វេទិកាសន្ទនារវាងវេទិកាសម្ព័ន្ធសង្គមស៊ីវិលជាមួយអង្គការ សមាគម សហជីព និងសហគមន៍ ក្នុងខេត្តសៀមរាប ដែលមាន អង្គការមិនមែនរដ្ឋាភិបាល សមាគម សហជីព និងសហគមន៍ ចូលរួមប្រមាណ២០០ស្ថាប័ន បានបង្ហាញពីកិច្ចសហប្រតិបត្តិការ និងភាពជាដៃគូល្អ រវាងរាជរដ្ឋាភិបាល រដ្ឋបាលថ្នាក់ក្រោមជាតិ ជាមួយដៃគូអភិវឌ្ឍ វិស័យឯកជន អង្គការសង្គមស៊ីវិល និងសហគមន៍នានានៅមូលដ្ឋាន ដែលវាបានប្រមូលនូវធាតុចូលសំខាន់ៗជាច្រើន ដើម្បីជំរុញឲ្យការអភិវឌ្ឍសេដ្ឋកិច្ចកម្ពុជា មានការរីកចម្រើនលើគ្រប់វិស័យ ប្រកបដោយចីរភាព។
មានប្រសាសន៍នៅថ្ងៃទី២១ ខែមិថុនា ឆ្នាំ២០១៩ នៅរដ្ឋបាលសាលាខេត្តសៀមរាប ឯកឧត្តម កឹមរ័ត្ន ពិសិដ្ឋ រដ្ឋលេខាធិការស្តីទីការគណៈរដ្ឋមន្ត្រី និងជាប្រធានក្រុមប្រឹក្សាភិបាល នៃវេទិកាសម្ព័ន្ធសង្គមស៊ីវិល (វ.ស.ស) បានបង្ហាញថា វេទិកាដូចគ្នានេះ បានរៀបចំម្ដងរួចម្ដងមកហើយកាលពីថ្ងៃទី០៧ ខែមីនា ឆ្នាំ២០១៨ វេទិកាលើកទី២នេះ រាជរដ្ឋាភិបាលកម្ពុជា បានបង្កើតវាឡើង ដើម្បីស្ដាប់មតិយោបល់ អំពីបញ្ហាប្រឈម និងសំណូមពរនានា របស់ដៃគូអភិវឌ្ឍ និងធ្វើការដោះស្រាយ ក៏ដូចប្រមូលបញ្ហាប្រឈមនានាដែលមិនទាន់ដោះស្រាយ ដាក់ជូន ប្រមុខរាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី។
ឯកឧត្តម កឹមរ័ត្ន ពិសិដ្ឋ បានបន្ថែមថា ឆ្នាំ២០១៩នេះ វេទិកាសន្ទនារវាងវេទិកាសម្ព័ន្ធសង្គមស៊ីវិលជាមួយអង្គការ សមាគម សហជីព និងសហគមន៍ ក្រោមប្រធានបទ “ការពង្រឹងតួនាទីរបស់អង្គការសង្គមស៊ីវិលក្នុងកិច្ចសហការជាមួយរាជរដ្ឋាភិបាល ដើម្បីសម្រេចបានគោលដៅអភិវឌ្ឍប្រកបដោយចីរភាព” បានធ្វើបទបង្ហាញ និងផ្ដល់ចំណេះដឹងសំខាន់ៗជាច្រើន ដើម្បីឲ្យអង្គការក្រៅរដ្ឋាភិបាល ដៃគូអភិវឌ្ឍ និងវិស័យឯកជន យល់អំពីតួនាទីរបស់ខ្លួនកាន់តែច្បាស់ ក្នុងនោះវេទិកានេះ ក៏បានអញ្ជើញអ្នកជំនាញផ្នែកច្បាប់ ពីអង្គការជំនួយផ្នែកច្បាប់កម្ពុជា ធ្វើបទបង្ហាញពីទិដ្ឋភាពច្បាប់ និងច្បាប់ពន្ធដារពាក់ព័ន្ធនឹងវិស័យសង្គមស៊ីវិលផងដែរ។
ឯកឧត្តម កឹមរ័ត្ន ពិសិដ្ឋ បានបញ្ជាក់ថា ជាមួយគ្នានោះដែរ ដៃគូអភិវឌ្ឍ វិស័យឯកជន អង្គការសង្គមស៊ីវិល ក៏នឹងចូលរួមសម្រេច នូវគោលដៅអភិវឌ្ឍ ប្រកបដោយចីរភាព២០៣០ ដែលជាក្របខណ្ឌ នៃគោលដៅអភិវឌ្ឍរួម ទូទាំងសាកលលោក របស់អង្គការសហប្រជាជាតិ ជាមួយនឹងប្រទេសកម្ពុជាផងដែរ ខណៈកម្ពុជាជាសមាជិកមួយនៃបណ្ដាសមាជិក ជិត២០០ប្រទេស ដែលបានឯកភាពបេ្ដជ្ញា សម្រេចគោលដៅអភិវឌ្ឍនេះ ដោយមិនទុកនរណាម្នាក់ចោល។
