេត្តឡើងវិញ។ ដោយឡែកចំពោះកុមារ អាជ្ញាធរមូលដ្ឋានបានសម្របសម្រួលដល់ពួកគាត់ តាមរយៈការជំរុញឱ្យពួកគាត់ចូលរៀនជាបណ្ដោះអាសន្នគ្រប់កម្រិតនៅតាមសាលារៀនដែលនៅក្បែរទីតាំងស្នាក់នៅ។
របាយការណ៍ដដែល បញ្ជាក់ថា ដោយសារចំនួនកើនឡើងនៃអ្នកវិលត្រឡប់វិញនេះ អាជ្ញាធរក៏បានជួបបញ្ហាមួយចំនួន ដូចជាពុំមានសម្ភារប្រើប្រាស់គ្រប់គ្រាន់ ដូចជាមុង ភួយ ថ្នាំមូស ធុងទឹក សម្ភារផ្ទះបាយ ខ្វះខាតបន្ទប់ទឹក បង្គន់អនាម័យ ទឹកស្អាត អគ្គិសនី និងការពារសត្វអាសិរពិសដើម។ ក្នុងន័យនេះ រដ្ឋបាលខេត្តសូមអំពាវនាវដល់សប្បុរសជន បន្តចូលរួមឧបត្ថម្ភជាបន្ត ដើម្បីយកទៅចែកជូនបងប្អូនប្រជាពលរដ្ឋដែលកំពុងខ្វះខាត៕
អត្ថបទ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
