ថ្ងៃទី២១ ខែមិថុនា ឆ្នាំ២០១៩វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) ក្រោមការឧបត្ថម្ភពីកិច្ចសហប្រតិបត្តការ មេគង្គ ឡានឆាងបានរៀបចំសិក្ខាសាលាចាប់ផ្តើមគម្រោង ស្តីពី៖ការទូតក្នុងការគ្រប់គ្រងទឹកនៅអាងទន្លេមេគង្គ ដើម្បីឲ្យមានការប្រើប្រាស់អាងទន្លេជារួម និងសម្រេចបានភាពរុងរឿង នៅសណ្ឋាគារអប្សរាផាឡែសខេត្តសៀមរាបដោយមានសិក្ខាកាមចូលរួមចំនួន៤៤រូបជាប្រតិភូតំណាងប្រទេសទាំង៦ក្នុងអនុតំបន់មេគង្គ ឡានឆាង និងតំណាងក្រសួងអប់រំយុវជននិងកីឡា តំណាងក្រសួងការងារនិងបណ្តុះបណ្តាលវិជ្ជាជីវៈ តំណាងក្រសួងផែនការព្រមទាំង តំណាងនិស្សិតមកពីសាកលវិទ្យាល័យចំនួន១២មកពីរាជធានីភ្នំពេញ ខេត្តស្វាយរៀង និងខេត្តសៀមរាបព្រមទាំងអង្គការដៃគូមួយចំនួនផងដែរ។
លោក ឆែន រីទ្ឋី នាយកប្រតិបត្តិនៃវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) ថ្លែងថា៖ គម្រោងនេះមានគោលដៅ៖ ១)ធ្វើការស្រាវជ្រាវពីវិធីសាស្ត្រដោះស្រាយបញ្ហាទឹកនៅប្រទេស កម្ពុជា ចិន ឡាវ ថៃ និង វៀតណាម ២)ពិនិត្យពី បញ្ហាប្រឈមផ្សេងៗក្នុងការចរចាលើបញ្ហាទឹក និងជម្រើសផ្នែកគោលនយោបាយដើម្បីដោះស្រាយបញ្ហាទាំងនេះ ៣)ផ្តល់មតិដល់អ្នកធ្វើការសម្រេចចិត្ត និងរបៀបវារៈផ្នែកគោលនយោបាយសំខាន់ៗ ដើម្បីអាចសម្រេចបានការអភិវឌ្ឍប្រកបដោយចីរភាពនៅតាមប្រទេសនីមួយៗ និងនៅក្នុងអាងទន្លេមេគង្គទាំងមូល និង ៤)លើកកម្ពស់សមត្ថភាព ចំណាប់អារម្មណ៍ និងការតាំងចិត្តរបស់អ្នកពាក់ព័ន្ធសំខាន់ៗនៅគ្រប់កម្រិត និងពង្រីកចំណេះដឹងនៅតាមសាកលវិទ្យាល័យនានា តាមរយៈការដាក់បញ្ចូលលទ្ធផលស្រាវជ្រាវឃើញទៅក្នុង ឯកសារសម្រាប់ការបង្រៀន/ការបណ្តុះបណ្តាលអំពីការអភិវឌ្ឍប្រកបដោយចីរភាព។
លោក លាវ ជាជា ប្រធានការិយាល័យកុងស៊ុលចិនប្រចាំខេត្តសៀមរាបនិងជាតំណាងស្ថានទូតនៃសាធារណៈរដ្ឋប្រជាមានិតចិនប្រចាំកម្ពុជាមានប្រសាសន៍ថា៖ចាប់តាំងពីការបង្កើតឡើងនៃយន្តការ មេគង្គ ឡានឆាង រយៈពេលបីឆ្នាំមក គ្រប់វិស័យផ្សេងៗក្រោមកិច្ចសហប្រតិបត្តិការ មេគង្គ ឡានឆាងមេគង្គទទួលបានការរីកចម្រើនជាច្រើនដែលបង្ហាញពីល្បឿននិងប្រសិទ្ឋភាពការងារ។
លោក លាវ ជាជា បញ្ជាក់ថា៖ នៅឆ្នាំ២០១៦ ភាគីចិនបានស្នើបង្កើតមូលនិធិ កិច្ចសហប្រតិបត្តិការ មេគង្គ ឡានឆាងពិសេសមួយនៅក្នុងកិច្ចប្រជុំថ្នាក់ដឹកនាំលើកដំបូងស្តីពីកិច្ចសហប្រតិបត្តិការមេគង្គ ឡានឆាង ដោយសម្រេចផ្តល់ថវិកាចំនួន៣០០លានដុល្លារក្នុងរយៈពេល៥ឆ្នាំ ដើម្បីគាំទ្រដល់គម្រោងកិច្ចសហប្រតិបត្តិការខ្នាតតូច និងមធ្យមដែលបានស្នើឡើងដោយប្រទេសទាំង៦ ហើយថ្មីៗនេះផងដែរ ឯកអគ្គរដ្ឋទូតចិនប្រចាំកម្ពុជា និងឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា បានចុះហត្ថលេខាលើគម្រោងមូលនិធិពិសេសដែលបានអនុម័តចំនួន៣៥ចំណុច ពាក់ព័ន្ឋទៅនឹងវិស័យអប់រំ វិស័យទេសចរណ៍ កាត់បន្ថយភាពក្រីក្រ ការការពារបរិស្ថាននិងវិស័យដទៃទៀត។តំណាងស្ថានទូតចិនបន្តទៀតថា៖កម្ពុជាគឺជាប្រទេសមួយដែលទទួលបានគម្រោងច្រើនជាងគេក្នបុងរយៈពេលពីរឆ្នាំជាប់ៗគ្នាក្នុងចំណោមប្រទេសទាំង៦។សម្រាប់ទស្សនៈវិស័យទៅអនាគត ភាគីចិមានឆន្ទៈនឹងបន្តពង្រឹងកិច្ចសហប្រតិបត្តិការជាមួយកម្ពុជានិងដៃគូពាក់ព័ន្ឋ ដើម្បីរួមគ្នាលើកកម្ពស់ភាពរីកលូតលាស់នៃកិច្ចសហប្រតិបត្តិការ មេគង្គ ឡានឆាងដើម្បីពង្រឹងផលប្រយោជន៍រួម និងចែករំលែកនូវសមិទ្ឋផលនៃការអភិវឌ្ឍរួមគ្នានេះ សម្រាប់ជំរុញការអភិវឌ្ឍប្រកបដោយចិរភាពនៅក្នុងអនុតំបន់មេគង្គ។
បណ្ឌិត សេង ផាន់ណា ប្រធានស្តីទីនាយកដ្ឋានស្រាវជ្រាវនិងវិភាគយុទ្ឋសាស្ត្រនៃវិទ្យាស្ថានការទូតនិងទំនាក់ទំនងអន្តរជាតិនៃក្រសួងការបរទេសនិងសហប្រតិបត្តិការអន្តរជាតិ មានប្រសាសន៍ថា៖ទន្លេឡានឆាងនិងទន្លេមេគង្គមានឈ្មោះខុសគ្នាមែន តែជាទន្លេដែលមានប្រភពតែមួយគឺហូរចេញពីតំបន់ខ្ពង់រាបទីបេនៃប្រទេសចិន ដោយហូរឆ្លងកាត់តាមខេត្តឃុនណាន ប្រទេសចិនចុះមកក្រោម ភ្ជាប់មកទន្លេមេគង្គ ហូរកាត់ប្រទេសភូមា ឡាវ ថៃ កម្ពុជា និងវៀតណាម មានប្រវែង៤,៨៨០គ.ម គឺជាទន្លេវែងបំផុតជាប់ចំណាត់ថ្នាក់ទី៧ក្នុ ងតំបន់អាស៊ី និងទី១២ក្នុងពិភពលោកគ្របដណ្តប់លើផ្ទៃដីសរុប ៧៩៥,០០០គ.មក្រឡា និងបានផ្តល់ម្ហូបអាហារនិងទឹក ផ្លូវគមនាគមន៍ និងអាចចិញ្ចឹមជីវិតមនុស្សដែលរស់នៅតាមបណ្តោយទន្លេនេះបានជាង៣២៦លាននាក់។ អាងទន្លេមេគង្គជាជង្រុកត្រីដែលមានត្រីពី១២០០ទៅ១៧០០ប្រភេទត្រី ជាទន្លេដែលមានអាងទឹកធំបំផុតទី៣បន្ទាប់ពីអាងទឹកនៅអាម៉ូហ្សូននិងអាងទឹកនៅកុងហ្គូ។
សូមបញ្ចាក់បន្ថែមថា៖គម្រោងស្រាវជ្រាវនេះ ជាកិច្ចសហការរវាង ក្រសួងការបរទេស និងសហប្រតិបត្តិការអន្តរជាតិ (MoFAIC), វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI), នឹងស្ថាប័នអនុវត្តគម្រោងចំនួន ៨ គឺមាន វិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI), សាកលវិទ្យាល័យបញ្ញាសាស្ត្រនៃកម្ពុជា (PUC), វិទ្យាស្ថានជាតិការទូត និងទំនាក់ទំនងអន្តរជាតិ (NIDIR), សាលាវិទ្យាសាស្ត្របរិស្ថាននិងវិស្វកម្ម នៃសាកលវិទ្យាល័យភាគខាងត្បូងនៃវិទ្យាសាស្ត្រនិងបច្ចេកវិទ្យា (SUSTech, China), គណៈកម្មាធិការជាតិទន្លេមេគង្គកម្ពុជា (CNMC), គណៈកម្មាធិការជាតិទន្លេមេគង្គឡាវ (LNMC), គណៈកម្មាធិការជាតិទន្លេមេគង្គថៃ (TNMC) និង គណៈកម្មាធិការជាតិទន្លេមេគង្គវៀតណាម (VNMC)។ ស្ថាប័នជាតិដៃគូស្រាវជ្រាវនីមួយៗ នឹងផ្តល់ព័ត៌មានសង្ខេបពីអាងទន្លេមេគង្គ និងបញ្ហាជាប់ទាក់ទិននានា ដោយមានការផ្តោតលើ ១)បទពិសោធន៍ និងចម្លើយតបតាមដំណើការទូតដើម្បីដោះស្រាយបញ្ហាទឹក ២)ផលពាក់ព័ន្ធផ្នែកសង្គម សេដ្ឋកិច្ច នយោបាយ វប្បធម៌ និងបរិស្ថាន ទៅលើការអភិវឌ្ឍអាងទន្លេមេគង្គ និង ៣)ចក្ខុវិស័យជាយុទ្ធសាស្ត្រ និងបេសកកម្មទៅអនាគត សម្រាប់បណ្តាប្រទេសនៅតាមដងទន្លេមេគង្គ-ឡានឆាង។
អត្ថបទ និងរូបភាព៖ លោក យូ វង្ស
