នាព្រឹកថ្ងៃទី២០ ខែមិថុនា ឆ្នាំ២០១៩ ឯកឧត្តម ហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានដឹកនាំប្រតិភូគណៈកម្មការ ចុះបំពេញបេសកកម្មនៅខេត្តសៀមរាប និងជួបប្រជុំជាមួយរដ្ឋបាលខេត្តសៀមរាប ដើម្បីស្វែងយល់ពីស្ថានភាពនៃការអភិវឌ្ឍជារួមក្នុងខេត្ត សមិទ្ធផលដែលសម្រេចបាន និងពិនិត្យ តាមដាន នូវការអនុវត្តកម្មវិធីគោលនយោបាយរបស់រាជ រដ្ឋាភិបាល និងបញ្ហាប្រឈមនានានៃវិស័យទាំងបួនក្នុងបន្ទុក។
ឯកឧត្តម ហ៊ុន ម៉ានី បានលើកឡើងនៅក្នុងជំនួបកិច្ចប្រជុំនោះ ដោយបញ្ជាក់ថា ៖ យោងតាមតម្រូវការរបស់ប្រជាពលរដ្ឋកាន់តែវិវត្តន៍គួរកត់សម្គាល់នោះ ការអនុវត្តការងារប្រកបដោយភាពច្បាស់លាស់ត្រូវបានលើកកម្ពស់បន្ថែមទៀត ដើម្បីរក្សាបាននូវអ្វីដែលមានស្រាប់ ហើយបន្តជំរុញឱ្យមានភាពប្រសើរឡើងនូវកិច្ចការទាំងឡាយសម្រាប់ថ្ងៃខាងមុខ ដែលនោះគឺជាអ្វីដែលយើងទាំងអស់គ្នាត្រូវធ្វើ ដើម្បីឆ្លើយតប និង បំពេញសេចក្តីត្រូវការរបស់ប្រជាពលរដ្ឋឲ្យបានទាន់ពេលវេលា និងប្រកបដោយប្រសិទ្ធភាព ។
សេចក្តីរាយការណ៍ របស់ឯកឧត្តម ទៀ សីហា អភិបាលខេត្តសៀមរាប បានបង្ហាញថា ៖ ទោះបីខេត្តសៀមរាប ជាខេត្តដែលមានសក្តានុពលនៃវិស័យទេសចរណ៍ខ្ពស់ វិស័យផ្សេងៗទៀតក៏មានសារ:សំខាន់ ក៏មិនអាចខ្វះបាននោះឡើយ ដែលទាមទារឲ្យមានការយកចិត្តទុកដាក់ជាប្រចាំពីសំណាក់អាជ្ញាធរខេត្ត និងមន្ទីរជំនាញពាក់ព័ន្ធ ។
មួយផ្នែកនៃរបាយការណ៍នោះ អាជ្ញាធរខេត្តបានបញ្ជាក់ទៅលើវិស័យអប់រំថា ជាវិស័យដែលអាជ្ញាធរខេត្ត តែងបានយកចិត្តទុកដាក់ខ្ពស់ បើទោះបីជាវិស័យនេះ នៅមានបញ្ហាប្រឈមដោយអន្លើយ៉ាងណាក៏ដោយ ។ កន្លងមក អាជ្ញាធរខេត្តសៀមរាប បានបង្ហាញអំពីជំហរយ៉ាងម៉ឺងម៉ាត់ និងបានដាក់ចេញនូវវិធានការទាន់ពេលវេលា ដើម្បីឆ្លើយតបទៅនឹងបញ្ហាទាំងនោះ ដោយមានការណែនាំដល់មន្ទីរអប់រំ ធ្វើយ៉ាងណាលើកទឹកចិត្តដល់លោកគ្រូ អ្នកគ្រូ ឲ្យបន្តការព្យាយាមអស់ពីលទ្ធភាព ក្នុងការបណ្តុះបណ្តាលបង្ហាត់បង្រៀនសិស្សានុសិស្ស ក៏ដូចជាចូលរួមក្នុងការទប់ស្កាត់ បញ្ហាចំណាកស្រុក តាមរយ:នៃការចុះកិច្ចសន្យាជាមួយអាណាព្យាបាល ដើម្បីឲ្យពួកគាត់បញ្ជូនកូនមករៀន អោយបានទៀងទាត់ ។
គួរបញ្ជាក់ដែរថា ខេត្តសៀមរាប គឺជាខេត្តគោលដៅទី១៩ហើយ ដែលប្រតិភូគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានចុះបំពេញបេសកកម្ម ដើម្បីស្វែងយល់ពីស្ថានភាពនៃការអភិវឌ្ឍជារួមក្នុងខេត្ត សិក្សាអំពីសមិទ្ធផលដែលសម្រេចបាន និងពិនិត្យ តាមដាន នូវការអនុវត្តកម្មវិធីគោលនយោបាយរបស់រាជរដ្ឋាភិបាល និងបញ្ហាប្រឈមនានានៃ វិស័យទាំងបួនក្នុងបន្ទុក ហើយកិច្ចប្រជុំនេះបានប្រព្រឹត្តទៅ ដោយមានការចូលរួមពីសំណាក់ឯកឧត្តមប្រធានក្រុមប្រឹក្សាខេត្ត លោកប្រធាន មន្ទីរអប់រំ យុវជន កីឡា មន្ទីរធម្មការ និងកិច្ចការសាសនា មន្ទីរវប្បធម៌ និងវិចិត្រសិល្បៈ និង មន្ទីរទេសចរណ៍ខេត្តសៀមរាប ៕
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
