នៅព្រឹកថ្ងៃទី២០ ខែ មិថុនា ឆ្នាំ២០១៩នេះ នៅរដ្ឋបាលស្រុកវ៉ារិន មានរៀបចំពិធីប្រកាសចូលកាន់តំណែង ក្រុមប្រឹក្សា ស្រុក អាណត្តិទី៣ ក្រោមអធិបតីភាព លោក នាក់ ណេរ៉ុន អភិបាលរងខេត្ត ដោយមានការចូលរួម ពីសំណាក់អស់លោក លោកស្រី ថ្នាក់ដឹកនាំមន្ទីរ អាជ្ញាធរស្រុក កងកម្លាំងប្រដាប់អាវុធ តំណាងគណបក្សនយោបាយក្នុងក្រុមប្រឹក្សា និង មន្ត្រី អាជ្ញាធរក្នុងស្រុកជាច្រើនរូប។
មានប្រសាសន៍ក្នុងឱកាសនោះ លោក នាក់ ណេរ៉ុន បានគូសបញ្ជាក់ថា ក្នុងនាមជាសមាជិក ក្រុមប្រឹក្សា ដែលជាប់ឆ្នោតនេះ អស់លោក លោកស្រី ដែលមានសមាសភាពមកពីគណបក្សនយោបាយផ្សេងៗ ក៏ពិតមែន តែតាមគោលការណ៍ ច្បាប់ ក្រុមប្រឹក្សា គឺជាតំណាងប្រជាពលរដ្ឋទាំងមូល ត្រូវខិតខំបម្រើផលប្រយោជន៍ សេចក្តីតម្រូវការ របស់បងប្អូនប្រជាពលរដ្ឋ ដោយមិនប្រកាន់ពីនិន្នាការនយោបាយណាមួយឡើយ ។
លោក នាក់ ណេរ៉ុន បន្តថា មូលដ្ឋានគ្រឹះក្នុងការអនុវត្តការងាររបស់សមាជិកក្រុមប្រឹក្សា គឺត្រូវគោរពនូវគោលការច្បាប់ អង្គការវិន័យ ក្រមសីលធម៌ និងត្រូវសង្កត់ធ្ងន់លើការងារសន្តិសុខ សណ្តាប់ធ្នាប់ និង ការអនុវត្តគោលនយោបាយភូមិឃុំមានសុវត្តិភាព ពិសេស ការបង្ក្រាប់រាល់បទល្មើសព្រៃឈើ ការកាប់ទន្ទ្រានព្រៃយកដីធ្វើជាកម្មសិទ្ធ កុងត្រូលជជុះ និង ការជួញដូរគ្រឿងញៀនខុសច្បាប់ ដែលធ្វើឲ្យប៉ះពាល់យ៉ាងខ្លាំងដល់សន្តិសុខសង្គម ព្រមទាំងគ្រប់គ្រងឲ្យខាងតែបានចំពោះប្រជាពលរដ្ឋចំណាកស្រុក និង ចំណូល ក្នុងការធានានូវសុវត្ថិភាព និង សន្តិសុខបានល្អ ។
លោកអភិបាលរងខេត្ត ក៏បានធ្វើការកោតសរសើរ និង វាយតម្លៃខ្ពស់ ចំពោះសមទ្ធិផល ដែលស្រុកវ៉ារិន សម្រេចបានរយៈពេល៥ឆ្នាំមក ក្នុង អាណត្តិទី២ នៃក្រុមប្រឹក្សាស្រុក ពិតជាការចូលរួមចំណែក ក្នុងការពង្រឹងសន្តិភាព សិ្ថរភាពនយោបាយសង្គម បានធ្វើឲ្យ កម្ពុជាទទួលបានការគាំទ្រ ពីសំណាក់មជ្ឈដ្ឋានជាតិ អន្តរជាតិ ដៃគូ អភិវឌ្ឍន៍ ក៏ដូចអ្នកវិយោគនានា ដែលធ្វើឲ្យប្រជាពល រដ្ឋបានបោះជំហាន ទៅមុខបន្តទៀត ។
លោក នាក់ ណេរ៉ុន ក៏បានផ្តាំផ្ញើដល់លោក លោកស្រី ប្រធាន និង សមាជិកក្រុមប្រឹក្សាស្រុកវ៉ារិន ដែលត្រូវបានប្រកាសនៅពេលនេះ ត្រូវខិតខំប្រឹងប្រែងអនុវត្តបន្តការងារស្នូលរបស់ខ្លួន ដោយមានការឯកភាពផ្ទៃក្នុង សាមគ្គី ភាពល្អ ព្រមទាំងចេះបែងចែកនូវតួនាទីជូនដល់សមាជិកក្រុមប្រឹក្សារបស់ខ្លួន ដោយមិនបក្ខពួក ស្របពេលដែលរាជរដ្ឋាភិបាល នីតិកាលទី៦ នៃរដ្ឋសភា ដែលបានកំពុងបន្តជម្រុញការអនុវត្ត កម្មវិធីកម្រែទម្រង់ វិមជ្ឈការ និង វិសហមជ្ឈការ ឲ្យកាន់តែស៊ីជម្រៅថែមទៀត ។
លោកក៏សង្ឃឹមជឿរជាក់ថាក្រុមប្រឹក្សា គណៈអភិបាល មន្ត្រីអ្នកមុខអ្នកការ និងប្រជាពលរដ្ឋទាំងអស់ក្នុងស្រុកវ៉ារិន និងខិតខំបំពេញការងាររួមគ្នា ដើម្បីសម្រេចបាននូវសមទ្ធិផលថ្មី ថែមទៀត ក្នុងរយៈពេល៥ឆ្នាំខាងមុខ ជាពិសេស ត្រូវខិតខំបម្រើផលប្រយោជន៍ និង សេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព យុត្តិធម៌ មិនត្រូវប្រកាន់និន្នាការនយោបាយនោះឡើយ ក្នុងការឆ្លើយតបទៅនឹងតម្រូវការ ជាក់ស្តែងរបស់ប្រជាពលរដ្ឋក្នុងមូលដ្ឋាន។
សូមបញ្ជាក់ដែរថា សមាជិកក្រុមប្រឹក្សាស្រុកវ៉ានរិន សម្រាប់អាណត្តិទី៣នេះ មានសមាសភាពចំនួន១៧រូប ស្រី០២រូប មកពីគណបក្សប្រជាជនកម្ពុជាចំនួន ១៤រូប គណបក្សហ្វុនស៊ិនប៊ិច ចំនួន ២រូប គណបក្សរួបរួមជាតិ ០១រូប ដោយមានលោក ណេង ធូ ជាប្រធានក្រុមប្រឹក្សាស្រុកវ៉ារិន៕
អត្តបទនិងរូបថត៖រដ្ឋបាលខេត្តសៀមរាប