មានប្រសាសន៍ក្នុងឱកាសនោះ លោក ពៅ ពិសិដ្ឋ អភិបាលរងខេត្តសៀមរាប បានទទួលស្គាល់ថា អង្គការសង្គមស៊ីវិលក្នុងស្រុក និងបរទេស សហជីព និងសហគមន៍ បានដើរតួនាទីយ៉ាងសំខាន់ក្នុងការផ្តល់ និងគាំទ្រដល់សេវាសង្គមនៅតាមមូលដ្ឋានជនបទ និងសហគមន៍ដាច់ស្រយាល និងធ្វើសកម្មភាពនៅគ្រប់ក្រុង-ស្រុក ក្នុងវិស័យសំខាន់ៗ ដែលពាក់ព័ន្ធនឹងសេដ្ឋកិច្ចសង្គមនៅក្នុងខេត្តសៀមរាប ក៏ដូចជាលើកកម្ពស់ជីវភាពបងប្អូនប្រជាពលរដ្ឋយ៉ាងផុសផុល និងរួមចំណែកកាត់បន្ថយភាពក្រីក្រជាមួយរាជរដ្ឋាភិបាលកម្ពុជា។ ក្នុងនោះ អង្គការសង្គមស៊ីវិល ក៏បានចូលរួមផងដែរក្នុងការតស៊ូមតិឲ្យមានកំណែទម្រង់ជាតិ ដើម្បីលើកកម្ពស់សុខភាព អប់រំ អភិបាលកិច្ច សិទ្ធិមនុស្ស ប្រព័ន្ធយុត្តិធម៌ ច្បាប់ សេវាសង្គម បរិស្ថាន សុខុមាលភាពស្ត្រី និងកុមារ។
តាមរយៈច្បាប់ស្តីពីសមាគម និងអង្គការមិនមែនរដ្ឋាភិបាល និងច្បាប់ស្តីពីសហជីព ក្នុងរដ្ឋធម្មនុញ្ញឆ្នាំ១៩៩៣ សមាគម-អង្គការមិនមែនរដ្ឋាភិបាល និងសហជីព ដែលបានចុះបញ្ជីត្រឹមត្រូវតាមច្បាប់កំណត់ មានសិទ្ធិពេញលេញក្នុងការធ្វើសកម្មភាពក្នុងព្រះរាជាណាចក្រកម្ពុជា ស្របតាមច្បាប់ និងលក្ខន្តិកៈរបស់ខ្លួនដែលបានតម្កល់នៅក្រសួងមហាផ្ទៃ និងអនុស្សរណៈជាមួយក្រសួងការបរទេស និងសហប្រតិបត្តិការអន្តរជាតិ និងលក្ខន្តិកៈរបស់ខ្លួនដែលបានតម្កល់នៅក្រសួងការងារ និងបណ្តុះបណ្តាលវិជ្ជាជីវៈ។ ទន្ទឹមនេះ សមាគម-អង្គការមិនមែនរដ្ឋាភិបាល និងសហជីព ក៏ទទួលបានការលើកទឹកចិត្ត និងការអនុគ្រោះនានា ស្របតាមច្បាប់ និងបទប្បញ្ញត្តិនានាជាធរមាន ប៉ុន្តែរាល់សកម្មភាពទាំងនោះ ត្រូវស្ថិតនៅក្រោមក្របខណ្ឌច្បាប់ និងដាច់ខាតមិនត្រូវធ្វើសកម្មភាពណាមួយប៉ះពាល់ដល់សន្តិសុខ សន្តិភាព និងសេចក្តីសុខសាន្តរបស់ប្រជាពលរដ្ឋទូទៅឡើយ។
លោក ពៅ ពិសិដ្ឋ បានអំពាវនាវ ដល់មន្ទីរ-អង្គភាពពាក់ព័ន្ធ និងអាជ្ញាធរមូលដ្ឋាន ត្រូវសម្របសម្រួល និងបង្កលក្ខណៈងាយស្រួលដល់ សមាគម-អង្គការមិនមែនរដ្ឋាភិបាល និងសហជីពស្របច្បាប់ទាំងនោះ ក្នុងការធ្វើសកម្មភាពដោយសេរី គ្មានការគំរាមកំហែង និងមិនលំអៀង ស្របតាមច្បាប់ស្តីពីសមាគម និងអង្គការមិនមែនរដ្ឋាភិបាល ច្បាប់ស្តីពីសហជីព ច្បាប់ និងលិខិតបទដ្ឋានគតិយុត្តនានាជាធរមាន។
លោក អភិបាលរងខេត្ត ក៏បានស្នើដល់ សមាគម និងអង្គការមិនមែនរដ្ឋាភិបាល សហជីព សហគមន៍ និងដៃគូអភិវឌ្ឍនានា បន្តផ្តល់ការគាំទ្រ និងចូលរួមជាមួយរាជរដ្ឋាភិបាលកម្ពុជា ក៏ដូចជាអាជ្ញាធរខេត្តសៀមរាប ក្នុងការលើកកម្ពស់លទ្ធិប្រជាធិបតេយ្យ និងការអភិវឌ្ឍសេដ្ឋកិច្ចជាតិឲ្យកាន់តែមានភាពរីកចម្រើន និងរុងរឿង ដូចបណ្តាប្រទេសនានាលើសាកលលោក ជាពិសេសសូមបន្តចូលរួម និងគាំទ្រគម្រោងផែនការអភិវឌ្ឍន៍ ០៥ឆ្នាំ និងគម្រោងវិនិយោគ ០៣ឆ្នាំរំកិលរបស់រដ្ឋបាលខេត្ត រដ្ឋបាលក្រុង-ស្រុក និងឃុំ-សង្កាត់។
អត្ថបទ៖ សេង ផល្លី
រូបភាព៖ លោក អ៊ុន ណារាជ្យ និងលោក ងិន គឹមឡេង
