ភ្ញៀវទេសចរណ៍បរទេសបានសម្រុកនាំគ្នាមកតាមជនបទ ដើម្បីជិះរទេះគោ និងដើរទស្សនាកម្សាន្តនូវកសិទេសចរណ៍ របស់ពលរដ្ឋនៅក្នុងសង្កាត់ជ្រាវ និងសង្កាត់សៀមរាបនៃក្រុងសៀមរាប។ នេះជាផ្នែកមួយនៃទេសចរណ៍ធម្មជាតិដែលត្រូវបានបង្កើតឡើងក្នុងគោលបំណងលើកកម្ពស់ផលិតផលកសិកម្មក្នុងស្រុក ជាពិសេសប្រជាកសិករ អាចបង្កើនចំណូលបន្ថែម ក្រៅពីប្រកបមុខរបរកសិកម្ម ។
ការបង្កើតវិស័យទេសចរណ៍នេះបានចូលរួមនៅក្នុងកំណើនសេដ្ឋកិច្ចជាតិតាមរយៈការបង្កើតឱកាសការងារ ការរកប្រាក់ចំណូល ការកាត់បន្ថយភាពក្រីក្រ ការលើកកម្ពស់ជីវភាពរស់នៅនិងលើកកម្ពស់វប្បធម៌និងប្រវត្ដិសាស្ដ្រផងដែរ។
លោក គ្រួច លី ជាអ្នករៀបចំពលរដ្ឋក្នុងសង្កាត់ជ្រាវ ក្នុងលើវិស័យដឹកជញ្ជូនតាមរទះគោ បានឲ្យដឹងថា រទេះគោខ្មែរនាបច្ចុប្បន្ននេះកំពុងទទួលបានការចាប់អារម្មណ៍ជាខ្លាំងពីសំណាក់ភ្ញៀវទេសចរបរទេស សម្រាប់ជិះទស្សនាទិដ្ឋភាពទេសចរបៃតងដែលជាប្រភេទដំណាំដាំដុះដោយមិនប្រើជាតិគីមី ដែលមាននៅក្នុងភូមិ និងនៅតំបន់ព្រៃលិចទឹកមួយចំនួនជាពិសេសការកម្សាន្តដោយសារ ជិះរទេះគោនេះមិនត្រឹមធ្វើឲ្យពួកគាត់មានអារម្មណ៍ភ្លឺថ្លា ប៉ុណ្ណោះនោះទេ គឺធ្វើឲ្យពួកគាត់បានស្គាល់ពីវប្បធម៌ អរិយធម៌ និងប្រពៃណីទំនៀមទម្លាប់ខ្មែរនៅក្នុងតំបន់ជនបទដែលមានតាំងពីបុរាណមកម្ល៉េះ ។
សេវាកម្មដោយការប្រើរទេះគោនេះ គឺជាផ្នែកមួយដែលមិនត្រឹមតែធ្វើឲ្យពលរដ្ឋកាត់បន្ថយការធ្វើការចំណាកស្រុក ប៉ុន្ដែវាថែមទាំងបានជួយដល់ការអភិរក្សនូវរទេះគោខ្មែរសម្រាប់យុវជនជំនាន់ក្រោយបានស្គាល់ និងយល់ដឹងពីវប្បធម៌ដូនតារបស់ខ្មែរយើងពីជំនាន់មុនផងដែរ។
វិស័យអេកូទេសចរត្រូវបានរដ្ឋាភិបាលចាត់ទុកជាឧបករណ៍ដ៏មានប្រសិទ្ធភាពក្នុងការកាត់បន្ថយភាពក្រីក្រនៅតាមជនបទ តាមរយៈការពង្រីកសកម្មភាពទេសចរណ៍ទៅកាន់តំបន់ដាច់ស្រយាល ដើម្បីបង្កើតការងារនៅនឹងកន្លែង ដែលចូលរួមកាត់បន្ថយការចំណាកស្រុក។
ពិសេស គឺប្រជាជនក្នុងសហគមន៍ អាចបង្កើតប្រាក់ចំណូលដោយផ្ទាល់ និងមិនផ្ទាល់ទៅកាន់សហគមន៍ដូចជា ការផ្តល់ការងារ កាត់បន្ថយចំណាកស្រុក ហើយវិស័យនេះចូលរួមចំណែកយ៉ាងសំខាន់ក្នុងការអភិរក្សសម្បត្តិវប្បធម៌ ការការពារបរិស្ថាន និងធនធានធម្មជាតិរបស់ខ្មែរឲ្យបានគង់វង្សផងដែរ ។
អត្ថបទ រូបភាព ៖ គឿន វេត
កែសម្រួល ហាំ ម៉េងហួត
