គិតត្រឹមថ្ងៃទី៨ ខែកញ្ញា ឆ្នាំ២០២៥ បងប្អូនប្រជាពលរដ្ឋដែលត្រឡប់មកពីប្រទេសថៃ ចូលមកខេត្តសៀមរាបវិញ មានចំនួនជាង ២៦ ០០០នាក់ ក្នុងនោះមានប្រមាណ ៥០០នាក់ បានមកទទួលសេវាប្រឹក្សាយោបល់ពីឱកាសស្វែងរកការងារ និងការបណ្ដុះបណ្ដាលជំនាញវិជ្ជាជីវៈ ពីមជ្ឈមណ្ឌលការងារខេត្តសៀមរាប។
លោក សៀង សុខុន ប្រធានមជ្ឈមណ្ឌលការងារខេត្តសៀមរាប បានឱ្យដឹងថា រាជរដ្ឋាភិបាលបាននិងកំពុងមានវិធានការ និងខិតខំស្វែងរកវិនិយោគិន មកបណ្ដាក់ទុននៅកម្ពុជាបន្ថែមទៀត ដែលអាចផ្ដល់ឱកាសការងារយ៉ាងច្រើនជូនដល់ប្រជាពលរដ្ឋខ្មែរ ជាពិសេសពលរដ្ឋដែលចំណាកស្រុកទៅក្រៅប្រទេស ជាពិសេសប្រទេសថៃ ដែលកំពុងមានបញ្ហាជាមួយកម្ពុជា។ ក្នុងនោះសម្រាប់ខេត្តសៀមរាប ក្រៅពីវិស័យទេសចរណ៍ វិស័យឧស្សាហកម្ម កសិកម្ម និងសេវាកម្ម ក៏មានតម្រូវការការងារផងដែរ ខណៈឱកាសការងារនៅទូទាំងប្រទេស មានប្រមាណជិត ១០ម៉ឺនកន្លែង។
លោក សៀង សុខុន បន្ដថា ដើម្បីផ្ដល់ភាពងាយស្រួលសម្រាប់ប្រជាពលរដ្ឋខ្មែរ ក្រសួងការងារ ក៏ដូចជាមជ្ឈមណ្ឌលការងារខេត្តសៀមរាប បានធ្វើការបង្ខិតសេវារបស់ខ្លួនឱ្យខិតជិតមូលដ្ឋានប្រជាពលរដ្ឋ ដើម្បីងាយស្រួលក្នុងការផ្ដល់នូវព័ត៌មានពីឱកាសការងារ និងការទទួលបានការបណ្ដុះបណ្ដាលជំនាញវិជ្ជាជីវៈ បានប្រែក្លាយទីតាំងមួយចំនួន ដូចជា ទីភ្នាក់ងារបេឡាសន្ដិសុខសង្គម, វិទ្យាស្ថានបណ្ដុះបណ្ដាលជំនាញវិជ្ជាជីវៈទាំង២ទីតាំងក្នុងខេត្ត ជាទីតាំងផ្ដល់ព័ត៌មានពីឱកាសការងារ និងការទទួលបានការបណ្ដុះបណ្ដាលជំនាញវិជ្ជាជីវៈ ជាពិសេសនោះ អាជ្ញាធរមូលដ្ឋាន ក៏បានសហការជាមួយមជ្ឈមណ្ឌលការងារ ដើម្បីទទួលបានព័ត៌មាននានាពីប្រជាពលរដ្ឋផងដែរ៕
អត្ថបទ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
