រសៀលថ្ងៃទី២១ ខែ មិថុនា ឆ្នាំ ២០១៩នេះ លោក ស៊ុន គង់ ត្រូវបានតែងតាំង ជាប្រធានមន្ទីរមន្ទីរបរិស្ថានខេត្តសៀមរាប ក្រោមអធិបតីភាព ឯកឧត្តម សាយ សំអាល រដ្ឋមន្ត្រីក្រសួងបរិស្ថាន ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និងឯកឧត្តម អ៊ឹង ហឿន ប្រធានក្រុមប្រឹក្សាខេត្ត រួមនឹងថ្នាក់ដឹកនាំមន្ទី អង្គភាព អាជ្ញាធរក្រុង ស្រុក និង មន្ត្រីរាជការនៃសាម៉ីមន្ទីរចូលរួមយ៉ាងច្រើនកុះករ។
ក្នុងកិច្ចស្វាគមន៍របស់ឯកឧត្តម ទៀ សីហា អភិបាលខេត្តសៀមរាប ក៏បានមានប្រសាសន៍ថា ការប្រកាសមុខតំណែងប្រធានមន្ទីរបរិស្ថានខេត្តសៀមរាប គឺជាការប្រគល់ភារកិច្ច និង ការទទួលខុសត្រូវមួយយ៉ាងធំធេងថែមទៀត ដែលតម្រូវឲ្យសាម៉ីខ្លួន ត្រូវតែបញ្ចេញឲ្យអស់ពីមត្ថភាព លទ្ធភាព និង ទេពកោសល្យ ដើម្បីជំនះបានរាល់ភាពលំបាកនានា ដែលកើតមានឡើងកន្លងមក ។
ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានមានប្រសាសន៍ថា ឯកភាព និង គាំទ្រនូវប្រសាសន៍មួយចំនួន ដែល ឯកឧត្តមអភិបាលខេត្តបានលើកឡើង ព្រមទាំងបានបញ្ជាក់ថា ក្នុងបរិការណ៍ដែលរាជរដ្ឋាភិបាលបាននឹងកំពុងអនុវត្តន៍គោលនយោបាយ និង យុទ្ធសាស្ត្រនានា ក្នុងក្របខណ្ឌនៃកំណែទម្រង់ស៊ីជម្រៅ ដើម្បីលើកកម្ពស់ប្រសិទ្ធភាពការងារ ការផ្តល់សេវាសាធារណៈជូនប្រជាពលរដ្ឋ ក៏ដូចការពង្រឹងមូលដ្ឋានសម្រាប់ការអភិវឌ្ឍសេដ្ឋកិច្ចសង្គម សុខសន្តិភាព និងស្ថិរភាពនយោបាយឲ្យកាន់តែរឹងមាំ។
ឆ្លៀងក្នុងនោះ ឯកឧត្តមរដ្ឋមន្ត្រីផ្តាំផ្ញើ និង ផ្តល់នូវអនុសាសន៍មួយចំនួន សម្រាប់លោកប្រធានមន្ទីរបរិស្ថានដែលទើបឡើងកាន់មុខតំណែងថ្មី ដើម្បីក្នុងការអនុវត្តពីតួនាទី ភារកិច្ចរបស់ខ្លួនទទួលបានលទ្ធផល គឺត្រូវគោរពឲ្យបាននូវច្បាប់ ក្នុងឧត្តម្ភប្រយោជន៍ជាតិជាធំ និង អនុវត្តនូវគោលនយោបាយកម្មវិធី ថ្នាក់ជាតិ ព្រមទាំងបង្កើនការទំនាក់ទំនងឲ្យបានល្អ ជាមួយថ្នាក់ដឹកនាំ មន្ទីរអង្គភាព និង ត្រូវបង្កើនចំណេះដឹង ពង្រឹង សាមគ្គីផ្ទៃក្នុងឲ្យបានល្អ ក្នុងការដឹកនាំមន្ត្រីក្នុងមន្ទីររបស់ខ្លួនឲ្យបានល្អទៅអនាគត ដោយតម្កល់ខ្ពស់នូវឧត្តមប្រយោជន៍ជាតិ និង ប្រជាពលរដ្ឋ ៕
អត្ថបទ និងរូបភាព៖ លោក ស៊ាន សុផាត
កែសម្រួលអត្ថបទ៖ លោក សេង ផល្លី
