នៅព្រឹកថ្ងៃទី ២២ ខែ មិថុនា ឆ្នាំ២០១៩ ថ្នាក់ដឹកនាំ សមាជិកសមាជិកាសហភាពសហព័ន្ធយុវជនកម្ពុជា មកពីរាជធានី ខេត្ត ក្រសួង ស្ថាប័ន បានជួបប្រជុំគ្នានៅក្នុងខេត្តសៀមរាប ដើម្បីស្វែងរកធាតុចូលបន្ថែម និង ផ្សារភ្ជាប់ផែនការ ការងារឲ្យស្របតាមការវិវត្តជាក់ស្តែងរបស់សង្គម និង បរិបទនៃបដិវត្តន៍ឧស្សាហកម្មទី៤ នាថ្ងៃអនាគត ។
កិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជា បានប្រព្រឹត្តទៅក្រោមអធិបតីភាពនិងការដឹកនាំរបស់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា រួមជាមួយនឹងសមាជិក-សមាជិកា គណៈអចិន្ត្រៃយ៍ គណៈកម្មាធិការកណ្តាល, សមាជិក-សមាជិកា គណៈកម្មាធិការកណ្តាល, រួមទាំងវត្តមានចូលរួមរបស់សមាជិក-សមាជិកាសហភាពសហព័ន្ធយុវជនកម្ពុជា សរុបចំនួន ៣៥០នាក់ នៅសាលសន្និសីទសុខា នៃសណ្ឋាគារ សុខា សៀមរាប។
កិច្ចប្រជុំនេះនឹងប្រព្រឹត្តទៅរយៈពេល២ ថ្ងៃ ចាប់ពីថ្ងៃទី២២ ដល់ថ្ងៃទី២៣ ខែមិថុនា ឆ្នាំ២០១៩ ក្នុងគោលបំណង ដើម្បីស្តាប់របាយការណ៍ការងារក្រោយពេលមហាសន្និបាតលើទី៤ រហូតមកដល់បច្ចុប្បន្ន និង តាមដានវឌ្ឍនភាពការងារ និង កំណត់ទិសដៅសកម្មភាពការងារបន្ត ស្របតាមសេចក្តីសម្រេចរបស់មហាសន្និបាត និង ផែនការយុទ្ធសាស្ត្រ «ចលនាយុវជនក្នុងបុព្វហេតុជាតិមាតុ ភូមិ» ឆ្នាំ២០១៨ ដល់ឆ្នាំ២០២៣ ។
មានប្រសាសន៍ថ្លែងក្នុងពិធីបើកនៃកិច្ចប្រជុំ ឯកឧត្តម ហ៊ុន ម៉ានី បានសម្តែងនូវសេចក្តីសោមនស្សរីករាយ និង ថ្លែងអំណរគុណយ៉ាងខ្លាំង ចំពោះការចូលរួមរបស់សមាជិក សមាជិកា ដែលបានចំណាយពេលវេលាដ៏មានតម្លៃធ្វើដំណើរមកពីគ្រប់ទិសទី ចូលរួមជា មួយគ្នាក្នុងកិច្ចជួបជុំជាមួយគ្នា ក្នុងនាមក្រុមគ្រួសារសហភាពសហព័ន្ធយុវជន ។
ឯកឧត្តម ហ៊ុន ម៉ានី ក៏បានគូសបញ្ជាក់ថា «ខ្ញុំសង្ឃឹមយ៉ាងមុតមាំថា សហភាពសហព័ន្ធយុវជនកម្ពុជា របស់យើងនឹងរួមគ្នាសម្រេចបានលទ្ធផល និង សមិទ្ធផលយ៉ាងប្រសើរ និងបរិបូណ៍បន្ថែមទៀត ព្រមទាំងត្រៀមខ្លួនរួចរាល់ សម្រាប់ចក្ខុវិស័យ និង សកម្មភាពសហភាពសហព័ន្ធយុវជនកម្ពុជាទៅអនាគត ។
ឯកឧត្តមប្រធានក៏បានលើកផងដែរថា សហភាពសហព័ន្ធយុវជនកម្ពុជា បានកំពុងដើរតួយ៉ាងសំខាន់ ក្នុងការជម្រុញឲ្យយុវជនចូលរួម លើកិច្ចការងារសង្គមក្រោមស្មារតី២ធ្នូ និង បានលើកទឹកចិត្តយុវជនឲ្យរក្សាជំហរគាំទ្រគោលនយោបាយរបស់រាជរដ្ឋាភិបាលកម្ពុជា តាមរយៈការបណ្តុះស្មារតីសាមគ្គីភាព ពង្រឹងការរួបរួមគ្នា និងការពួតដៃគ្នាក្នុងនាមយុវជនខ្មែរ ដែលជាធនធានពោរពេញដោយចំណេះដឹង និង សមត្ថភាព ចូលរួមជាមួយរដ្ឋាភិបាល កម្ពុជា ក្នុងការសម្រេចឲ្យបាននូវចក្ខុវិស័យឆ្នាំ២០៣០ និងចក្ខុវិស័យឆ្នាំ២០៥០ ដើម្បីប្រជាជន និង អនាគតកម្ពុជា ។ ក្នុងនោះដែរឯកឧត្តម ក៏បានធ្វើការណែនាំ និង ផ្តល់នូវគន្លឹះល្អៗមួយចំនួន សម្រាប់សមាជិកសមាជិកាសហភាពសហព័ន្ធយុវជនកម្ពុជា ដែលបានចូលរួមក្នុងកិច្ចប្រជុំ ដើម្បីជាទុនក្នុងកិច្ចពិភាក្សា ដើម្បីស្វែងរកធាតុចូលបន្ថែម និង ផ្សារភ្ជាប់ផែនការ ការ ងារឲ្យស្របតាមការវិវត្តជាក់ស្តែងរបស់សង្គម និង បរិបទនៃបដិវត្តន៍ឧស្សាហកម្មទី៤ នាថ្ងៃអនាគត ។
ក្នុងនោះឯកឧត្តមក៏បានបញ្ជាក់យ៉ាងច្បាស់ផងដែរថា យុវជនជាធនធានដែលពោពេញទៅដោយចំណេះដឹង និង មានសមត្ថភាព ដោយក្នុងពេលកន្លងមក សហភាពសហព័ន្ធយុវជនកម្ពុជា ក៏សម្រេចបាននូវសមទ្ធិផលធំៗ ក្នុងការចូលរួមអភិវឌ្ឍន៍សង្គមជាតិ ។ ដោយកត្តាទាំងនេះហើយ សំណូមពរដល់យុវជនទាំងអស់ ក្នុងពេលកិច្ចពិភាក្សា នៅតាមក្រុមនិមួយៗ សូមលើកយកនូវគំនិតល្អៗ ដើម្បីជាមូលដ្ឋាន ក្នុងការចងក្រងជាឯកសារ សម្រាប់ការអនុវត្តបន្តរបស់សហភាពសហព័ន្ធយុវជនកម្ពុជា ព្រម ទាំងបានធ្វើការជម្រុញដល់សហភាពសហព័ន្ធយុវជនកម្ពុជាគ្រប់បណ្តារាជធានី ខេត្តទាំងអស់ ធ្វើពង្រឹងពង្រីកនូវសមាជិកភាពរបស់ខ្លួន ដើម្បីចូលរួមអភិវឌ្ឍន៍សង្គម និង មូលដ្ឋានរបស់ខ្លួនឲ្យមានការរីកចម្រើនទៀតផង ៕
អត្ថបទ និងរូបភាព៖ លោក គឿន វេត
