នៅសាលសន្និសីទនៃសណ្ឋាគារសុខាសៀមរាប នាព្រឹកថ្ងៃទី ០៤ ខែ កក្កដា ឆ្នាំ២០១៩នេះ កិច្ចប្រជុំគណៈកម្មការការងារ VECONAC ឆ្នាំ២០១៩ បានបើកដំណើរកិច្ចប្រជុំពិភាក្សារបស់ខ្លួន ក្នុងគោលបំណងប្រុងប្រៀប និង បង្កើនប្រសិទ្ធភាព នៃកិច្ចប្រជុំគណៈកម្មាធិការប្រតិបត្តិលើកទី៣២ នៃមហាសន្និបាតលើកទី១៩ ដើម្បីទទួលបានលទ្ធផល និង បម្រើផលប្រយោជន៍រួមដល់បណ្តាប្រទេសជាសមាជិកទាំងអស់ក្នុងអាស៊ាន ក្រោមកិច្ចដឹកនាំរបស់ឯកឧត្តមនាយឧត្តម សេនីយ៍ មាស សាវ៉ន អគ្គនាយក នៃអគ្គនាយកដ្ឋានយោធសេវា ក្រសួងការពារជាតិ និង ជាអគ្គលេខាធិការរង សមាគម អតីតយុទ្ធជនកម្ពុជា តំណាងឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រី អនុប្រធាននិងជាលេខាធិការសមាគម អតីតយុទ្ធជន និង ជាប្រធាន VECONAC ដោយមានការចូលរួមពីក្រុមការងារមកពីបណ្តាប្រទេសជាសមាជិកអាស៊ាន ។
មានប្រសាសន៍បើកកិច្ចប្រជុំនេះ ឯកឧត្តមនាយឧត្តមសេនីយ៍ មាស សាវ៉ន បានសម្តែងការកោតសរសើរដល់បណ្តាប្រទេសជាសមាជិក និង សហព័ន្ធអតីតយុទ្ធឡាវ ក្នុងការរៀបចំមហាសន្និបាតលើកទី ១៨ នៅសាធារណរដ្ឋប្រជាមានិតប្រជាធិបតេយ្យឡាវ ប្រកបដោយភាពជោគជ័យកន្លងមក ហើយដោយយោងតាមសេចក្តីសម្រេចនៃមហាសន្និបាតលើកទី១៨ បានតម្រូវឲ្យលេខាធិការដ្ឋានប្តូរវេនថ្មី រៀបចំកិច្ចប្រជុំគណៈកម្មការការងារ ក្នុងគោលបំណងប្រុងប្រៀប និង បង្កើនប្រសិទ្ធភាពនៃកិច្ចប្រជុំគណៈកម្មាធិការប្រតិបត្តិលើកទី៣២ និង មហាសន្និបាតលើកទី១៩ ដើម្បីទទួលបានលទ្ធផល និង បម្រើផលប្រយោជន៍រួមដល់បណ្តាប្រទេសជាសមាជិកទាំងអស់ក្នុងអាស៊ាន ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
