ព្រឹកថ្ងៃសុក្រ ទី២១ ខែមិថុនា ឆ្នាំ២០១៩ ក្រុមការងារចម្រុះរដ្ឋបាលខេត្តសៀមរាបបានបន្តចុះរៀបចំសណ្តាប់ធ្នាប់និងកាត់ការតម្លើងស្លាកយីហោនិងផ្ទាំងផ្សព្វផ្សាយពាណិជ្ជកម្មក្នុងខេត្តសៀមរាបដែលគ្មានលិខិតអនុញ្ញាតក្រោមការដឹកនាំបញ្ជាផ្ទាល់ លោក នាក់ ណេរ៉ុន អភិបាលរងខេត្តសៀមរាបនិងជាតំណាងដ៍ខ្ពង់ខ្ពស់ឯកឧត្តមទៀសីហាគណៈអភិបាលខេត្តសៀមរាបនិងលោក លោកស្រី ប្រធាន អនុប្រធានទីចាត់ការចំណុះសាលាខេត្ត និងប្រធានមន្ទីរអង្គភាពជំនាញផងដែរ។
នៅក្នុងការចុះរៀបចំសណ្តាប់ធ្នាប់និងកាត់ស្លាកយីហោនិងផ្ទាំងផ្សព្វផ្សាយពាណិជ្ជកម្មក្នុងខេត្តសៀមរាបដែលគ្មានលិខិតអនុញ្ញាតគិតចាប់ពីថ្ងៃទី០៣ ដល់ថ្ងៃទី២០ ខែមិថុនា ឆ្នាំ២០១៩ ក្រុមការងារបានចាប់ផ្តើមពីចំណុចចុងស្ពានថ្មខាងកើតព្រះរាជដំណាក់ រហូតដល់ព្រំប្រទល់ស្រុកប្រាសាទបាគងអមសងខាងផ្លូវជាតិលេខ៦ក្រុមការងារខេត្តកាត់បានស្លាកយីហោនិងផ្ទាំងផ្សព្វផ្សាយពាណិជ្ជកម្មក្នុងខេត្តសៀមរាបដែលគ្មានលិខិតអនុញ្ញាត ខុសលក្ខណៈបច្ចេកទេស និងលិខិតបទដ្ឋានគតិយុត្ត ដែលមានទំហំក្រោម០៤ម៉ែត្រក្រឡាបានចំនួន ១០២ទីតាំង និងទំហំ ០៤ម៉ែត្រក្រឡាចំនួន ៤០ទីតាំង ហើយផែនការអនុវត្តបន្តពីថ្ងៃទី២១ខែមិថុនាឆ្នាំ២០១៩ បន្តពីស្រុកប្រាសាទបាគង ទៅដល់ព្រំប្រទល់ស្រុកស្ទោង នៃខេត្តកំពង់ធំ។
លោកប្រធានក្រុមការងារក៏បានណែនាំដល់បងប្អូនបានលើកស្លាកយីហោនិងផ្ទាំងផ្សព្វផ្សាយពាណិជ្ជកម្មឲ្យអនុវត្តតាមគោលការណែនាំរបស់រដ្ឋបាលខេត្តជាអាទិ៍ ៖
១-ត្រូវសរសេរអក្សរខ្មែរឲ្យធំជាងអក្សរបរទេសហើយអក្សរខ្មែរដាក់នៅជួរខាងលើ។
២-អក្សរបរទេសត្រូវសរសេរនៅជួរខាងក្រោមនិងមានទំហំ១/២មួយភាគពីរនៃទំហំអក្សរខ្មែរ។
៣-សរសេរអក្សរខ្មែរត្រូវអនុវត្តតាមវចនានុក្រមសម្តេចព្រះមហាសុមេធាធិបតីជោតញ្ញណោជួន ណាត។
៤-ចំពោះការដាក់តាំងស្លាកយីហោឬតម្លើងផ្ទាំងផ្សព្វផ្សាយពាណិជ្ជកម្មគ្រប់ប្រភេទដែលមានទំហំក្រោម៤(បួន)ម៉ែត្រក្រឡាត្រូវបំពេញបែបបទស្នើសុំលិខិតអនុញ្ញតពីរដ្ឋបាលក្រុង ស្រុក ហើយទំហំចាប់ពី៤(បួន)ម៉ែត្រក្រឡាឡើងទៅត្រូវបំពេញបែបបទស្នើសុំលិខិតអនុញ្ញតពីរដ្ឋបាលខេត្តសៀមរាប។
៥-ម្ចាស់ទីតាំងអាជីវកម្មត្រូវដាក់តាំងឬតម្លើងឲ្យមានលក្ខណៈបច្ចេកទេសហើយតាមដាននិងត្រួតពិនិត្យនូវស្លាកយីហោឬផ្ទាំងផ្សព្វផ្សាយពាណិជ្ជកម្មជាប្រចាំ ដើម្បីធានាបាននូវសុវត្ថិភាព សោភ័ណភាព សណ្តាប់ធ្នាប់និងរបៀបរៀបរយសាធារណៈ។
៦-រដ្ឋបាលក្រុង ស្រុកត្រូវតាមដាននិងត្រួតពិនិត្យណែនាំរាល់ការដាក់តាំងឬតម្លើង ស្លាកយីហោ និង ផ្ទាំងផ្សព្វផ្សាយពាណិជ្ជកម្មគ្រប់ប្រភេទនៅក្នុងដែនសមត្ថកិច្ចរៀងៗខ្លួនដូចមានខ្លឹមសារចែងខាងលើ។
អត្ថបទ រូបភាព អ៊ិន សហរិទ្ធ
កែសម្រួល ហាំ ម៉េងហួត
