ទូរទស្សន៍ជាតិហ្វីលីពីន (ANAK TV) គ្រោងនឹងផលិតកម្មវិធី ប្រឡងប្រណាំងផលិតខ្សែវីដេអូ ដើម្បីកុមារសម្រាប់តំបន់អាស៊ីអាគ្នេយ៍ នៅក្នុងតំបន់រមណីយដ្ឋានអង្គរ នៅចុងខែវិច្ឆិកា ឆ្នាំ២០១៩នេះ ដែលវានឹងបង្ហាញពីការលើកស្ទួយតម្លៃនៃទេពកោលសល្យរបស់កុមារ ហើយនិងភាពទាក់ទាញនៃតំបន់ទេសចរដ៏សំបូរបែបនៅកម្ពុជាផងដែរ។
តាមរយៈ ពិភាក្សាការងារ រវាងលោក សុខ ថុល នាយករដ្ឋបាលសាលាខេត្ត ជាមួយលោកស្រី អែលវីរ៉ា យេប ហ្គោ (Elvira Yap Go) ប្រធានទូរទស្សន៍ជាតិ ANAK TV និងជាប្រធានគណ:កម្មការប្រឡងប្រណាំងខ្សែវីដឹអូដើម្បីកុមារសម្រាប់តំបន់អាស៊ីអាគ្នេយ៍ នៃ ប្រទេសហ្វីលីពីន ( SEAVFC ) នារសៀលថ្ងៃទី២១ ខែមិថុនា ឆ្នាំ២០១៩ លោកស្រី អែលវីរ៉ា យេប ហ្គោ បានមានប្រសាសន៍ថា គណ:កម្មការប្រឡងប្រណាំងខ្សែវីដេអូ ដើម្បីកុមារសម្រាប់តំបន់អាស៊ីអាគ្នេយ៍ បានជ្រើសរើសយកទីក្រុងសៀមរាប-អង្គរ ជាកន្លែងបើកព្រឹត្តិការណ៍លើកទី៣របស់ខ្លួន នៅចុងឆ្នាំ២០១៩នេះ។ ការជ្រើសរើស តំបន់ឧទ្យានប្រវត្តិសាស្ត្រអង្គរនេះ ដោយយោងតាមភាពល្បីល្បាញ និងជាតំបន់ដ៏ទាក់ទាញបំផុត សម្រាប់ការទស្សនា នៃភ្ញៀវទេសចរលើពិភពលោក។
ប្រសាសន៍របស់លោកស្រី បានបង្ហាញឲ្យដឹងថា ជាមួយនឹងគម្រោងរៀបចំកម្មវិធីនេះ គណ:កម្មការប្រឡង ប្រណាំងខ្សែវីដេអូ ដើម្បីកុមារសម្រាប់តំបន់អាស៊ីអាគ្នេយ៍លើកទី៣នេះ ជាបឋមគឺស្នើសុំកិច្ចសហការជាមួយអាជ្ញាធរខេត្ត និងបណ្តាមន្ទីរពាក់ព័ន្ធផងដែរ ។ ជាមួយនេះ អ្វីដែលជាកត្តាសំខាន់ គឺស្នើសុំការគាំទ្រសហការពីសំណាក់សហភាពសហព័ន្ធយុវជនកម្ពុជា ក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ ក្រសួងទេសចរណ៍ និងអគ្គនាយកដ្ឋានវិទ្យុ និងទូរទស្សន៍បាយ័ន ។
គម្រោងរៀបចំកម្មវិធីនេះដែរ លោកស្រី ប្រធានទូរទស្សន៍ជាតិហ្វីលីពីន បានស្នើសុំកិច្ចសហការ ពីអាជ្ញាធរខេត្តសៀមរាប និងបណ្តាមន្ទីរពាក់ព័ន្ធក្នុងខេត្ត និងជាពិសេស លោកស្រី ស្នើសុំការគាំទ្រសហការពីសំណាក់សហភាពសហព័ន្ធយុវជនកម្ពុជា ក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ ក្រសួងទេសចរណ៍ និងអគ្គនាយកដ្ឋានវិទ្យុ និងទូរទស្សន៍បាយ័ន ។
តាមរយៈនៃកិច្ចពិភាក្សាគ្នាជាលើកដំបូងនេះ លោក សុខ ថុល នាយករដ្ឋបាល សាលាខេត្តសៀមរាប បានបង្ហាញពីជំហរ នៃការគាំទ្រចំពោះកម្មវិធីនេះ ដោយបានជម្រាបទៅភាគីហ្វីលីពីនថា នឹងរាយការណ៍ និងស្នើសុំគោលការណ៍សម្រេចពីឯកឧត្តមអភិបាលខេត្ត ។ លោកសង្ឃឹមខ្ពស់ថា សំណើនេះ នឹងមានការឆ្លើយតបក្នុងលទ្ធផលជាវិជ្ជមាន និងផ្តល់ជូននូវកិច្ចសហការយ៉ាងពេញទំហឹង ដើម្បីឲ្យដំណើរការនៃកម្មវិធី ប្រព្រឹត្តិនេះទៅបានល្អប្រសើរ ៕
អត្ថបទ និងរូបភាព៖ លោក ងិន គឹមឡេង
កែសម្រួលអត្ថបទ៖ លោក សេង ផល្លី
