ឯកឧត្តម ទៀ សីហា អភិបាខេត្តសៀមរាប បានលើកឡើងថា នៅក្នុងប្រទេសកម្ពុជា បញ្ហាអាកាសធាតុ កំពុងមានការប្រែប្រួលខ្លាំង ជាពិសេសបញ្ហាផ្គររន្ទះ វាក៏ជាបញ្ហាមួយដែលរាជរដ្ឋាភិបាលកំពុងមានការព្រួយបារម្ភ ដោយសារកន្លងមកបញ្ហាផ្គររន្ទះនេះ វាបានឆក់យកអាយុជីវិតមនុស្ស និងសត្វជាច្រើននៅក្នុងប្រទេសកម្ពុជា។
ឯកឧត្តម ទៀ សីហា បន្តថា សម្រាប់ខេត្តសៀមរាប ក្នុងខែមិថុនានេះបញ្ហាផ្គររន្ទះក៏បានឆក់យកអាយុប្រជាពលរដ្ឋ ចំនួន០៣នាក់ នឹងសត្វពាហនមួយចំនួនផងដែរ ហើយនេះជាបញ្ហាមួយដែលអាជ្ញាធរខេត្ត ក៏ដូចជាមន្ទីរពាក់ព័ន្ធ កំពុងមានការព្រួយបារម្ភជាខ្លាំងផងដែរចំពោះបញ្ហានេះ។
ឯកឧត្តមអភិបាលខេត្ត បន្តទៀតថា កន្លងមកអាជ្ញាធរខេត្តក៏ដូចជាមន្ទីរពាក់ព័ន្ធ បានសហការចុះធ្វើការត្រួតពិនិត្យ នឹងតាមដាននូវរាល់បញ្ហានេះយ៉ាងយកចិត្តទុកដាក់បំផុត ជាពិសេសអាជ្ញាធរខេត្ត ក៏បានត្រៀមនឹងដំឡើងនូវឧបករណ៍ ការពាររន្ទះ នៅទីតាំងមួយចំនួនដែលតែងតែមានករណីផ្គររន្ទះនេះកើតឡើងញឹកញាប់ ដើម្បីបញ្ជាស និងកាត់បន្ថយរាល់បញ្ហានេះ កុំឲ្យបន្តកើតបានឡើងទៀត។
ឯកឧត្តម ទៀ សីហា ក៏បានសំណូមពរដល់អាជ្ញាធរស្រុកឃុំសង្កាត់ ត្រូវយកចិត្តទុកដាក់ពីបញ្ហានេះឲ្យបានល្អ ក្នុងការជួយដល់បងប្អូនប្រជាពលរដ្ឋនៅតាមមូល ជាពិសេសត្រូវចុះធ្វើការផ្សព្វផ្សាយជូនដល់ប្រជាពលរដ្ឋ នៅតាមមូលដ្ឋានរបស់ខ្លួនឲ្យបានញឹកញាប់ ដើម្បីឲ្យពួកគាត់បានយល់ និងមានការប្រុងប្រយ័ត្នខ្ពស់ ដើម្បីការពារនូវរាល់បាតុភូតនេះកើតឡើងនៅតាមមូលដ្ឋានពួកគាត់។
សូមបញ្ជាក់ផងដែរថា ឯកឧត្តម ទៀ សីហា បានលើកឡើងបែបនេះក្នុង ពិធីប្រកាសចូលកាន់តំណែងក្រុមប្រឹក្សាស្រុកស្រីស្នំ អាណត្តិទី៣ កាលពីព្រឹកថ្ងៃទី១៩ ខែមិថុនា ឆ្នាំ២០១៩នេះ ៕
អត្ថបទ និង រូបភាព ៖ អ៊ុន ណារាជ្យ
