ខេត្តសៀមរាប គឺជាខេត្តគោលដៅ ងាយប្រឈមនឹងការរីករាលនៃមេរោគអេដស៍ បច្ចុប្បន្នខេត្តនេះ មានអ្នកជំងឺអេដស៍ជាង៤៥០០នាក់ កំពុងទទួលបានការព្យាបាល ដែលបញ្ហា និងការប្រឈមទាំងនេះ គឺបណ្ដាលមកពីការខ្វះចំណេះដឹង អំពីលទ្ធភាពចម្លងនៃមេរោគ រីឯការព្យាបាលមិនទៀងទាត់ ក៏ជាបញ្ហាចម្បង ដែលបង្កឲ្យរីករាលមេរោគអេដស៍ផងដែរ។
នេះបើតាមការលើកឡើងរបស់ ឯកឧត្ដម តែង គន្ធី អគ្គលេខាធិការ អាជ្ញាធរជាតិប្រយុទ្ធនឹងជំងឺអេដស៍ នៅក្នុងសិក្ខាសិលាផ្សព្វផ្សាយស្តីពី «ការទប់ស្កាត់ការរីករាលដាលមេរោគអេដស៍ និងជម្ងឺអេដស៍ និងការប្រើប្រាស់គ្រឿងញៀន» នាព្រឹកថ្ងៃទី ២០ ខែមិថុនាឆ្នាំ២០១៩ នេះ នៅមន្ទីរបរិស្ថានខេត្តសៀមរាប។
ឯកឧត្ដម តែង គន្ធី បានបង្ហាញថា នៅប្រទេសកម្ពុជាបច្ចុប្បន្ន អត្រាអ្នកផ្ទុកមេរោគអេដស៍មានចំនួន០.៦ភាគរយ ស្មើនឹង ៦៨,៦៧៨នាក់ ដែលមនុស្សពេញវ័យចាប់ពីអាយុ ១៥ ដល់៤៩ឆ្នាំ។ តាមរយៈស្ថិតិ កាលពីឆ្នាំ២០១៧ អ្នកឆ្លងមេរោគអេដស៍ថ្មី មានចំនួន៥៧២នាក់ ក្នុងនោះ ៥០ភាគរយគឺជាស្ត្រី។ ក្នុងនោះ ក្រុមប្រឈមមុខខ្ពស់ នៃការចម្លងមេរោគអេដស៍មាន ៣ក្រុមគឺ ទីមួយ ក្រុមស្ត្រីធ្វើការនៅកន្លែងកម្សាន្តសប្បាយមនុស្សពេញវ័យ ទីពីរ ក្រុមបុរសរួមភេទជាមួយបុរសនិងក្លែងភេទ និងទីបី ក្រុមប្រើប្រាស់គ្រឿងញៀន។
លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា នៃអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថា ការងារផ្សព្វផ្សាយអប់រំជាការងារអាទិភាព ដែលយើងទាំងអស់គ្នា ត្រូវបន្តយកចិត្តទុកដាក់ផ្សព្វផ្សាយការយល់ដឹងពីបញ្ហាគ្រឿងញៀននេះដល់បុគ្គលិក មន្ត្រីរាជការ ឧទ្យាននុរក្ស សម្រាប់បង្ការខ្លួនគាត់ ក្រុមគ្រួសារគាត់កុំឲ្យធ្លាក់ចូលទៅក្នុងអន្ទាក់នៃគ្រឿងញៀន។
លោក បន្តថា ការយល់ដឹងពីបញ្ហាគ្រឿងញៀន និងបញ្ហាជំងឺអេដស៍ មេរោគអដស៍ ធ្វើឲ្យសហគមន៍មានសុវត្ថិភាព ។ ក្នុងឱកាសនោះ លោកក៏បានស្នើ ឲ្យក្រសួងបរិស្ថាន និងអាជ្ញាធរមូលដ្ឋានបន្តយកចិត្តទុកដាក់លើការងារផ្សព្វផ្សាយអប់រំនេះឲ្យបានជាប់ជាប្រចាំដូចភ្លៀងរលឹម។
ឆ្លៀតក្នុងឱកាសនោះដែរ ឯកឧត្តម សាបូ អូហ្សាណូ ណូ តំណាងឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន និងជារដ្ឋលេខាធិការក្រសួងបរិស្ថាន បានថ្លែងអំណរគុណលោកប្រធានមន្ទីរបរិស្ថានខេត្តសៀមរាប ដែលបានខិតខំរៀបចំឲ្យមានសិក្ខាសិលានេះឡើង។ ក្រសួងបរិស្ថាននឹងបន្តសហការជាមួយនឹងគណៈកម្មាធិការប្រយុទ្ធប្រឆាំងគ្រឿងញៀននិងជម្ងឺអេដស៍ អង្កការដៃគូ ក៏ដូចជាអង្កភាពមន្ទីរទាំង២៥ខេត្តក្រុង ដើម្បីធ្វើការបញ្ជ្រាប អប់រំផ្សព្វផ្សាយ ទាក់ទងនិងបញ្ហានៃការ រីករាលដាលមេរោគអេដស៍ និងជម្ងឺអេដស៍ និងការប្រើប្រាស់គ្រឿងញៀនដល់មន្រី្តរាជការគ្រប់ជាន់ថ្នាក់ ក៏ដូចជាបងប្អូនប្រជាពលរដ្ឋទូទាំងប្រទេស មានការយល់ឲ្យកាន់តែច្បាស់ ពីមូលហេតុនៃការឆ្លង និងរីករាលដាលមេរោគអេដស៍និងជម្ងឺអេដស៍នេះ និងធ្វើយ៉ាងណាចូលរួមកាត់បន្ថយអាត្រានៃអ្នកផ្ទុកមេរោគអេដស៍នៅកម្ពុជាឲ្យមានកម្រិតទាបបំផុត នៅក្នុងឆ្នាំ២០២៥-២០៣០ខាងមុខ។
