នៅថ្ងៃទី២១ ខែមិថុនា ឆ្នាំ២០១៩ អាជ្ញាធរខេត្តសៀមរាប បានបើកកិច្ចប្រជុំការងារមួយពាក់ព័ន្ធនឹងការរៀបចំវិថីលក់ម្ហូបអាហារក្នុងខេត្តសៀមរាប ដើម្បីត្រៀមចូលរួមចលនាប្រឡងប្រណាំងទីក្រុងស្អាតលើកទី៣ ឆ្នាំ២០២១-២០២៣។
មានប្រសាសន៍បើកកិច្ចប្រជុំ លោក ពៅ ពិសិដ្ឋ អភិបាលរងខេត្តសៀមរាប បានប្រសាសន៍ថា កន្លងមកថ្នាក់ដឹកនាំខេត្ត រួមនិងមន្ទីរពាក់ព័ន្ធ បានទទួលជោគជ័យរួចមកហើយ ក្នុងការរៀបចំតំបន់ ផាប់ស្ទ្រីត (Pub Street) ឲ្យមានសណ្ដាប់ធ្នាប់ និងជាកន្លែងទេសចរណ៍របស់ភ្ញៀវជាតិ និងអន្តរជាតិមកកំសាន្ត។ ដោយឡែក វិថីម្ហូបអាហារ (Food Street) នេះ វាជាគោលដៅថ្មីរបស់ខេត្តសៀមរាប ដែលទទួលបានកែណែនាំពីក្រសួងទេសចរណ៍ ដើម្បីទាក់ទាញភ្ញៀវជាតិ និងអន្តរជាតិ ទទួលបាននូវអារម្មណ៍ថ្មីបន្ថែមទៀត។
លើកជាមតិយោបល់ ក្នុងកិច្ចប្រជុំនោះ ប្រធានមន្ទីរ តំណាងមន្ទីរអង្គភាពសមត្ថកិច្ចជំនាញ ជាង១០ស្ថាប័ន បានផ្ដល់ជាយោបល់យ៉ាងផុលផុសជូនលោកអភិបាលរងខេត្តធ្វើការពិចារណា ពាក់ព័ន្ធនឹងការជ្រើសរើស ទីតាំង ដោយនេះជារឿងសំខាន់បំផុត ដើម្បីចៀសវាង ការធ្វើឲ្យកកស្ទះចរាចរណ៍ មួយវិញទៀតការរៀបចំវិថីម្ហូបអាហារ (Food Street) នឹងមិនធ្វើឲ្យប៉ះពាល់ដល់សោភណ្ឌភាព និងបរិស្ថានស្ទឹងសៀមរាបផងដែរ ជារួមអង្គប្រជុំបានវាយតម្លៃលើទីតាំងមួយចំនួនក្នុងក្រុងសៀមរាប ដែលផ្ដល់ភាពងាយស្រួល ដល់ភ្ញៀវទេសចរ និងសាកសមសម្រាប់ការថែរក្សាបរិស្ថានក្នុងខេត្ត ដើម្បីដាក់ជូនថ្នាក់ដឹកនាំខេត្តធ្វើការពិចារណា។
ព័ត៌មានជាតិ ថ្មីៗ
លោក ពៅ ពិសិដ្ឋ បានបញ្ជាក់ថា កិច្ចប្រជុំជាលើកដំបូងនេះ ធ្វើឡើងដើម្បីប្រមូលយកមតិយោបល់របស់មន្ទីរអង្គភាពពាក់ព័ន្ធ សម្រាប់ដាក់ជូនឯកឧត្តមអភិបាលខេត្ត ធ្វើការពិចារណា និងសុំសេចក្ដីសម្រេចពីក្រសួងទេសចរណ៍ និងគណៈកម្មការវាយតម្លៃទីក្រុងស្អាត ទៅលើទីតាំងលក់ រចនាបថរទេះ ឬស្តង់លក់ បញ្ជីមុខម្ហូប គុណភាពចំណីអាហារ និងការថែរក្សាបរិស្ថានក្នុងតំបន់នោះផងដែរ។
សូមបញ្ជាក់ថា វិថីម្ហូបអាហារ (Food Street) គឺធ្វើឡើងស្របតាមសេចក្ដីសម្រេច ស្ដីពីការដាក់ឲ្យអនុវត្ត”ស្តង់ដាសេវាកម្មវិថីលក់ម្ហូបអាហារ (Street Food Standard)” កាលពីថ្ងៃទី០៤ ខែមីនា ឆ្នាំ២០១៩ របស់គណៈកម្មាធិការជាតិវាយតម្លៃទីក្រុងស្អាត ដែលមានឯកឧត្តម ថោង ខុន រដ្ឋមន្ត្រីក្រសួងទេសចរណ៍ជាប្រធាន។
អត្ថបទ៖ លោក សេង ផល្លី
រូបភាពប្រភព៖facebook
