នាព្រឹកថ្ងៃទី២២ ខែមិថុនា ឆ្នាំ២០១៩ មន្ត្រីជំនាញកាំកុងត្រូលខេត្តសៀមរាប បានចុះត្រួតពិនិត្យគុណភាព ចំណីអាហារ និងគ្រឿងកំប៉ុងហួសកាលបរិច្ឆេទ ក្នុងផ្សារកក្រាញ់ និង ផ្សារពោធ៍ជ័យក្រោម ស្ថិតនៅភូមិកក្រាញ់ និង ភូមិពោធ៍ជ័យក្រោម សង្កាត់សៀមរាប ក្រុងសៀមរាប។
ដឹកនាំក្នុងការចុះត្រួតពិនិត្យនាពេលនោះ លោក ព្រៅ ខេម រិទ្ធ ប្រធានសាខាកាំកុងត្រូលខេត្តសៀមរាប បានមានប្រសាសន៍ថា មន្ត្រីជំនាញ បានធ្វើតេស្តពិសោធន៍រកសារធាតុគីមីនៅក្នុងម្ហូបអាហារគំរូមួយចំនួន រួមមាន សណ្តែកបណ្តុះ ប្រហុក ផ្អកត្រី ក្រអៅឈូក ស្ពៃជ្រក់ ជ្រក់សណ្តែកបណ្តុះ និង ត្រួតពិនិត្យរាល់គ្រឿងកំប៉ុង និងឥវ៉ាន់ចាប់ហួយផុតសុពលភាពនៃការប្រើប្រាស់នៅតាមតូបនានា នៅក្នុងផ្សារទាំងពីរនេះយ៉ាងយកចិត្តទុកដាក់។ ជាលទ្ធផល ម្ហូបចំណីអាហារ នៅក្នុងផ្សារទាំងពីរនេះ ពុំមានផ្ទុកសារធាតុគីមីហាមឃាត់ និង គ្រឿងកំប៉ុងនិងឥវ៉ាន់ចាប់ហួយហួសកាលបរិច្ឆេទប្រើប្រាស់ឡើយ។
លោក ព្រៅ ខេមរិទ្ធ បានបញ្ជាក់ថា ក្រៅពីបានធ្វើតេស្ដបឋម លើទំនិញគ្រឿងកំប៉ុង ម្ហូបអាហារ រួចរាល់ហើយ ក្រុមការងាររបស់លោក ចែកនូវស្លាកសញ្ញាស្តីពីការហាមឃាត់ ការប្រើប្រាស់ ដល់ដល់ក្រុមអាជីវករលក់ដូរ ប្រជាពលរដ្ឋ អ្នកប្រើប្រាស់ និង សាធារណៈជនទាំងអស់ ដើម្បីអប់រំណែនាំ អំពីបញ្ហាការវេចខ្ចប់ ការទុកដាក់ឲ្យមានអនាម័យល្អ រួមគ្នាទប់ស្កាត់ និងបញ្ឈប់ការប្រើប្រាស់សារធាតុគីមីផងដែរ។
លោក ព្រៅ ខេមរិទ្ធ បានបញ្ជាក់ទៀតថា ប្រសិនបើមន្ត្រីជំនាញកាំកុងត្រូលខេត្ត ត្រូតពិនិត្យរួចហើយឃើញថា នៅក្នុងម្ហូបអាហារ មានការដាក់លាយនូវសារធាតុគីមី ដែលត្រូវបានហាមឃាត់នោះ ខាងក្រុមការងារជំនាញ របស់លោកនឹងធ្វើការដកហូតភ្លាមៗ យកទៅកំទេចចោល ព្រមទាំងធ្វើការណែនាំ និងធ្វើកិច្ចសន្យាមិនឲ្យមានជាលើកទី២ទៀតឡើយ។
អត្ថបទ និងរូបភាព៖ លោក ស៊ាន សុផាត
កែសម្រួលអត្ថបទ៖ លោក សេង ផល្លី
