ក្រុមការងារចម្រុះ របស់រដ្ឋបាលខេត្តសៀមរាប នឹងបន្តអនុវត្តន៍ការកាត់ទម្លាក់ បណ្តាញខ្សែកាប្លិ៍លើអាកាស ជំហានទី១០ នៅលើតាមបណ្ដាផ្លូវសំខាន់ៗក្នុងក្រុងសៀមរាប នៅថ្ងៃទី២៤ ខែមិថុនា ឆ្នាំ២០១៩ ខាងមុខនេះ ដើម្បីរក្សាសណ្ដាប់ធ្នាប់ បញ្ចៀសហានិភ័យនានា ព្រមទាំងធ្វើឲ្យសោភណ្ឌភាពក្នុងទីក្រុងប្រវត្តិសាស្ត្រមួយនេះ កាន់មានភាពស្រស់បំព្រងបន្ថែមទៀត។
មានប្រសាសន៍នៅសៀលថ្ងៃទី២០ ខែមិថុនា ឆ្នាំ២០១៩ លោក នល់ ខាន់រ៉ា អនុប្រធានមន្ទីរប្រៃសណីយ៍ និងទូរគមនាគមន៍ខេត្តសៀមរាប បានបញ្ជាក់ថា ការកាត់ទម្លាក់ បណ្តាញខ្សែកាបលើអាកាស រដ្ឋបាលខេត្តសៀមរាប បានចេញសេចក្តីជូនដំណឹង តាំងពីថ្ងៃទី១១ ខែឧសភា ឆ្នាំ២០១៨ម្ល៉េះ ដើម្បីរៀបចំសោភ័ណភាព សណ្តាប់ធ្នាប់ និងរបៀបរៀបរយសាធារណៈ បណ្តាញខ្សែកាប្លិ៍អាកាសក្នុងក្រុងសៀមរាប ។ ចំពោះប្រតិបត្តិការណ៍ជំហានទី១០នេះ មាន២គោលដៅ គឺគោលដៅទី១ ចាប់ភ្លើងស្តុបបេនឡានចុងកៅស៊ូ ទៅដល់ផ្លូវបំបែក៧មករា និង គោលដៅទី២ ចាប់ពីរង្វង់មូលផ្សារចាស់ ទៅដល់ផ្លូវបំបែកផ្សារក្រោម ក្នុងក្រុងសៀមរាប។
យោងតាមការអំពាវនាវបន្ថែម បើទោះជាការអនុវត្តសេចក្តីជូនដំណឹង ត្រូវបានចូលជាធរមានក្ដី ក៏អាជ្ញាធរខេត្តនៅបន្តឲ្យមានការសម្របសម្រួលផងដែរ ចំពោះបណ្តាក្រុមហ៊ុន ដែលមានឆន្ទៈចូលរួមសហការអនុវត្ត ប៉ុន្តែមានភាពយឺតយ៉ាវក្នុងការអនុវត្តតាមសេចក្ដីជូនដំណឹង ដោយមានមូលហេតុច្បាស់លាស់។
លោក នល់ ខាន់រ៉ា ក៏បានបញ្ជាក់ផងដែរថា រយៈពេលនៃប្រតិបត្តិការនេះមិនបានកំណត់ច្បាស់លាស់នោះទេ អាស្រ័យដោយភាពចាំបាច់របស់អាជ្ញាធរខេត្ត។ ទន្ទឹមនឹងនោះ លោកបានថ្លែងអំណរគុណ ដែលក្រុមហ៊ុនពាក់ព័ន្ធបានចូលរួមសហការយ៉ាងសស្រាក់សស្រាំ ព្រមទាំងមានការសាទរពីប្រជាពលរដ្ឋក្នុងខេត្តសៀមរាបផងដែរ។
សូមជម្រាបថា បណ្ដាញខ្សែកាប្លិ៍ ដែលបានធ្វើការកាត់ទម្លាក់កន្លងមក ភាគច្រើន ជាខ្សែកាប្លិ៍ទូរទស្សន៍ អ៊ិនធើណិត និងទូរស័ព្ទ របស់ក្រុមហ៊ុនជាង១០ក្រុមហ៊ុន ដែលបាននិងកំពុងបំពាក់នៅលើបង្គោលបណ្តាញអគ្គីសនីខេត្តសៀមរាប និងនៅតាមបណ្ដាផ្លូវសំខាន់ៗក្នុងក្រុងសៀមរាប ដែលវាបានធ្វើឲ្យប៉ះពាល់ដល់សោភណ្ឌភាព និងហានិភ័យផ្សេងៗក្នុងក្រុងសៀមរាប។
អត្ថបទ និងរូបភាព៖ លោក អ៊ិន សីហរិទ្ធ
កែសម្រួលអត្ថបទ៖ លោក សេង ផល្លី
